弊啦弊啦,俾佢聽到哂?  

我:「eh…」

Cody:「點都好啦,一陣先再講呢個話題啦我地,夠哂鐘上堂。」

我:「哦…好呀…」

屌啦星,咁樣我反而仲驚添…





女班長cody乜都無講,只係繼續捧住一疊簿行,而我就傻傻咁跟住佢去行。

一直行到差唔多到班房,佢先停低,仲擰轉頭望住我。

我:「係咪…有乜事?」

Cody:「你幫我拎呢疊簿。」

我:「哦哦…」





咁突然都有既…

佢將手上個疊簿交左俾我,又繼續行返去班房。

佢到底係度諗乜架…

當我地返到入班房個陣,教中文既Miss Wong已經點完名,拎住本點名簿行緊去門口。

Miss Wong:「你地去左邊,咁遲先返。 」





Cody:「我去簿櫃拎簿,佢見到就黎幫我手,所以遲左返。」

Miss Wong:「好啦,咁快d放低疊簿返埋位,我地開始上堂喇。」

原來佢叫我拎住疊簿係咁既意思…呢個女仔心思細密到好似Ellie咁喎…

以後同佢相處都係要小心D好,但好似已經太遲。 

之後我都專心上堂,將其他野暫時放埋一邊先。

同上晝一樣,剩餘既呢兩堂我都覺得過得好快。

話咁快就上哂一日既堂,感覺真係唔錯,好開心。

大家有講有笑,雖然有互串,但起碼唔會係好似聖所羅王咁既階級環境。





唉真係希望一開始就黎呢度讀書,點解老母係都要送我去聖所羅王讀,學費又貴又要俾人睇唔起。

不過..如果我無係聖所羅王讀過書,又點可以有今日既我呢…

Cody:「喂。」

唉吖,我岩岩諗到入神就俾人打斷左,真係大煞風景。

我:「係,有乜事。 」

Cody:「講返頭先lunch time既事,你同個幾個女仔好似好熟咁?你地係…」

嘩你既語氣十足十d女朋友check男朋友咁喎,我同你最多只係同學啫,我無乜必要同你交代咁多喎。 





因為呢個原因,令我遲疑左一陣,無即刻答佢。

不過最後,我都係細細聲咁講左「女朋友」三個字出黎。

佢似乎都feel到我唔想比人知呢件事,佢自己都用返差唔多既音量回應我。

Cody:「咁藍洛晨呢? 」

我:「啊,呢個就係之前因為小小事識既,我轉黎呢度都係佢安排。」

Cody:「哦…咁你同藍洛晨…啊算喇無事啦。」

嗯?佢想問…

阿希:「喂阿明!! 」





哇屌嚇撚死我!!無啦啦係我背後大叫! 

我:「咩事呀屌,無啦啦係人地背後大叫! 」

阿希:「Sorry囉,喂我地去開會咯。 」

我:「開會?有乜會好開呀?我地又唔係班會又唔係學生會。」

咦咪住先。

我諗左一諗,我好似的確係一個「會」既成員… 

阿希見到我咁既反應隨即奸笑,好似一切盡握係佢手中咁。





阿希:「無錯!就係我地日本文化協會既第一個會議啦哈哈!」

我:「吓學生會唔係過多兩星期左右先宣布結果咩?」

阿希:「嘻,有乜所謂啫,最緊要開心!我地已經有六位會員啦!學校一定會批既!」

「啊我去通知其他人先,一陣班房門口等!」

佢真係幾似阿惠。

啊唔記得左女班長d野添。

我:「係咪仲有野想問?」

Cody:「我無野問啦,你行啦。」

我:「eh…咁頭先我地講既野…」

Cody:「得啦,我會當係秘密,唔會同其他人講架。」

佢份人應該信得過,應該唔需要擔心佢會講出去。

我:「好,多謝你。」

之後我就此同Cody別過,行左去班房門口等阿希。

好快阿希係返左黎,仲帶住三個人,分別係浩賢,黑仔仲有…

Kathy?