同我一樣既樣,就連把聲都完完全全係我把聲。

係我太攰所以有幻覺…?唔係,一定唔係,我而家咁精神,一定唔會係幻覺。

我即刻擰轉頭,果然另一個我仍然係度。

我,呀唔係,應該話佢笑笑口咁望住我,但感覺有D奇怪。

呢種奇怪既感覺好似之前有過,當時係咩事呢?啊我記起喇。





當時係見到Kathy扮既阿樂,咁諗一諗,眼前呢片不可思議既現象即刻都可以解釋到。

今日個腦轉得好似比平時快好多咁,係咪因為場合問題呢。

驚恐既感覺一掃而空,好快我就意識到眼前呢個「自己」就係我地呢排苦苦追尋既人。

佢而家就企左係我面前,仲要用緊我個樣。

我:「你到底係咩人。」





佢:「我?我就係你啊你講咩。 」

我:「唔洗扮野啦,同一招對聖鬥士係無用架,你之前已經叫Kathy扮到阿樂咁,今次就將自己扮成我咁。」

「就係你呢排一直做D針對我屋企既野架喇,你到底想點?點解要針對我?我到底有乜得罪你?」

佢:「哦~~?今次轉數又幾快喎,我仲以為你會嚇到瀨尿添,我應該要用返你個位死左既朋友個面具先岩,失策失策。不過係咪真係無用呢~~ 」

豈有此理吖,居然用我個樣去講D咁摟打既野,但自己個樣真係打唔落手…





我:「你到底係咩人…」

佢:「哈哈,乜你真係對我既身份咁有興趣咩?」

佢將自己隻手放係自己塊臉上面,好似準備除走我塊臉,搞到我既緊張又期待。

廢話,搞到我同我身邊既人一塌胡塗,梗係要知道你到底係咩人同埋原因喇!

我開始握緊我既拳頭,就快忍唔住一拳打埋去。

好想快D見到佢既真樣。

但佢居然突然縮手,仲指住我黎笑。

佢:「哈哈哈哈,你唔係以為我真係咁簡單就會比你睇我個樣呀? 」





我:「你!! 」

我撲上去,想夾硬除走佢個面具,但佢反應好快,避開左,仲一拳打落我個肚度。

呢拳好大力,搞到我即刻坐左係地下,佢乘機扯住我D頭髮,仲伸個頭埋黎。

佢:「一陣見喇我地,我會好好享受今晚既Party架啦。」

佢講完就再踢左我一腳,之後就轉身一邊大笑一邊離開洗手間。

係佢喇…我要追出去先得…!

仆街喇,度門開唔到既!?我死推爛拉,度門都係開唔到。





佢鎖住我係度,到底想點呢?

唔通佢想扮我去個晚會!?如果係既話就大鑊喇!!唔知佢會用我個樣去做D咩架!! 

一諗到佢可能會用我個樣去搞破壞又或者去做D奇怪估唔到既野,我就即刻好驚。

雖然係假既,但話哂今晚都係一個公開場合,如果「我」做左D失禮既野既話,肯定會俾出面既人笑架!

一定要快D出返去先得!!

可惜氣勢無助我改變現狀,無助我打開眼前呢度門。

呢度門明明只係木門,但點解而家好似保險庫度鋼門咁難開架…

我唔甘心,無力咁打左度門兩下,之後又坐低左,望住度門。





咪住先,我仲有電話架喎!打電話比二家姐叫佢黎救我咪得!

我即刻拎部電話出黎,但居然收唔到!偏偏係呢個時候!!垃圾CSL!!  

「呀!!!  」

我忍唔住,自己一個係個廁所度咆哮。

我開始發哂癲咁係個廁所入面搵野,搵可以整開度門既野,但搵黎搵去都只係搵到支地拖。

別無他法既情況下,我只好拎住支地拖,趙雲上身咁係咁撞度門。

就算要整爛度門,我都要出返去。





我係咁篤係咁篤,雖然係整到好響既聲,度門都有花到,但始終都係整唔開,仲搞到自己一身汗同好攰。

好似都已經過左十五分鐘,條友會唔會已經…

個人一攰就開始亂諗野添,到底我要點先返到出去呀!!

我:「有無人呀!!放我出去呀!! 」

我已經放棄左,開始向外界求救,睇下會唔會咁岩有人係出面。

無諗過,奇蹟真係會出現。門既手把居然郁左兩下。  

「入面係咪有人呀? 」

真係有人係出面!!!  

一聽到人聲我成個人都精神返哂,即刻企起身,跑去門邊。

我:「係咪有人呀!唔該幫我開門呀我被人鎖左係入面呀!  」

「咁呀,你退開少少先,我幫你開。」

我按照對方既說話遠一遠,之後再話我準備好。

「嘭!!」

嘭既一聲過後,成度門就冧左係我面前。 

邊個咁大力… 

晨:「咦乜係你呀?係廁所做咩呀你?自修溫書呀? 」

原來係晨哥,一陣先多謝佢,而家要去搵大家先得! 

我係晨哥既幫助下終於成功離開廁所,不過我連放鬆既時間都無。

我繞過晨哥,直接向會場既廳跑去。

千其唔好有咩事呀求下你!  我出力跑,無理身邊既人既目光,好快就跑到去會場門口,仲咁岩撞到阿惠,佢係入面出黎。

阿惠:「唔?大佬明?咁快返黎既?咦喂你搞咩黎呀成身汗既?」

佢話咁快返黎…?唔通條友已經黎過!?

我:「喂阿惠,我係咪黎過呢度?」

阿惠:「咩呀你講咩?我聽唔明你講咩喎,咩叫我係咪黎過呢度?你燒壞腦呀? 」

我:「唔係吖我意思係「我」岩岩係咪有黎過?有無一個同我一模一樣既人黎過呀? 」

阿惠似乎終於明白我既意思,仲開始表現出驚訝,用表情答左我既問題。

我再無花時間係佢度,直接跑入去搵Sarah佢地。

當時仲未有咩記者同賓客黎,在場既人都係自己人。真係好彩,咁佢做D乜都唔會有街外人知。

大家對於我咁慌忙走入黎都覺得好奇怪,唯獨老母一見到我就好嬲咁行埋黎,一下打左落我個頭度。

老母:「衰仔!你搞咩黎呀! 」

老母咁嬲,唔通條友真係做左D奇怪野!? 

我慢慢抬高頭,望住老母。

老母:「你睇下你!衣衫不整咁!你知唔知今日咩場合呀!你仲要係主角黎架咁唔企理點得架!」

老母一邊罵一邊幫我整理好我套衫,而我只係呆左咁望住老母,睇住佢幫我整套衫。

我:「你罵我…就係因為我D衫?」

老母:「梗係啦!頭先出去個陣仲好地地,返到黎就咁,你去打仗黎呀?咦咪住先…點解你好似… 」

我輕輕推開老母,行左去搵Sarah同Yui佢地。

Sarah:「咩事呀阿明?你望落好慌張咁既? 」

Yui:「你仲成身汗…抹下汗先喇。」

我接過Yui俾既紙巾,一邊抹汗一邊問佢地野。

我:「頭先我有無做D咩奇怪野? 」

Sarah:「奇怪野?無呀?頭先既你比而家既你仲正常喇,冷靜好多~ 」

「不過如果要話奇怪野既話都有既,你頭先問完我地緊唔緊張之後就無啦啦錫我同Yui啦,咁算唔算奇怪野? 」

我:「你話我…頭先錫左你地? 」

屌你老母呀…?

我慢慢擰轉臉,望過去Yui度。

Yui咩都無講,只係點左一下頭。

我:「呀!!! 」

我跪係地下,仲係佢地幾個面前咆哮,仲叫左好耐,直至晨哥黎左,一下打落我個頭度我先停低。

晨:「好嘈呀你叫夠未。搵佢出黎仲好啦係度叫有鬼用咩。 」 你講就梗係輕鬆…因為唔關你事吖嘛,比人錫個個又唔係你女朋友!  

晨:「喂唔好再跪啦,地下污糟呀,起身啦。 」

佢再拍拍我背脊,但咁樣反而令我更加嬲。

我跟佢既說話去做,企返起身。

不過我唔只企起身咁簡單。

我仲一拳打埋去晨哥度。

我打中左,打左落佢個肚度。但佢無乜反應,只係好似平時咁望住我。

除左佢之外,在埸既所有人對於我突然咁做都好驚訝,包括我自己。

大家姐:「阿明!你做咩呀? 」

大家姐一邊講一邊跑埋黎,同企係晨哥後面既阿惠一齊分開我地兩個。

晨哥擦擦被打中既地位,表情仍然相當游刃有餘,好似話俾我知我頭先個拳根本完全唔痛。

好想打多佢一拳,但我知道再打佢都無用,我根本就唔應該打佢,頭先打佢都只係因為我真係忍唔住想發洩下。

條仆街居然夠膽錫Sarah同Yui…仲要係用我個樣…

晨:「打我唔緊要呀,如果打我就可以解決到成個問題既話,你打死我都無問題架~ 」

「不過講開又講啦,條友真係幾過分下喎,居然咁踩你底線。」

大家姐:「晨仔,到底發生咩事?你話條友?唔通個個人已經出現左? 」

晨:「係呀Miki姐,佢頭先…eh,我諗唔係好方便係呢度講,換個地方先講,只係我地三個。 」

大家姐:「咁呀,好啦咁Sarah你地就同Auntie係度坐陣等我地啦,我地三個去傾一傾D野,好快就返。」

大家姐略略向老母佢地交代左一下之後就同晨哥仲有我一齊去左會場旁邊一間房,晨哥仲鎖住度門。

晨哥好快就同大家姐交代一切既來龍去脈,大家姐聽到好驚,對眼擘到大一大,仲用手掩住個口。

晨:「成件事應該就係咁喇,條友頭先扮到阿明咁既樣出現係你地面前,仲鎖左真既阿明係廁所。」

大家姐:「咁你即係話…頭先錫Sarah同Yui既…唔係真既阿明..? 」

聽到大家姐咁講,我又忍唔住握緊我個拳頭。

好想打條友一身…

晨:「無錯喇,所以我先叫你地黎呢邊傾,免得刺激到曉晨妹妹同泳琦妹妹。」

如果Sarah同Yui知道左頭先錫佢地既人唔係我,而係我地既仇人既話,佢地會有咩反應…

我又開始揸緊我另一個拳頭,係咁打我自己大脾。

大家姐:「如果係咁既話咪好麻煩囉…佢戴住個面具的話我地咪無辦法認出佢囉?」

晨:「咁又唔會,今日既主角係阿明,佢唔會再用阿明個樣參加個Party架啦,除非佢係戇鳩啦。」

「加上我估啦,條友應該有D奇怪,佢應該好希望你可以搵佢出黎,所以佢九成會出真樣。」



晨:「記住你心入面既怒火,一陣搵到佢出黎就將你既怒火發洩哂落去就啱架啦,用比頭先大力十倍既力度打落去。 」

「唉如果俾阿欣或者魯路修知我咁講野肯定罵鬼我都似,好彩今日佢地無份黎啫。  」 

「時間都差唔多啦,你上去沖個涼換過套衫再落返黎迎賓喇,我去幫你同May姐講。」

我:「晨哥…」

晨:「唔好講咁多,我而家都好嬲下,無端白事因為佢比人打左拳,我而家都想搵佢出黎。」

晨哥講到咁,我都無謂再哂口水,上左去酒店房沖個涼,再換上大家姐臨時幫我準備既新禮服。

再返到會場既時候,場內已經變到好多人,因為時間都差唔多。

我仲搵到一羣熟悉既臉孔。

全部七星。