我同Sarah「偷情」呢件事之後都比Ellen佢地話左好耐,係咁話我過分,唔公平。

無錯,只係話我,無話過Sarah一句。 

佢地既語氣講到我好似D金魚佬拐左Sarah去咁,仲要我唔明白點解要用到「偷情」呢個字,明明我同Sarah係情侶關係。  

不過由佢地,反正佢地都只係講下笑啫,講兩句就幾條友一齊卡卡聲笑,無所謂啦開心咪得。

Ellen:「係喎,後日就係旅行日,你地買左野未呀?」





Anna:「我班frd約我聽日放早去買喎,唔知要買乜呢?」

呀係,以前係聖所羅王個陣係大家夾完錢就直接去搵供應商或者到會訂野,唔需要自己落手落腳去買。

所以就算係我,都係第一次親自去買學校旅行要用既野。 

呀講開又講,佢地幾個係知道我地各自去唔同既地方之後又無乜大反應,我仲以為佢地會呼天叫地咁添。

咁快又一年嗱原來…而家睇返我地六個都叫做融入到新學校吖…





唔知阿惠佢地個邊又點呢?

Ellen:「喂阿明呀,我遲D想搞呢D聯校event呀你點睇?」

我:「你想搞咪搞囉,你先係學生會主席吖嘛大哥。」

Ellen:「車我都係問下你意見啫,我打算搵阿惠佢地一齊搞呀,Yui幫我安排緊。」

我:「阿惠?佢地仲係學生會咩?」





Anna:「佢地話無人敢選wor,所以佢地唯有搞個公投問d人支唔支持佢地連任喎。」

我:「結果呢?」

Anna:「仲洗問既,梗係大比數讚成啦。 」

我:「咁真係陰公囉,三條友又要繼續捱多一年。」

Ellen:「唔係三個啦,佢地都有搵左幾個低Form入學生會幫手。 」

咁都好D,真係想睇下阿惠而家個樣,肯定頹到爆啦。

我:「喂不如我地搵日又返去聖所羅王同阿惠佢地食飯?」

Ellen:「可以吖,不過遲下先算啦,最近學生會忙緊好多班際比賽同活動,我地唔係好行得開。」





我:「係既係既,等你地得閒d先~」

第二日,放早。

我就好似Anna佢地講既咁,俾阿希佢地叫左去幫手買野。

我:「喂係喎結果我地係同邊個一組?我指淨低個三個。」

阿希:「哦,咪佢地三個囉。」

阿希指一指街市門口,個度企左三個女仔。

Cody同兩個我地班既女仔。Cody:「喂咁遲架你地幾個。 」





黑仔:「Sorry呀,阿明囉,臨話行個陣先話要去廁所,搞到遲左。」

嘩你入我數,明明係你話急屎架喎。 

阿希:「喂阿明我係咪好醒,搵到女同我地一組。 」

我:「eh…其實我又無乜所謂既,大家玩得開心咪得。 」

阿希:「屌,你有女就梗係唔care啦,嗱我就諗好啦,我黑仔同諾賢一人溝一個,咁咪岩岩好。」

我:「哦哦咁我祝你成功喇。」

去個學校旅行就想溝到人…阿希你真係得意… 

Bella:「唔好再係度傾計喇,再唔行既話d野就俾人買哂架喇。 」





Bella係其中一個女仔,佢同大面Bella一樣名,笑容都好似,好甜美。身材又唔差。

至於另一個就叫Fanny,佢就高高瘦瘦,最吸引人既應該係佢一對長腿同冰冷既感覺。

唔知阿希係mark左邊個呢。

黑仔:「喂咁事不宜遲快d入去買野啦。」

浩賢:「咪住先,咁其實我地決定左係打邊爐定燒野食未架?」

係喎…好問題。我個人不嬲都比較鐘意打邊爐,方便吖嘛。

黑仔:「梗係燒野食!! 」





一聽到浩賢話要揀打邊爐定燒野食黑仔就突然激動起黎,好似踩到佢條尾咁。

Cody:「但係我想打邊爐喎,好似多d野食。」

Fanny:「我都係。」

Bella:「係啦~又方便D~」

浩賢:「係喎打邊爐仲唔洗抬炭喎,不如就打邊爐啦。」

四重打撃,黑仔即刻灰到仆街,唉。  

阿希:「喂不如我地分兩組去買野啦,一組去街市,一組去超市。咁做高效率D喎,Cody你點睇? 」

Cody:「得呀,咁…唉就你啦!同我地三個去超市,其他既就去街市買料啦。」

吓!?點解偏偏揀我?

五條仔你偏偏揀我?你係咪玩鳩我呀阿姐!?

Cody:「仲等乜呀,快D行啦。」

Cody同Bella仲有Fanny無理到我地既反應,三個自作主張咁向超市既方向行左去。

浩賢:「阿明你仲等乜呀,快d跟去幫手啦。」

阿希:「唉~仲諗住係我跟Cody佢地去架嘛~點解會變左係阿明架~」

諾賢:「邊個去又有乜所謂啫,都係買野啫,快D行把啦。」

阿希佢地四個都開始慢慢行入街市,即係話得返我一個企係原地on99。

唉既然佢地都唔介意,咁我都唔好咁扭扭擰擰喇。

我之後急急腳追返Cody佢地,但無諗過佢地會行得咁快,睇住佢地入超市。

超市入面人山人海,就算我見到Cody佢地,我都無辦法走埋去。

轉左三個彎,我先成功埋到去。

我望到架購物車既時候,入面已經放滿左一袋二袋既野。

我仲開心左一下諗住佢地咁快手,但望真d先發覺唔對路。

屌你全部都係棉花糖同朱古力黎既!?

我:「喂我地係打邊爐喎阿姐。」

Cody:「我知啊,咁又點?」

我:「唔係...咁你地買咁多棉花糖同朱古力做乜呀?」

Bella:「因為我地鐘意食囉。」

我:「大哥…買左D大路野先喇…水餃呀,公仔麵同野飲個d,打邊爐係食呢d架嘛。」

Fanny:「咁阿明又講得岩,真係無理由買咁多朱古力同棉花糖既。」

嗱好彩有一個正常人啫。

係理性討論之後,Fanny同Bella就去放返低個堆棉花糖同朱古力,我就同Cody開始正常既採購。

首先係野飲,之後係少少冷藏野同碗碟,總算唔再係糖衣陷阱。

悶悶地,R佢吹下水先。

我:「喂,點解唔叫黑仔陪你買,要我陪你買。」

Cody:「因為得你同浩賢唔係單身,我又想留個有腦既係佢地個邊,所以咪叫你陪我地買囉。」

屌,兜咁大個圈話我無腦!?

我:「咁其實你地三個自己買咪得。」

Cody:「唔低喎,我地要搵人幫手拎…」

佢無講哂成句野,仲停低左腳步咁望住前面。

我追住佢既視線去睇,想知到底係咩事令佢停低。

「唷阿明,咦呢位我記得係上次…」

屌,原來係因為佢見到晨哥…如果俾你咁樣係超市撞到自己一直暗戀既人,我諗你都會同Cody一樣既反應既。

晨:「買野返屋企玩煮飯仔吖? 」

晨哥一臉輕鬆咁走埋黎,完全唔知道自己逼緊一個女仔。 

咦…佢背脊個D咩黎架? 

我:「咩呀,買聽日旅行食既野咋。話時話,你背脊個D係…」

晨:「唔?哦!你睇唔到咩?咪燒烤叉囉哈哈!我咁似唔似桐人呀?BTW我好憎桐人架哈哈。 」

佢突然係我面前自轉幾圈,向我地炫耀佢身後既兩支燒烤叉,引黎旁人既注目,其中仲有不少係我地學校既人。

喂你而家即係自毀形象呀你知唔知架… 

我望一望Cody,佢居然睇到入哂神?真係情人眼裏出西施。

晨:「係喎,你地旅行係去邊架?」

我:「你咁問一問我都唔係好記得添,女班長我地去邊話?」

講笑咋,我梗係知道我地去邊啦,船灣個郊野公園嘛,想俾機會Cody同晨哥講野啫。

Cody:「eh…我地去船灣… 」

屌你平時講野係咁細聲架咩,扮乜呀八婆。

晨:「哦~~船灣?喂魯路修我地好似都係去船灣? 」

咩話!?晨哥都係去船灣?lulu都係度? 

Lulu:「係呀,仲有我地係打邊爐你拎兩支燒烤叉揹係背脊做乜呀,趁未整到人之前快d放返低啦。 」

我見唔到lulu個人,但係我聽到佢把聲,好似唔多高興咁。

晨:「都唔玩得既,好喇我走先喇阿明,聽日再見喇。」

佢係我地面前「拔出」佢把「雙刀」,之後就揮䄂而去。

我再望一望Cody,佢好似終於鬆一口氣。

聽日有排你受呀。