今次Party同以往既都好唔同,一入去就已經黑媽媽,只係有好微弱既紫色燈光,伸手幾乎不見五指咁。

會場入面仲有好多人戴哂面具,真係被人扑左棍都報唔到仇咁。

咁樣既佈局,雖然係幾符合萬聖節既主題,但係我眼中呢個簡直係一個Gmod Deathrun既map咁,處處都有可能有陷阱咁。

我:「你地幾個,記得跟實我。」

Sarah:「嗯…呢度好似好奇怪咁…明明早兩年都唔係咁架…」





Anna:「邊個夠膽對我地郁手郁腳我肯定會踢斷佢隻腳。 」

我地幾個一邊講一邊摸黑前進,終於俾我地搵到張bar檯仔,我地全部人都擠係呢張檯仔。

大家姐:「嗱,大家呢兩個鐘記住唔好走開,我地一留夠兩個鐘就走人,好無?」

大家姐呢個主意大家都讚好,於是大家開始圍住張檯仔玩電話,不問世事。

我地幾個於是就成為左會場入面既異端,好多人經過我地檯既時候都係咁望住我地。





加上電話mon既光照到我地個樣,係一個周圍既人都戴面具既環境下,咁令到我更加不安。

D人戴既面具黎黎去去都係個幾款,應該係係呢度拎架喎。

我:「大家姐,我行開一下,好快返。」

大家姐開頭聽到我咁講都愕左然,但佢好快就應承左。

大家姐:「好,但記得自己小心d,快d返黎。」





得到大家姐既批准之後我就即刻動身,準備四圍行下睇下可唔可以拎到d面具返黎。

但我行左一步,就有人拉住在我。

係Ellen?定係Ellie?太黑分唔到係邊個添。  

「我同你一齊去啦。」

聽聲先分到原來係Ellie。

我無拒絕佢,由佢拖住我係會場周圍搵。

行左一陣,果然比我搵到D面具,一棟棟咁放哂係度。

Ellie:「有左呢D面具,應該就無人認得出我地啦。」





Ellie真聰明,一下就知道我想點。

我:「嗯,返去個陣順便拎D野飲野食比佢地啦好唔好?」

Ellie:「好主意,飲下食下時間好快過。」

於是我地兩個就捧住好多野返去我地張檯,但返到去既時候,我發現有一個我唔識既人係度同緊大家姐佢地講野。

果個人好快就注意到我同Ellie,佢即刻行左埋黎,仲除低個面罩,俾我睇到佢滿臉笑容。

係一個我唔識既男人。

「你一定就係阿明喇可?」
我:「我係…你係…?」




男:「你好呀,我叫Marcus,我一直都好想見下你,今日終於都有機會。 」

我:「想見我..?」

Marcus:「係呀,你咁出名,係人都會想可以見你一面架啦。」

我:「我出名?點會呀我只係一個普通學生。 」

Marcus:「唔好咁謙啦阿明,你邊會只係一個普通學生呀,你唔知你有個外號架咩?七…」

二家姐:「阿明,陪我去行下。」

Marcus句野只係差少少就講完,二家姐都夾硬拉走左我,仲好用力。

我地開始遠離大家姐佢地,我甚至已經見唔到佢地。





我:「二家姐?二家姐!」

聽到我叫左佢兩次佢先識停低,仲好惡咁望住我。

二家姐:「做乜呀! 」

我:「唔係呀,呢句說話應該係我講先岩,我地離大家姐佢地太遠啦。 」

「同埋做乜野要拉我走?係咪個Marcus講既野我唔可以聽?」

二家姐:「唔係,只係…唉!你係咪又係度期待緊個D事會發生?你係咪睇tvb劇睇上腦? 」

「點解你唔可以乖乖地照我既說話去做,專心好好照顧Sarah佢地?」





我:「我有…咦? 」

就係我同二家姐爭執既時候,我地既周圍已經起左變化,但我地居然好遲先發現到。

有燈打左係我地腳底既…?

我:「喂二家姐,腳底…」

二家姐:「啊我注意到,應該係D所謂既餘興節目喇。」

「有請個位小姐上台做我地魔術師既助手!大家俾d掌聲呢位小姐好唔好? 」

我:「二…」

我只係講左一個字,全場就已經響起掌聲,嘈到我想講野都講唔到。

我望一望台上,已經有一位幪面既魔術師企左係度,佢身邊仲有一D架餐。

我有唔好既預感,想去拉住二家姐,但佢已經行緊去台個邊,攔都攔唔住。

我而家可以做既野,唔通就只有祈禱?

二家姐係一片掌聲之下走左上台,魔術師仲引領佢走上一個十字架,用鎖扣住二家姐既手腳。

但我係呢個時候我注意到二家姐既表情終於出左變化。

係魔術師為佢扣上鎖扣既時候,佢突然變到好驚。

「好好享受下為你準備既餘興節目啦,七星殺手。」

突然有一把怪聲係我耳邊出現,但當我擰過去既時候...

我身邊居然無人。
 餘興節目…係指二家姐!?

要快d返去搵大家姐佢地先得!

我無視單位碰撞,一口氣跑返過去大家姐佢地個邊,途中仲因為撞到人比人用粗口鬧左兩句。

到我終於返到去大家姐佢地身邊個陣,佢地六個全部都呆左咁望住台上面既二家姐。

我:「大家姐!」

大家姐:「阿明!?點算好呀點解會偏偏揀中阿May架! 」

大家姐一見到我返左黎就即刻好著急咁走埋黎我度問我應該要點做好。

但老實講,顧及場合我地又唔可以就咁衝上去帶走二家姐…

我:「而家我地都唔可以做咩住既…」

Anna:「但係佢地擺明係有心搞二家姐喎..! 」

Ellie:「不過呢D野唔係在場既所有人都知架嘛,如果人地咩都未做我地就去帶走二家姐,我地反而會招人話柄啊。」

Ellie一下講中左重點,現實係我地明知呢個係一個為二家姐而設既局,但為左大局我地係唔可以亂黎,真係諷刺。 

「好啦,鎖已經扣好哂,唯一既鎖匙亦係我手上,咁我地既魔術師Leo,你可以開始啦。 」

主持人拎住一串鎖匙,行左埋台邊。

至於個位幪面魔術師就伸左手去十字架旁邊既一個籃,最後仲拎住幾條蛇出黎。

大家一見到蛇都嘩左出聲,二家姐都有相似既反應,睜對對眼大一大咁望住D蛇。

Sarah:「二家姐最驚既就係蛇… 」

竟然!? 

魔術師:「好啦,而家我會將呢D蛇放係呢位小姐身上,再變走佢。 」

大家姐:「將D蛇放係阿May身上…?慘啦…今次無啦…」

大家姐嚇到企唔穩,仲要Yui扶住。

如果二家姐一叫出聲,我就即刻跑上去台度救走佢。就咁話。

Ellie:「阿明,戴住佢先啦。」

Ellie遞左一個頭先我地拎返黎既面具比我,係喎用佢咪無人知道我既身分囉,Ellie真係聰明。

咦,呢個形狀…哇係蝙蝠俠? 

岩哂啦。 

係我接過面具既一刻,個魔術師就開始放蛇上二家姐度。

二家姐表情雖然唔願意,但佢並無嗌出黎,忍受住三條蛇係佢身上滑動。

諷刺既係,會場入面既人見到咁居然拍哂手,好似覺得個表演好好睇好刺激咁。

魔術師:「好啦,大家一齊數三聲好無?」

呢個魔術師炒熱氣氛的確有一手,全場既人都和應佢,跟佢一齊數。

「三!」

「二!」

「一!」

之後,全場既燈居然一齊熄左。

我就知道唔會有好事! 

我急忙戴上個蝙蝠俠面具,準備跑上去帶走二家姐。

我只係向前踏左一步,台上既燈就已經著返哂。

但魔術師已經唔見左人,而二家姐身上…

居然再多左幾條蛇同蜈蚣!? 

我:「屌! 」

我忍唔住,一支箭跑上台。

跑上台既途中,我有望下其他人既反應,一個二個都只係O撚哂嘴,野都講唔出咁。

不過多得咁,先無人攔住我,我好順利就上到台。

個主持人都係見係我上左台先識反應,但都只係揸住支咪走埋黎問我想做乜。

我諗都無諗就一拳打左落條友個鼻度,再一手搶左佢手上既鎖匙。

拎到鎖匙之後我即刻走埋去二家姐度,想即刻幫佢解開D鎖。

但走到埋去,我居然無辦法即刻解鎖。

我呆左咁望住二家姐,因為我從未見過咁既二家姐。

佢一臉委屈,仲成塊臉都係眼淚。

但儘管如此,佢都係無喊出聲,只係合埋眼鄒哂眉,揸緊哂佢兩個拳頭。

所以,我首先做既野唔係解鎖,而係整走係佢身上既蛇同蜈蚣。

其實我都好驚呢d野,但我呢一刻居然無感覺,只係想快D幫二家姐整走佢。

好快我就清走哂佈滿二家姐手腳既蛇同蜈蚣,而家就只係得一條蜈蚣。

呢條蜈蚣認真識食,居然纏係二家姐心口。 

我:「失禮哂。」

我細細聲咁講左一句,就合埋眼伸手去拎走條蜈蚣。

我仲唔小心hi到二家姐個胸…真係唔小心! 

我當然無去回味呢一下觸感啦,唔係呢個時候去回味啦係咪先。

我繼續我既任務,去解開二家姐身上既鎖,放返二家姐落黎。

二家姐成個人無哂力,挨左落黎我度。

二家姐:「你係…邊個?」

我:「I’m Batman.」

唔知點解我居然會chok哂聲哂扮Batman,可能因為呢個面罩刺激到我既中二病?

不過呢D細節無所謂啦,最緊要都係快D帶二家姐走。

我扶住二家姐,想趁呢個機會直接走人。

但我一擰轉身,重新面對台下既時候我先知道奶野。

個個幪面魔術師居然企左係台下既正中央,望住我地。

魔術師:「同佢講既一樣,只要咁做你就一定會上當。」

上當?

魔術師開始行埋黎,仲一邊行一邊除低個面具。

面具之下,原來係個個mk仔。

我諗今次真係正中佢下懷…我:「Move. 」

雖然我已經知道自己奶左野,但我知道而家已經唔可以怯,所以我決定死頂。

二家姐:「仲扮乜Batman吖on9…人地一早知道係你黎架陳煒明,放開我喇… 」

二家姐好細聲咁講完句野之後就推開左我,而家佢已經可以自己企到。

原來佢知道係我?咁點解仲問我係邊個?搞到我成個on9咁。

個mk仔行到去台邊,仲拎走左岩岩比我打左一拳既主持人支咪。

MK仔:「呀Batman,點解你要搞亂檔呢?我個魔術仲未變完架。」

仲未變完?你而家講乜都得架啦。

MK仔:「你整走哂D蛇我都算啦,你點解仲要打人?你打傷左我個Friend呀,唉陰公囉成個鼻都朣哂。」

「唉唔好講咁多,俾我地睇下你個真樣,睇下邊個咁夠膽係一個咁有頭有臉既Party搞事先。」

佢一聲下令就有幾個南瓜頭走上台,直接向我而來。

無錯,呢幾條友真係戴住個南瓜頭,我都唔知佢地做乜鳩。 

我應該點做好?束手就擒定係反抗好?

好似反抗到底型D wor…

我握緊拳頭,諗住作戰到底。

二家姐:「唔好理我喇,你諗辦法走好過啦,俾全部人知道你真正身份我地一定有排煩。」

我:「唔可以!我應承過大家姐要保護你! 」

我講完呢句就衝左上去,同呢班南瓜頭打。

俾人打過咁多次既我,已經同以前唔同了,我都學左少少技術。 

加上呢班南瓜頭一心只係想除我個面罩,攻擊性比較低,可以應付到。

一對幾,暫時都仲未有乜問題,不過咁落去始終都唔係一個辦法…

就係我猶豫既一刻,會場既燈居然一下子全部熄哂,就好似頭先變魔術個陣咁。

「走呀!!」

我聽得好清楚,呢把係二家姐把聲。

我自己都知呢個係一個絕好既機會,所以我即刻準備離開個台。

不過,我仲有野要做。

臨走之前,我憑印象摸黑走到去個MK仔企既位置。

MK仔:「你..! 」

係佢啦,食屎啦! 

確認到係佢之後,我狠狠咁向打左佢一拳,之後先走人。

由於一片漆黑,會場都好混亂,我除低個面罩,好容易就融入人群。

我仲憑記憶走到返去大家姐佢地個邊。

到燈光返黎既時候,我已經企左係Sarah佢地旁邊。

真係一個心驚膽顫既旅程。