雖然我知道如果爆發喪屍的話，我會好快變成喪屍，但我估唔到會係咁快: 【 雖然我知道如果爆發喪屍的話，我會好快變成喪屍，但我估唔到會係咁快 】 【 下 (上) 】
點解？點解？點解呀偉可以咁醒？直到呀穎打到好攰，佢先停手，佢絕望咁坐左係地下。而呀偉都比呀穎打到冇曬力，坐埋係地下。我好無奈，我諗過自己會點死係啲喪屍口下，但我冇諗過會咁樣比啲豬隊友累死。望住維修站月台上面來來往往既喪屍，我地已經失去左排除萬難黎到呢到既原因。我仲有咩方法可以自救呢？但係其實岩岩先呀偉做廣播既時候，入面一啲動靜都冇，冇人出黎，咁樣我地可解讀為入面冇受到感染所以啲人匿埋曬係入面，定係啲人變曬做喪屍先唔識出黎呢？門口距離我地有小小遠，但想去到入面都唔係冇可能，我地可以用返岩岩先個個方法，如果成功入到去，入面又真係冇喪屍，咁我地就可以以此為暫時安全既避難所，再睇下入面有冇咩可以同外通訊既設備可以對外求救。咁我同呀穎已經比呀偉既「能力」嚇怕左，我地都唔想出去，於是我地用群眾壓力(其實都只係我地兩個人)去叫呀偉先探路。咁礙於岩岩先的確係因為佢我地大家先會錯失成功逃命既機會，或者呀偉佢自己於心有愧，又或者佢自己都好想盡快逃走返出去，所以佢都冇太大既抗拒，就應承左我地佢自己出去探路先。咁我地都唔係話就咁推佢出去送死既，我地都幫佢準備好。亦係調好我地既車頭對住個到既門口，然後再開車尾既廣播將啲喪屍引到車尾，而呀偉就趁呢個時候由我地車頭衝去個邊門口到開門入去。佢好快咁拍卡，然後推門入去，入左去之後佢就好快咁關返度門唔比啲喪屍追入黎，因為啲喪屍一見到佢就衝埋去佢到。係啲喪屍散開左之後，我同呀偉又諗到一個問題，就係如果入面真係安全，呀偉又樣通知我地呢？佢又唔可以貿貿然走返出黎。於是我地唯有持續開住車尾既廣播引啲喪屍係車尾停留，睇下呀偉會唔會搵機會出黎通知我地。我地一直等，一直等，呀偉都冇出到黎，我心入面就有好多好多既想法︰會唔會入面有喪屍，呀偉已經死左 ; 又會唔會呀偉唔敢出返黎，所以索性留係入面唔理我地既死活。如果呀偉一直都冇出到黎我地應該點做好呢，搵過另一種逃生方法定係我地都入去搏一搏呢？我諗左好多好多。
我諗都有可能係呀偉搵唔到機會出黎，於是我地地做左一個大廣播，希望佢係入面冇事的話會聽到︰「呀偉，呀偉！你係入面安唔安全呀？我地會持續開住車尾既廣播，所以入面安全的話你可以放心開門話比我地知，啲喪屍比啲廣播引到好遠，你可以唔使擔心，又或者你可以就咁開一開門，再關返門就ok 啦！我地自己見到會搵機會入去架啦！」我地重覆左個廣播3 次，之後我地就眼定定咁望住門口，睇下入面有冇咩動靜。過左唔夠3 分鐘，我地就見到呀偉佢開左三分之一既門，探左半個頭出黎，向我地做左個過黎既手勢，然後好快咁縮返入去關門，我地見到咁樣都笑左出黎，除左係因為見到佢呢個膽小既樣而笑左出黎，亦都因為得終於得救而笑。
呀偉咁樣姐係代表入面係安全既，於是我地就即刻準備用同樣既方法衝埋入去。呀穎跑係我面前，佢用自己張職員證拍卡開門，點知當我地見到入面既境像同我地想像中差太遠，我地一開門只見到呀偉瞓左係地下，比兩個喪屍哽食緊，而係我地開門個一刻，個兩個都發現左我地，向我地跑過黎，咁我本能反應，第一時間拉左拉呀穎就即刻掉轉頭，諗住返返駕駛室到，而呀穎都好醒咁關埋到門先跑如果唔係的話，個兩隻喪屍咁近追上黎我地一定死梗。好好彩地，我地係近車尾啲喪屍追到我之前跑入返駕駛室到，但都係有好多喪屍衝左上黎，甚至撞爛左我地側門個窗，呀穎就即刻開車擺脫班喪屍。啲喪屍隨住我地開車跌曬落地，之後我地就不遠處停左落黎。車停左之後我就見到我地側被撞爆既窗都佈濛濛滿喪屍既血，係黑色既，真係何奇恐怖！我地又一次由天堂跌左落地獄。
基本上我同呀穎比喪屍嚇左成日，勞動左成日，然後又一啲水同一啲野食都有落過肚，已經有啲筋疲力盡，我地亦對而家既境況感到澈底絕望，我地冇再諗，亦冇再提出任何逃走既建議，只係坐左係到等，可以話係等人黎救，亦可以話係係到等死。
到左第二日，我已經覺得自己視線模糊，個口勁乾勁口渇。可能因為心靜，我竟然聽到出面車卡播緊既新報導。
「香港現在喪屍疫情嚴重，香港政府勸喻市民留在家中，不要外出，以免受到感染。政府指喪屍病毒係透過血液接觸傳播，現政府已研究出疫苗將喪屍回覆人狀。會派出軍隊向所有喪屍注射疫苗，不過現全港有大量喪屍，要全面注射都需要一段時間。」我聽到呢單新聞好開心，姐係我地可能有得救啦！於是我叫已經冇氣冇力既呀穎將駕車駛返去站到，咁樣啲人先容易啲發現我地，幫我地注射疫苗救我地。
我地將架車停左係九龍塘站，係個到又停左兩日，但等左兩日都唔見有人黎救我地。我只聽到出面既電視機不停重覆住個個疫苗既新聞，政府既呼諭，一次又一次重覆既新聞，一次又一次激勵住我去支撐住我虛弱既身體。 我地已經三日冇食過野，冇飲過水，之前上網睇話人地話如果人唔飲水3日就會死。已經攰到冇曬力氣既我，心入面係到諗︰「我係咪就黎死啦！究竟幾時先有人黎救我地，我又等唔等到人黎救我呢！再係咁落去，就算我地唔比喪屍咬死，我地都會餓死，都會因為脱水而死，聽講監生餓死係好痛苦架，而我而家已經覺得好痛苦。」
而瀕臨死亡既我竟然突然諗到一個好癲既主意，就係既然我地咁等落去可能會餓死，不如我地自己變做喪屍，政府都話會有疫苗將啲喪屍回覆原狀，咁我地變成喪屍又有咩所謂喎，仲可以走出去食人，唔怕餓死。我再望左望側門啲屍喪之留底既血漬，我繼續係到諗，我地可以用側門裂左既玻璃割個傷口出黎，玻璃上面有黑色既喪屍血，我地可以透過咁樣故意比自己受感染，唔使比其他喪屍咬到爆曬血就可以成為喪屍，身體又冇重大既傷害，之後我得救復原既機會又大左啦！我將呢個建議講左比呀穎聽，呀穎聽到之後都覺得呢個方法可行。
之後我地一齊將手放左係玻璃上面。
「一、二、三。」我地同時將手大力割左落玻璃上面，我地既力度都令自己既手流血。但我地冇即刻變到喪屍，我地都係到諗呢啲咁弱雞既傷害應該都要小小時間我地先會發到變喪屍。於是我地一齊望住車頭既玻璃所投射出黎既自己，觀察下自己既變化。只係過左兩分鐘左右，我就見到呀穎啲青筋開始走出黎，我亦聽到佢呼吸開始急速，但我自己就冇物變化，於是我就開始有啲驚啦！如果呀穎變喪屍先，然後咬我，咁我咪會受傷，咪冇咁易得救囉！
點算好？點算好？我開始好驚好驚，我一定要係佢變成喪屍前做啲野先，如果唔係我就死梗啦！同時，我亦係到諗我地明明講好一齊變喪屍，但我而家暗算佢，我咪好衰仔。但時間一分一秒咁過去，我腦海不止浮現我父母個樣，亦都浮現我咁耐而黎睇過既恐怖片畫面，通常啲配角就係死係佢地猶豫個刻，仁慈只會累死自己。於是我把心一橫，指住門外面，叫左叫仲有意識既呀穎。
「呀穎！你睇下個到！」然後趁佢望左過去，我就一野開左度門將佢踢左出去，然後關埋門。而正正就係我踢佢出去個一刻，我見到佢既眼白完全變白曬，個刻佢就完全變異成功，完完全全咁變左做一隻喪屍。咁我都安慰自己，呀穎係變左做喪屍我先踢佢出去，咁佢而家都冇受傷啦！而且如果我唔踢佢出去，死個個就係我。再過多5分鐘到，我終於感覺到自己有啲異樣，要變喪屍啦！我有啲緊張，因為我要係自己完全娭異之前開左度門，如果唔係我只會成為一隻被困既喪屍，所以開門既時間要捉得岩岩好，唔可以太早，亦唔可以太遲，太早未變曬喪屍會比其他喪屍咬，太遲又會被困，因為喪屍唔識開門。
我唯有透過玻璃望住自己既眼珠既變化。
係佢就黎變曬白色個一刻，我開左度門.......
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/