每個人，都試過鍾意一個讀VA既女仔: 第四十四章

「喂，咁到底係邊個俾你架？」
 
「做咩呀？呷醋呀？」
 
「我講過我要追你架嘛，咁我都要睇吓我有咩對手架。」我表現出一副準備好戰鬥的神情。
 
「屎忽﹗」CYNTHIA輕拍我額頭﹕「冇人追我呀，呢條頸巾係我老豆織俾我。」
 
「邊有可能呀，我睇得上眼既野應該好多人追先係架﹗」聽到她如此一說，我的心也確實了許多。
 


「你當我係超市啲貨呀？睇得上眼……」
 
突然，放在桌面上的手機震動了數下，發出的聲響大得讓身旁的人都不禁瞄向我。
 
「唔好意思……」
 
是IG的一個信息。
 
Miss.Wat想追蹤我的IG？
 


「喂，你個VA老師話想FOLLOW我喎，俾唔俾呀？」這問題，我想還是要弄清楚一點最好。
 
「吓？佢又會冇啦啦FOLLOW你既？」CYNTHIA也好奇的探頭問道。
 
「唔洗問啦，一定係之前見到我同你，依家諗住FOLLOW我睇吓有冇花生食啦。」
 
「佢先冇你咁無聊呀﹗你咪俾佢FOLLOW囉。」
 
我IG中，是有幾則相片都是描述著我和CYNTHIA，大概也是一些幻想片段和表白句子吧……儘管別人看著自覺嘔心，但局內人也自然覺得窩心……
 


起碼我係咁諗先。
 
「嗱，你話架，到時佢真係拎我IG啲野嚟笑你既話，你唔好賴我呀﹗」
 
我沒多想，隨即按下「確認」一掣。
 
「聽緊咩歌呀？」不單頸巾，我倆就連耳機也是一併使用。
 
「你搞到我地好似連體嬰咁……」CYNTHIA對我今天的表現顯得有點詫異。
 
「咁我咪可以呢世都痴住你唔放囉﹗」我更進一步，一下子攬著她。
 
其實我內心的小劇場是極度害怕CYNTHIA會一手推開再對我生厭……
 
但我只能說，衝動再次勝過理性以及一切。


 
「喂，好多人望住呀﹗」CYNTHIA口裡說不，但身體卻未有做出任何反抗動作。
 
「佢地羨慕我有個咁好既女朋友啫﹗」
 
「喂，我幾時做咗你女朋友呀？」哼，還是未能得逞﹗
 
「遲早都係啦，依家嗌住先，到時聽慣咗就唔會覺得奇怪架啦﹗」
 
「你又知你一定做到我男朋友？」
 
「睇你依家都仲未推開我就知啦﹗」我忽然愛上了自修室這地方。
 
「屎忽你真係好無賴﹗」最終，CYNTHIA還是一手給我推開﹕「你好似核突膠咁，一野痴落嚟﹗」
 


「一世架啦。」為什麼她給予我的花名，字眼上是多麼的貶義，但我總是能從字句中看到粉紅泡泡？
 
自修室又再次回到寧靜，我想收回剛剛﹕「愛上了自修室這地方」這一句。
 
「喂，你要溫到去邊架？」
 
「差唔多啦，做咩呀？」
 
「不如陪我行陣書局呀，中文有份閱讀報告考完試之後要交。」我這次要用人格擔保，是真的。
 
「咁行啦。」回過神來，CYNTHIA已經開始執拾自己的筆記。
 
又會……咁爽快都有既？
 
「喂，你想買咩書呀？」步進書局一會兒後，CYNTHIA見我還未拾過一本書便問道。


 
「老師話咩書都得，所以咪睇吓邊啲有興趣囉。」我轉過頭，發現她早已不在我身旁，而是一隅的旅遊書刊專區。
 
「做咩呀，想去旅行咩？」
 
「我一直都好想西雅圖架﹗」她手頭上的旅遊書，正是美國西雅圖。
 
「西雅圖？有咩玩架？」在我腦海中，西雅圖唯一的關聯字就是一套電影
 
北京遇上西雅圖。
 
「嗰到冇乜野玩架喎，不過我好鍾意當地既文化同埋環境。」她翻閱一頁又一頁，突然整個人的重心交到我身上，害我必須站得更穩。
 
佢……成個人依靠住我﹗