有時候,朋友就是這樣。如比起多說幾個無聊得極致的廢話大道理,倒不如當上自己最強大的後盾。

「講咁多做咩呀,星期五就係水運會,操好水未呀?」我和肥正同為學校泳隊成員之一,雖未在學界比賽上留名千史,但要在校內攞得幾個奬項,絕不是難事。

「你知架,我唔係要操水,而係……」肥正的話還未說完,雞脾姐突然插嘴﹕「減肥呀嘛。」

「嘩﹗你又偷聽我地講野呀?」

「其實你到底聽埋聽埋知道我地幾多野架……」我愈想愈心寒。



「頂你地三條友講野可唔可以細聲啲,朝早好眼訓呀﹗」雞脾姐揉揉雙眼﹕「你地講既野咁冇營養,聽嚟把鬼咩﹗」

「話說,cynthia鍾唔鍾意搞吓啲浪漫野?」看來肥正又想到了什麼屎主意出來。

「邊有女仔唔鍾意浪漫架,條女仲要讀va喎,直頭浪漫主義啦。」雞脾姐乾脆坐直腰板,參與話題。

「不如咁啦,星期五比完賽之後,你送塊金牌俾佢,同好深情咁同佢講﹕你響我心目出,永遠都係第一。」

不知為何,聽罷我胃腸傳來一股嘔吐感,幸好我還是生吞下去。



「會唔會老土咗少少?」我已經把心中的話包裝得很好從而道出。

「橋唔怕舊,最緊要受溝﹗」

「又唔係唔得既,不過嗰句說話可以唔洗理,我驚條女聽完之後會俾返塊金牌你。」雞脾姐給予了 一個頗為中肯的意見。

可是,我們都算漏了一個重點。

而個重點,亦令到整件事收晒皮,係完完全全地收晒皮。
----------------------------------




「屎忽你除衫,之後轉個背面俾我呀。」水運會當天,cynthia突然提出一個令我有點難堪的要求。

「你想點呀?」

「快啲啦﹗」只見cynthia把從背包中掏出一支油性筆,我便大概了解她想做什麼。

「寫好未呀……」轉眼間,cynthia已在我身後不知寫了什麼。

「得啦,你記住今日一定要贏呀﹗你記得你講過啲咩架﹗」那天與肥正和雞脾姐討論過後,我便立馬跟cynthia許下這個承諾,而她也欣然接受。

「喂,你地一人拎一副眼鏡啦﹗」kitty給了我和cynthia一副紅色的眼鏡外框,沒有鏡片,雖說外表醒目,但是……

「戴咗之後好似傻仔呀﹗」cynthia見我戴後笑得彎下腰來。

「你都要戴呀﹗要傻就一齊傻﹗」見狀,我一手搶過她手中的眼鏡,再為她戴上﹕「哈哈你都好似傻女呀﹗」



cynthia拿起電話並打開拍照模式﹕「屎忽你傻啲﹗」

隨後,我走進了鏡頭範圍之內,擺出一副傻小子的表情,與cynthia拍下我們第一張合照。

有趣的是,cynthia與她的前度也是在這游泳池拍下一張合照,儘管老地方依舊一樣,但裡頭中的人物再不一樣。

我要取替既,並唔係佢既前度,而係要取替佢前度既位置……

我要做cynthia既男朋友﹗

「喂,第一項游一百蛙呀,仲唔快啲去熱身﹗」肥正從KITTY手中拾過泳鏡,示意一起到池中熱身。

今天,我就要在CYNTHIA面前一展我麥俊傑的長處﹗



熱身過後,因為我和肥正同時報名參加一百米蛙泳,所以都乾脆坐在召集處,等待著比賽。

「係咪兄弟先?」

「你咁講得,我打死都唔認你係我兄弟。」肥正把最後一口的香蕉嚥下去並隨手一拋。

「送金牌呢條橋又係你諗既,幫人冇理由唔幫到底既﹗」肥正游泳技術其實與我相差無幾,因此我也未有十足的把握。

「咁樣樣呀……」肥正若有所思似的,不知又在盤算著什麼鬼主意﹕「如果係咁既話,你就當係欠我一個心情,之後無論我叫你做咩你都要做,得唔得先?」

響呢個時候,我有得答你唔得咩?