大家為左晨哥既燒肉都係度摩拳擦掌,唔係因為有老師係度,人地分分鐘以為我地兩班係準備開片。

呀,不過呢度都無其他人,唔怕會嚇親人啦。

比賽以班作為單位黎對決,每班派出五男五女黎對決。

可惜既係,我並未抽中,只可以企埋一邊睇。

每邊十個人企係場上氣氛即刻熱烈起黎,大家都為自己個班打氣,連老師都係。





令我意外既係貪玩到不得了既晨哥居然肯唔親身參與比賽,只係同lulu做裁判。

Cody:「無啦啦點解會變左做閃避球大戰架,一陣掟到D野食你地就識後悔。」

Cody一臉不耐煩咁企係我旁邊抱怨,佢同我一樣,都係無被抽中,要企係一邊睇。

我:「難得大家都咁開心,你就咪鬼掃人地興啦。」

Cody:「無聊,我都係返去繼續食,趁你地咁留心玩掟波食鬼哂你地D肉哈哈哈哈。」





佢講完之後就自己一個人返左埋去個爐個邊,奇奇怪怪咁。

佢係咪想避開晨哥咋,頭先晨哥埋黎個陣佢已經尷尷尬尬,目光閃閃縮縮咁。

人地都有女朋友喇,自己仲咁介意做乜,唉得啖笑唔理啦,睇波算。

比賽一開始,就已經相當激烈,球來球往,女仔好快就out哂,但睇到大家相當開心。

局面好快就演變成三對五,我地班稍為佔有優勢。





我地班有黑仔,阿希,諾賢,阿豪同阿輝,除左阿希之外大家望落都係運動健將feel。

至於晨哥個班就有之前幫過我既阿偉,十四同一個我唔識既男仔。

多佢地兩個人,我地應該唔會輸啦下話,今次d燒肉仲唔…

「嘭!!」

喂…岩岩…係咪有個波飛過?我有無睇錯? 

我望下我地個邊,見到阿輝訓左係度,旁邊仲有個波。

晨:「out。 」

係幾時掟架…? 





大家既反應睇黎都係同我諗緊同一樣,個個都呆左。

個下咁響亮既聲音…阿輝而家都已經訓左係度典下典下,如果打中頭會唔會死人架…

話時話,玩個閃避球啫,唔洗咁用力呀…

係阿輝件事之後,我地呢邊都變得相當謹慎,因為無人想再食個一球。

因為咁,局勢變得爭持不下,大家互有攻守,但無人再出局。

企係一邊既我地都唔敢亂咁打氣,只係敢靜靜係一邊睇住佢地。

呢場比賽,好似已經唔再有歡樂既氣氛,變成一埸認真既比賽咁。





晨哥見到咁又係點諗呢…

我望一望過去晨哥個邊,只見佢目無表情咁望住場上。

我估佢見到咁都應該唔係咁高興啦,佢原本係想大家可以玩得高興架嘛,但而家居然變成咁…

十四:「大鑊!! 」

嗯?咩大鑊…嘩真係比佢講中左!?

因為十四既大叫,我既注意力重新返到埸上,但我居然見唔到個波,我再跟住大家既視綫去搵,先發現個波原來飛走左。

仲要一支箭咁飛緊去Cody佢地幾個女仔個邊…  

大家都係咁叫佢地幾個女仔小心,但就係無人做任何野,大家都係企係度。





個波飛得咁快,又有邊個可以阻止吖。

「啪!」

喂你係幾時跑左過去架…

我講邊個?梗係如神一般既晨哥啦。

佢居然係咁短時間內跑到過去,仲要接得住個波。 

晨:「過左火位喇十四,唔記得左我叫過你要注意力度呀? 」

佢真係痴線架…有一刻,我以為自己睇緊黑子或者網球王子,因為我根本無諗過現實中真係會有人可以咁快反應。





大家見到呢個場面都呆左,Cody同Fanny甚至仲夾住件牛肉咁望住晨哥背脊。

晨:「世事總係不盡人意,睇黎場比賽已經唔再可以令大家開心喇,所以我決定中止比賽喇~ 」

唔少人聽到晨哥咁講都點頭表示同意,就只有幾個人例如十四好似唔係好滿意。

晨:「嘛唔好咁啦十四~~我知道你好鐘意玩閃避球,但差d掟到人啦,唔好再玩啦都係。 」

「咁D肉點呀? 」

居然仲有人敢問呢個問題,雖然我都好在意呢個問題。

晨:「係喎咁點算好呢,咁不如大家都一齊黎食啦好無? 」

大家:「好!!」

皆大歡喜,大家梗係接受啦。

之後大家都蜂擁到晨哥既燒烤爐前等食肉,就連老師們都被香氣所吸引左過去。

我當然都唔例外啦,我仲好成功咁搶左前排位置。

晨:「哦係阿明吖?好啦見係你俾舊大件d既你啦。」

我:「多謝大佬!嘩好正呀好juicy!」

晨:「嗱,呢碟肉你幫我拎去比你個組個d女仔啦,順便幫我同佢地講聲對唔住嚇親佢地,我頭先都唔記得左講。」

我:「哦哦…明白。」

晨:「唔該哂,嗱咪偷食呀,俾我知道你偷食的話打死你架。 」

晨哥笑笑口咁講呢句說話,但都係嚇到我。

我之後就好小心翼翼咁捧住一大碟肉返到我地個邊,途中仲好多人對我碟肉虎視眈眈,我幾驚俾人搶。

Fanny同Bella見到我拎到晨哥既肉返黎都好開心,唯獨Cody一個仍然企係一邊,望住遠方。

出於好奇同關心,我走左埋去睇下佢。

我咩都無講,咩都無做,就只係企左係離佢附近少少既位置。

Cody:「點解每次我想放低佢既時候,總會有事將佢帶到黎我面前?」

佢…同緊我講野?佢終於肯講件事出黎? 難得佢肯講,我當然乖乖地靜靜地做一個聆聽者喇。

Cody:「Form 1個陣,佢又係咁樣突然出現係我面前,打走哂附近學校D騷擾我既MK仔,之後乜都唔講就走左。」

「個次就係我第一次見佢。」

嘩原來係咁戲劇性既相遇…晨哥你搵次做野貼地少少得唔得…

Cody:「其實只係一件好少既事,講聲多謝就可以當無數,但佢之後一次又一次出現係我面前,令我對佢既印象更深刻。」

「之後到佢有女朋友,我以為終於可以告一段落喇,點知呢一年黎,我對眼始終都離唔開佢身上。」

「我居然想係佢身邊既人係自己。哈哈哈哈。 」

因為一次英雄救美就鐘意左對方吖…愛情呢家野真係…好奇妙。

不過對方係晨哥,又好難唔被佢吸引住既。 

Cody:「不如你話我知,我應該點做先好呀?」

喂情況好似唔係好對路喎…佢把聲…好似…

我忍唔住走左埋去,睇下佢既情況。

果然,同我諗既一樣。

佢係度喊緊。

佢之所以企係呢度,背向所有人,就係因為唔想比人睇到佢喊,佢仲要唔敢喊出聲,怕人發現。

出於好心,我拍拍佢膊頭。

Cody:「我真係好辛苦… 」

好難想象平時睇落咁cool咁硬淨既Cody居然會崩潰到呢個地步… 太溫柔太完美,原來都有問題。

佢咁吸引人,原來其實會令人痛苦,真係諷刺。

我:「放過自己啦,咁咪只會令自己辛苦,其實你條件都唔算差,班入面都唔少人鐘意你,不如考慮下俾個機會佢地。」

Cody:「你唔覺得咁做好賤?好似當人係水泡咁喎。 」

呃…咁講又好似係。

我:「但你咁樣咪盞困死自己,試下留意身邊其他男仔啦,好似…」

Cody:「你唔會想話自己掛?你已經有五個女朋友喇喎,仲想溝埋我? 」

我:「頂,我梗係唔係話自己喇,我有佢地五個已經夠哂喇。 」

Cody:「其實我覺得你好花心囉,五個女朋友咁誇張。 」

我:「嗱我同佢地五個都各有故事既,我地之間係互相需要,所以先會咁既情況,唔好用d世俗眼光睇我。 」

Cody:「痴線,講到自己咁偉大,其實咪又係咸濕。 」

我:「唔係囉,我仲係…喂咪住先!點解無啦啦會講左去我個度,明明講緊你架。」

好彩,差D講左我仲係青頭仔既事出黎。

Cody:「點知你,你自己講既。」

我:「唔係吖我係想話叫你不妨多d留意下黑仔,阿希佢地…咦你係咪無再喊啦? 」

Cody:「咦…好似係喎點解既… 」

我:「我勁囉因為,感覺有無好D先。 」

Cody:「好似又真係有,講左出黎之後個人好似舒服左唔少。」

我:「其實可能係因為你一直收埋收埋先搞到自己咁辛苦啫,點解你唔試下同你D friend好似Bella佢地傾下既?」

Cody:「佢地把口好疏架…加上暗戀呢家野又邊好意思話比人知吖。」

我:「咁你又話我知既?你覺得我唔口疏咩? 」

Cody:「咁你係自己發現到啫,我控制唔到。不過如果你敢講出去呢,我就一定會殺左你,一定。」

我:「你講到咁,有人揸支槍指住我都唔敢講啦。」

Cody:「低能,不過多謝你呀。」

我:「屌,friend黎架嘛,講呢D,返去食野啦。」

之後我同佢扮到無事發生咁返去繼續同大家開開心心咁食同玩,全班一齊歡歡樂樂咁過埋淨低既時間。

學校旅行,就算係邊間學校既都係咁有趣。