由嗰日起，我扮成TB媾女: 19

上到巴士，放好行李之後，我地就搵咗個雙連位坐低。

Macy鍾意坐窗邊位，佢話啲陽光由側邊打落嚟，自拍靚好多喎。

咁ok啦，最緊要佢坐得舒服。

但直到架巴士駛到下個站，有兩個男人上車，坐咗係我地隔離，佢就開始周身唔自在。

「我地不如坐後少少吖」佢話。





「吓？點解啊？」

「唔好問啦...」

然後佢就拉咗我去後面嘅位坐。

跟住隔咗無耐，又有個男人坐咗埋嚟。

佢再次起身「我地調去後面坐好無啊？」





我開始感到有啲煩嫌「又調？唔好喇掛」

佢雙手合十咁去哀求我「求吓你啦，最後一次吖...」

我心軟「唉...好啦」

最後我地坐到去巴士嘅最邊角，差唔多連行李都見唔到。

Macy好大力咁深呼吸咗一口氣，然後話「呼～你聞吓，依喥無哂啲臭男人，啲空氣清新幾多」





我真係無佢咁好氣，都on9嘅。

「其實你咁樣，避得一時都避唔到一世嫁啦，依個世界此終充斥住無數咁多個男人」

「但如果情況許可而我又無去做，我一定會嬲死我自己」

我搖一搖頭「真係唔明你，你咁憎男人，點解又會鍾意bigbang嗰五條矮撚呢？」

「我鍾意佢地嘅音樂姐，都無話鍾意佢地個人。而且我都唔係咁極端嘅，喺音樂面前，我可以暫時放低性別仇恨」

我嘆咗口氣。

既然佢咁樣都可以話自己唔夠極端，我諗我都無嘢好講喇...