我地六個搵左間會議室坐低左,Ellie好自然咁坐係主席位,我地五個都眼甘甘望住佢。

Ellie而家個樣好似想食人咁,喂大佬有無嚴重到要咁呀…

我同Sarah佢地幾個交換下眼神,佢地幾個都唔知應該點好,只係一味你眼望我眼。

Ellie:「阿明,你想要既生活到底係咩?」

就係我地仲交流緊眼神既時候,Ellie就突然開聲,震懾左所有人,大家都即刻望住佢。





我一時之間答唔到,應該係話我都唔知應該點答先好。

Ellie:「其實你到底係度擔心D乜?怕屋企會有事?會無哂所有野?」

Ellie追問,但我都係唔敢答。

我怕我答錯會仲衰,佢會鬧到我一臉屁。

Ellen:「喂喂喂,唔好一黎就鬧人先得架Ellie,到底發生咩事你要咁樣鬧阿明呀?」





Ellen嘗試幫口,拯救我呢個可憐既小男孩。

Ellie:「家姐,佢仲係諗緊個個針對佢既人既事,仲走左去搵晨哥。」

「明明二家姐已經安排好一切,你做乜仲要自尋煩惱?」

「你每次一有呢D事就會成個人陷左落去,連身邊既野都唔肯理!」

Ellie乜事咁激動呀…雖然我係唔岩,但都唔洗鬧到咁呀…?





唉我諗我都係道左歉先,我都未見過Ellie嬲成咁,真係好可怕,恐怖過發火既Anna。

Anna而家甚至驚到捉住Yui,睇黎佢都比Ellie既氣場嚇親。

我:「對唔住呀Ellie,我知道係我唔好…我唔應該比件事綁住…」

Ellie:「對唔住?你…」

Ellie只係講左四個字就被打斷,而打斷既原因係因為會議室既門突然被推開。

而開門既人,正正就係我今日苦苦追尋既晨哥。

晨:「喂乜你地係度呀?我都搵得你地耐啦。」

「嗯?做乜個個都傻左咁望住我?係咪我阻住你地?」





應該話你黎得正係時候定唔係時候好呢晨哥…就算晨哥黎左,情況都係無變,大家都係唔敢講野,睇Ellie面色做人。

晨哥唔知發生咩事,係度係咁望住我地幾個,擺出個笑容唔知應該點做好。

最後打破呢個膠著局面既人,係Ellie自己,佢自己一個走左出去。

Ellen都即刻跟左出去,原本我都想追出去,睇下Ellie到底咩事,但Sarah叫我唔好去,等身為家姐既Ellen處理左先。

晨:「哇我諗我真係黎得唔係時候?我印象中岩岩個位妹妹係冷靜派黎架?佢點解會咁嬲既? 」

就連晨哥都意識到Ellie而家真係好嬲…

我:「我諗係因為我太過在意個條友既身份,呢排忽略左佢所以佢先咁大反應啦… 」





晨:「嘛…我又唔覺得單純係因為你唔陪佢喎…不過你都係抵鬧架喇你點做人男朋友架。 」

我:「係啦係啦我知係我唔好,我一陣就會去氹返佢喇,係喎你話搵得我地耐,係咪有咩事?」

晨:「你真係一個衰人黎架喎,岩岩先激嬲左個女朋友,仲有心情理其他野既? 」

我:「唔係…因為係Sarah叫我… 」

晨:「就算係叫你唔好追上去,你都無理由有心情理其他野架嘛,你真係恃住自己有五個女朋友就闊佬懶理呀?Sarah,個位妹妹係咪發生左咩事?」

Sarah:「eh…我…」

Sarah吞吞吐吐咁,擺明就知道D野。

晨:「講啦,都搞成而家咁囉有咩唔講得啫。 」





Sarah:「咁好喇…其實Ellie同Ellen既嫲嫲確診左cancer…仲要係末期…Ellie話佢嫲嫲一直都好鍚佢,所以佢先會咁唔開心…」

咩話!?  

我:「咁大件事做乜唔話比我知!?  」

我聽完之後即刻企起身拍檯,完全無諗過隻手會痛。

Anna:「Ellie話唔想你又擔心多一件事吖嘛,但邊有人會估到你連佢唔開心都feel唔到,仲係佢面前為另一件事投入到咁忘哂形… 」

Sarah:「Ellie呢幾日都係有Yui陪住先無咁唔開心咋… 」

我望下Yui,佢好用力咁點左兩下頭。  





我真係一個無可救藥既死蠢…

晨:「去搵人啦仲係度練仙咩,我警告你呀,剩低既時間咪再諗條友既事,過好你自己原來既生活先。」

「如果比我知道你偷偷地查或者呢班靚女向我投訴既話,手腳都擰斷你呀。 」

「唔值得架,唔值得為一個喪心病狂既人影響自己既世界架。 」

晨哥講完就企左身,伸左一個大懶腰,之後就行左去門口。

晨:「好喇我而家就去做我應該做既野,你都去做你應做既野啦。 」

佢留低呢句說話,之後就係我地面前消失左。

應該做既野…

我不假思索,衝左出去搵佢地,但搵哂成間學校都係唔見佢兩姊妹。

最後,我係天台先搵到佢地。

黃昏下既天台令人好難睇野,但我好清楚見到佢地。

我仲見到佢地喊緊。

我衝左上去,攬住佢地。

「對唔住。」

一句對唔住,居然令佢地喊得更大聲。