入到大樓,高大嘅天花板下,就有一張石拱橋形嘅枱,上面放咗一本好厚嘅黑色簿。
 
 
哩本應該就係眾人所講嘅生死簿。
 
 
我正要打開時,一把聲音從後面喝止我。
 
 
「偷嘢應該唔太合禮數,南門先生。」


 
 
我轉頭,眼前嘅人⋯⋯原來正係白色臉孔白色頭髮,著亮麗黑色西裝嘅義律爵士。
 
 
「相信南門先生嘅令尊及令堂都有教過閣下唔好不問自取,特別唔應該係你睇嘅嘢,就唔應該係你睇。」
 
 
「你⋯⋯」
 


 
「呀我唔記得咗,你係無父⋯⋯不過家母咁有修養,無理由⋯⋯」
 
 
 
「你知道我媽咪?」
 
 
佢避開我問題,只係話:「唔洗查啦,自殺潮嘅原因無他,就係因為你。」
 


 
「我?」
 
 
「你記唔記得自己做過啲乜嘢?」
 
 
「我做過乜嘢?」
 
 
「你救咗一班本來要死嘅人。」
 
 
我慢慢回想起,話:「你係講郵輪嗰班人?」
 


 
「生死簿一早已經白紙黑字寫明,佢哋喺出海之後無幾耐,就會遇上颱風沉沒,由於當時遇上船內火災,全員罹難,無一生還。」佢笑容帶幾分邪氣:「唔少人仲死得好慘⋯⋯」
 
 
佢拉開一張椅子,坐喺我面前,優雅咁翹起腳話:「但你令船期延後,救咗佢哋,改變咗佢哋原來嘅命運。」
 
 
獅星號。
 
 
當初從張有成口中得知獅星號會沉,無數人會死嘅消息。
 
 
陰間中,張有成話:「世間萬物都係已經決定好,就好似遲啲會有隻遊輪注定十五日後會沉,無數人會死,哩啲都係命數。」
 


 
「有無數人死?係邊隻船?」
 
 
「你想救佢哋?咁樣未必有用。」
 
 
「唔通你由得咁多人死?」
 
 
「我會尊重命數。」
 
 
「張先生⋯⋯到底隻船叫咩名?」
 


 
「你想知我係可以講⋯⋯如果你可以同我交換條件。」
 
 
「條件?」
 
 
「你知我想要咩。」
 
 
最終條件就係我放棄講出真話,換嚟佢個仔自己去自首嘅機會。
 
 
仲記得嗰晚我花咗好大氣力偷入去破壞獅星號,先令郵輪無得如期開船,逃過一劫。
 


 
「我知道,所以佢哋已經得救,逃過一劫。」我對義律講。
 
 
「錯。佢哋都係要死。」佢馬上反駁我。
 
 
「點解?佢哋已經無上隻船。」
 
 
「睇嚟你唔太明白世間萬物嘅規則,生死簿係決定世事萬物發展。決定咗、注定咗嘅事係點都要執行,哩種叫『命運』。」
 
 
我明白咁話:「所以哩排先咁多人夢到親人而自殺,都係你做?」
 
 
「根本唔需要,好多信奉我嘅人,自然會去做⋯⋯包括你嘅好朋友。」
 
 
「我嘅好朋友?」
 
 
佢微笑咁望住我。
 
 
「阿龍?佢點會咁樣做?」
 
 
「你知唔知,被欺壓嘅人,最怕唔係受欺壓⋯⋯」佢自信咁講:「佢哋最怕⋯⋯係其他人唔洗受欺壓。對佢哋嚟講,咁樣先係『唔公平』呀。」
 
 
「作為一個政府嘅官員,你人品都算賤格。」
 
 
「世界官員都係咁,無論係人間或者係陰間,都無分別。你哋郵局嘅局長為咗節省資源,咪又係肯聽我哋講,炒咗你。」佢笑住講。
 
 
「⋯⋯」哩件事我已經唔想再計較,我問:「點解救咗又要奪去返佢哋嘅命!」
 
 
「哩個係佢哋嘅命運,決定咗就係咁,就算改變,都一定要死。哩個係注定,亦即係宿命。」
 
 
我憤慨咁話:「究竟人命同人生喺你心目中有啲咩價值?」
 
 
「老實講,每個人嘅人生一早都已經決定咗,由一出世嘅家庭都已經決定你會係一個點樣嘅人啦,生死簿就係掌控哩個秩序。」
 
 
佢整理一下西裝話:「坦白講,點解贖孽就係要交稅畀我?係咁唔公平㗎啦,哩個就係體制。」
 
 
哩個時候,義律眺望一下門外,門外頓時有幾個黑黑瘦瘦嘅守衛走咗入嚟,兩三下手勢就捉住我。
 
 
佢哋慢慢用一條好粗大嘅繩一圈一圈咁樣綁住我,實到我動彈不得。
 
 
「你真係喪心病狂!」
 
 
「你令堂無教你做人要有啲禮貌咩?」佢笑一笑話:「抱歉,唔記得你媽咪唔喺你身邊,啊⋯⋯佢已經⋯⋯」
 
 
我心裡面好驚慌咁問:「你究竟係咪知我媽咪下落!?」我畀人綁住,好想向前,但好大力咁掙脫都郁唔到。
 
 
「你媽咪真係英勇嘅人。」
 
 
「你知唔知,只要我煽動下佟蓳萓佢哋,可以有新嘅人間生活,所謂嘅愛情同友情,都只不過係不堪一擊嘅產物。」
 
 
「你媽咪就無咁好彩啦⋯⋯為咗保護自己嘅女⋯⋯最終畀我⋯⋯」
 
 
「你講大話!」
 
 
「你細妹畀人呃入屋時,我都在場,我睇到你媽咪幾咁憤怒、幾咁想救自己個女出嚟,幾咁偉大咁想代贖返自己個女。」
 
 
「可惜⋯⋯我唔會畀佢咁做。」佢雙手扣住自己嘅頸,伸脷扮死咁,然後哈哈大笑。
 
 
「啊!!!!!!!!!!!」我全身用力想衝上前殺死哩個賤人!但畀左右兩邊嘅守衞拖住,完全郁唔到!
 
 
「點解係我⋯⋯點解要搞我屋企人。」
 
 
「因為你哩個唔喺生死簿入面嘅人,毫不受控,真係好煩好煩⋯⋯」
 
 
「原本都仲想同你玩下,睇你究竟可以改變幾多嘢,不過玩完啦,實在太煩,而家我要收拾殘局。」佢用皺紋滿佈嘅手,壓喺我頭上,用力咁按落嚟。
 
 
一種靈魂被抽乾嘅感覺!
 
 
「啊!啊!!!!!!啊!!!!!」嗰種撕心裂肺嘅痛,我忍唔住要大叫。
 
 
「以後,你都唔洗嚟陰間。」
 
 
 
哩句係我最後聽到嘅說話。