我地行到去一個比較僻靜既角落頭, 大舊見無咩人係附近,先開始講:「頭先我同泥頭去check數, 結果一如所料,所有存款都清空哂。當諗住番來同你地滙合果陣, 有一個專搔人買黃牛飛既MK仔行左過來…」 

「嘿, 果個仆街!」泥頭嬲到咬牙切齒。 

「唔好打斷我住。」大舊繼續道:「個MK仔行埋來就問︰『哥哥仔, 過大海呀, 呢度買平啲喎, 又唔使排隊。』我見無錢, 就同佢講遲啲先。佢唔放棄, 繼續sell:『遲啲無家啦, 最多我俾豪華位你地喇, 又可以多個杯面食。』泥頭聽到好唔耐煩, 就話:『都講左唔撚使咯, 食杯面叫mud撚野豪華位呀!』點知個MK仔見到泥頭既樣, 思索左一陣就興奮到成個跳起,大嗌:『呢期我掂啦, 你班仆街仲唔死!』佢用部手提影左我地相之後,擰轉頭就起勢咁跑。我同泥頭見唔對路就即刻追上去。之後發生既事你地都知啦。」 

泥頭慶烚烚道:「我發過毒誓, 條眉一日唔生番出來, 我就一日唔影相。依家咁樣俾個MK仔偷拍,如果一個唔覺意佢擺左張相上facebook, 我以為仲點溝女!」 

「就係因為咁, 你就追人九條街?」發仔問道。 





「講到咁撚大方, 你試下我將你棚牙放上網吖?!泥頭道。 

我唔知好嬲定好笑, 道:「泥頭戇鳩先追人者,大舊你又會陪佢癲既?」 

「照我睇, 件事唔係咁簡單。」大舊皱眉道: 「 所以頭先趁泥頭俾啲職員擋住果陣, 我第一時就搵左個位影低條友個樣。」 

大舊俾左部手機我地各自傳閱。

張相係大舊係閘口出面偷左個角度影既。相中既MK仔一身潮童打扮, 全身頸鏈手鏈褲鏈, mud鏈都有, 額前純金色既斜蔭, 長到遮住哂自己隻右眼。而最令人心寒既, 係佢唔驚大舊影佢相不特止, 仲要對住鏡頭露出一副奸狡邪惡既微笑, 笑到成個鄭子誠咁, 令人一睇就覺得佢肯定係有啲咩陰謀。 






「其實呢啲髮型既人係點睇野既呢? 無左隻眼好難分距離感家喎。」發仔揞住自己隻右眼道。 

「車, 以前既海盜咪又係照樣行船出海。」泥頭道。 

大舊完全無視佢地既對話, 道:「雖然唔知條MK點解要影我地相, 但係佢一定係認得我地先會咁做。依家佢撘船過左澳門, 我有一種好不安既感覺, 唔知仲應唔應該去…」 

講起不安既感覺, 我突然間醒起啲野, 道:「我記得今朝銀行打來, 話我個戶口入面啲錢唔係係香港攞出來家, 咁睇怕, 提款既地點好可能就係澳門喇。」 

「嗯, 咁講我地尋晚去過澳門既可能性好大, 但係頭先個MK仔話我地死硬, 又係咩意思呢?」大舊低頭尋思。 





「唔…」一班人陷入沉默。 

終於, 泥頭忍唔住道氣, 豪邁道: 「屌, 呀叔我8號風球行住雷咁出世家, 有乜撚野風雨未見過! 理得佢MK仔定係澳門佬, 我來一個殺一個, 來兩個殺一雙!」 

紅棍都走過來攬住我同大舊既膊頭道:「我地洗濕左個頭, 點都要去家啦。」 

「你錯啦, 個頭濕左可以吹乾佢…」發仔未講完就俾泥頭封住左個口。 

雖然對面海有好多野都係未知之數, 但係未搵到孱仔…keep果張飛之前, 我地點都唔可以放棄。 

「好! 死就死啦!」我同紅棍撃拳壯膽。 

大舊亦好似下定左決心, 道「買飛! 過大海!」 

泥頭見我地重拾鬥志, 興奮道:「無錯啦, 正所謂唔係猛龍唔過江, 唔係豬扒都唔化粧!」 





…… 

「行啦, 柒頭。」發仔推一推泥頭道。