【問君何所欲？】我要搵人幫我Hand Job！: （２）

「我約咗佢晏啲上嚟幫你。我放條鎖匙喺地氈底，到時佢識自己開門㗎啦。」
 
知道手天使幫唔到我，細佬佢竟然安排咗性工作者俾我。我嘅人生又好似出現返曙光咁。
 
我唔知點開口：「但係佢……佢……」
 
「我同佢好熟㗎，唔駛驚佢會偷嘢喎。佢……知道你嘅情況，啲服務要加錢都冇所謂，入我數。佢仲唔介意做一陣鐘點，你食埋飯佢先會走。」
 
唔係呀，其實我想問，佢有冇性病……
 


如果我隻手可以郁多啲，我應該會打咗自己一巴。難得人哋唔介意，我仲有咩要求喎？
 
突然間，我先意識到原來我嘅自信心係咁低落。因為一直都冇，當有可能得到，就已經認定係奇蹟，自己唔配去揀擇。
 
我勉強自己笑咗笑，「千祈唔好俾阿嫲知呀！」
 
「梗係啦。」細佬拍拍我左邊膊頭。我嗰忽肉冇感覺㗎，但佢成日咁嚟鼓勵我，仲話我越冇Feel越好Feel喎，男人老狗抄埋曬啲姨媽巾廣告。
 
阿傑同阿嫲出咗門口，我喺張床度等咗冇耐，阿如就嚟咗。
 


佢開鎖之前，敲敲門，講咗句：「打攪曬。」似足去旅行住酒店，唔知入面有冇鬼嗰時咁做。
 
佢一推開大門，真係當正我係鬼，我聽到佢嘅腳步聲行嚟行去，把聲有啲沙，「阿傑間房呢……呀，肯定係呢間。估唔到佢份人懶正經，間房咁多得意嘢。唔係啩，AKB48海報？」
 
呢樣連我都唔知，平時我唔喺房，就喺廳，阿傑又唔會推我入佢間房嘅。間屋豆潤咁細，輪椅唔易行。
 
阿如參觀完一輪，終於行到入我房。
 
我嚇咗跳，勉強做好嘅心理準備，又煙消雲散。
 


我仲以為佢係啲四、五十歲嘅阿嬸，對我呢挺人同情心泛濫。點知佢竟然係個二十出頭嘅後生女，仲幾靚女㗎。我即刻覺得好自卑，好想匿埋。
 
「Hello！阿傑大佬。」佢笑笑口，望住我。
 
「Hi……」
 
「咁開始啦。」
 
「不如下次先啦……」我好想縮沙。
 
「做咩咁驚呀？阿傑話佢過咗數㗎喇。」佢行埋嚟，幫我除咗條褲。佢個身控到好埋，我聞到一陣女人香，對眼唔知望向邊好。
 
佢將我隻右手，放上佢對波度，原來佢冇戴Bra。
 
就嚟三十歲人，我終於摸到女人對波，真係好舒服。順住我輕撩，佢開始嚟料，波細唔緊要，最緊要識叫。


 
聽住佢細細聲嘅呻吟，我覺得個腦充曬血，諗唔到嘢。
 
但一聽到佢下一句，我當堂俾人潑咗盆冷水。
 
「阿傑話你隻右手仲有感覺，係咪好摸先。」
 
我冇答佢。佢開始摸我，溫暖嘅觸感令我覺得被世界接納，當然有時佢會摸到我冇感覺嘅部位，但望住佢對手嘅動作，我嘅身體彷彿逐漸重生。佢慢慢摸到我下面。
 
望住連接下體嘅導尿管，我突然醒起，我由今朝到而家都未小過便。我控制唔到膀胱，要定時放尿，唔係就會損害內臟。
 
「唔好意思，我要小便，麻煩你出一出去先呀。」
 
佢皺咗下眉，咩都冇講就出咗去。
 


估唔到埋門一腳……唉……
 
我拎出床下底嘅儀器，之前一直都係靠自己用導尿管放尿。但唔知係咪頭先摸佢對波太用力，我隻右手竟然冇曬力！
 
（待續）

鍾意嘅，請LIKE 我Facebook :D 你嘅支持推動到我繼續作多啲故 :D
 Facebook專頁：https://goo.gl/FVN3Pb

#余該隱 #短篇 #小說 #廣東話 #短篇狂想 #短篇小說 #性需要 #手天使 #人權 #只想被愛 #也想做愛