《我係窮郵差，專門幫陰陽相隔嘅親人送信》（書局上架中）: 159

 
太過安靜，安靜之中仲隱隱約約有種⋯⋯
 
 
殺機？
 
 
話口未完，迎面已經有兩個守衛揮刀喺林間一躍而至，直撲向我，手上仲有一把大刀。
 
 


我側身一避，恰恰咁避過佢哋嘅刀，刀風仍然清晰咁感覺到喺我臉頰掠過，驚險到差一吋我就人頭落地。
 
 
嘩，成身嘅冷汗都出晒嚟。
 
 
都未驚完，下一刀已經由頭揮落嚟！我向後避開，佢哋再次逼近舞刀逼近。
 
 
救命，點解咁刺激？


 
 
我無再戀同佢哋糾纏，轉身就向市中心跑，留低佢兩個。
 
 
跑出到市中心，穿越英式風格嘅大街小巷，但我完全都無頭緒佢哋會喺邊，哩個時候，佢哋兩個已經又追上嚟。
 
 
哩個時候，眼見不知去向時，一隻手捉住我，拉我入咗隱瞞嘅後巷，同時掩住我個口，同嗰兩個守衛就咁擦身而過。
 


 
「你⋯⋯」
 
 
細妹！
 
 
「點解妳會喺度嘅？」我問佢。
 
 
「你又點解會喺度呀？」佢問返轉頭。
 
 
「王胤瀅有危險！你有無見過阿龍？」
 


 
「我就係因為哩樣先哩度搵你，我見到。」
 
 
我驚喜咁話：「咁佢哋係邊？」
 
 
細妹拉住我行，轉眼間偷偷赽上咗一架無人嘅馬車。
 
 
「我哋去邊？」
 
 
「就係帶你去搵佢。」
 


 
「妳又會咁啱喺度⋯⋯」
 
 
「因為我大佬唔係叫人可以放心得落嘅人。」
 
 
馬車徐徐而行，風迎面送爽，哩個時候，我先發現細妹今日著嘅係黑色裙。
 
 
黑色裙⋯⋯
 
 
「原來一直跟住我嘅人係妳？」
 


 
「所以話你乜都唔知，如果唔係我，你早就畀阿龍害死咗好多次。」佢不屑咁講。
 
 
「阿龍好多次都想有暗中跟住你，雖然唔知佢想做咩，但只要我喺背後，佢都落唔到手。」
 
 
原一直暗中保護我嘅人，係妳？
 
 
「係嗰次你盲衝衝闖入佢住嘅山，幫都幫你唔到。」
 
 
「多謝妳囉。」
 


 
「好噁心。」
 
 
「細妹⋯⋯」
 
 
「嗯？」佢專心咁揸繄馬車，無望過嚟。


 
「我知道咗媽咪係點死啦。」
 
 
空氣忽然之間變得稀薄同沉重，重到好似壓咗喺胸口同肩膀，令人透唔到氣，令人窒息嘅空氣。
 
 
佢無講任何嘢，仍然死盯住前方。
 
 
就好似⋯⋯無感受咁。
 
 
「嗯。」
 
 
「妳⋯⋯係咪好嬲我？」
 
 
佢忽然一巴摑過嚟，我塊臉即時紅咗。
 
 
同時紅嘅仲有佢雙眼。
 
 
「你覺得呢？」佢又問返我轉頭，明明係我問緊。
 
 
「對唔住⋯⋯」
 
 
「⋯⋯」


 
「所以妳要避開我，從來都唔嚟搵返我。」
 
 
一講到哩度，就又諗返得返自己一個人過生活嗰種孤獨日子。
 
 
「一半啦，我都唔想畀你知我喺度啫。」
 
 
風吹動佢嘅頭髮油然而飄。
 
 
「點解？」
 
 
「因為你就會好似而家咁⋯⋯咁煩，成個段譽咁。
 
 
「對唔住⋯⋯」
 
 
「又對唔住啲咩呀？」
 
 
「對唔住累到你哋咁⋯⋯對唔住⋯⋯媽媽嘅事⋯⋯對唔住累到妳咁。」
 
 
講到哩度，細妹繼續默然不語，過咗一陣，見到佢眼淚一滴一滴咁流出嚟。
 
 
從小都好少見到細妹會喊，佢嘅堅強程度令人懷疑佢到底有無淚線。
 
 
唔計細個BB仔嘅時候，人生好似得兩次真係見到佢喊，第一次係我畀車撞嗰次，佢喊住咁講對唔住，第二次係今次。
 
 
突然佢又失驚無神一拳打入我心口，痛到入心入肺，我忍唔住哇哇大叫，痛淚水都流晒出嚟。
 
 
「當無數，哩拳係為媽媽打嘅。」
 
 
「吓？」
 
 
「鬼叫你係我阿哥咩。」
 
 
馬車嚟到黃泉嘅上游，哩個時候，已經可以清楚見到兩個人影。
 
 
阿龍⋯⋯同埋王胤瀅！
 
 
阿龍正係捉住王胤瀅喺佢前面，面對住洪洪嘅河水，兩個人啱啱好喺度互相掙扎糾纏。
 
 
「王胤瀅！」
 
 
阿龍一見到我，就皺眉怒目，拉住王胤瀅往後退。