「無啦啦多左幾個家姐同細妹 Season 2」: 照顧
阿惠：「喂大佬明~黎搵你食lunch喇我。」
屌你啦，我就唔信你係專登黎搵我咁好喇。
點都好喇，我地五個人開始行去食野，食之前同晨哥食個間拉麵。
阿惠同Kathy兩個行係我地前面，有傾有笑，唔知既一定會以為佢地係情侶。
唔係喎，就算係我都覺得佢兩個100%係情侶。
阿惠個衰仔，出手真係快喎…咁快就溝到Kathy？
Ellie：「佢兩個睇落好幸福咁喎。」
Sarah：「係囉係囉，邊似得某D人吖，成日都唔理我地。
」我：「邊有呀…我成日都有搵你地架，係你地個個都忙咋嘛，我都唔明點解你地幾個好似仲忙過以前咁。
」Ellie：「因為大家係度好似都搵到想做既事，自然就特別投入，所以咪忙囉。
」我：「唔…又有D道理，咁你兩個呢？你地搵唔到自己想做既事咩？
」Ellie：「你意思即係話我地兩個好得閒？
」我屌！又踩地雷添！！
我：「邊係咁既意思呢，我意思係…你兩個可以成日係我身邊啫~~唔好誤會~
」Sarah：「其實我都有想做既野架~~
」我：「係？咁係咩呀可唔可以話我知？
」哇多謝Sarah幫左我一把，將話題帶返去正軌。
Sarah：「咪就係一直陪住阿明你囉哈哈，你趕我我都唔會走架~
」聽到呢句，應該唔會有男人唔會唔感動掛？我就聽親都好感動啦。
我忍唔住，伸手去摸Sarah個頭，佢仲攬住我，任得我摸(個頭)。
我：「哈哈，我都係，我點都唔會離開你地幾個。
」Ellie：「夠喇你兩個。
」我：「哈哈做咩呀你呷醋呀？唔洗喎，你都有份架嘛~」
我聞到有醋味之後就伸出我另一隻手去拖住Ellie，佢雖然臉上仍有不悅之色，但佢都係肯比我拖。
好似好少見Ellie呷醋，原來佢呷醋個樣都咁可愛既嘻嘻。
就係咁，我地三個其實同阿惠Kathy一樣，吵吵鬧鬧咁行到去拉麵鋪。
唯一唔同既係我同Sarah Ellie係真正既情侶關係，至於佢地兩個呢…
我成餐飯都係度留意呢兩條友，睇佢地之間既互動。
唔…而家睇真D呢兩個人坐埋一齊比人個種感動真係唔識點形容好。
兩個人相處得係好開心既，不過好似…點講好呢，好似就住就住咁囉。
呢種感覺係阿惠身上特別明顯，佢好似…防範緊D野？係咪可以咁講呢？我見佢有幾次差D同Kathy有身體接觸但佢都即刻縮開。
至於Kathy都有類似既舉動，只係無咁明顯，但佢同阿惠講野種語氣都係有d恭敬咁。
佢兩個之間到底出左咩事呢…？
Sarah：「係呢係呢，你地兩個係咪拍緊拖？
」Sarah！
我都唔係咁夠膽直接問既問題，Sarah居然咁直接就講咗出黎…
Kathy，阿惠：「唔係。」
嘩屌你兩條友同步架喎…即刻否認既不過。
Sarah：「竟然？見你地兩個咁親密仲以為你地拍緊拖添哈哈。」
阿惠：「我地唔係咁既關係，eh…係喇唔係，我地無拍拖，我仲係一隻單身狗嘻嘻。
」唔…阿惠…好似做多咗咁喎。
Ellie：「咁我唯有祝你早日出pool喇，係呢時間都唔早喇，不如我地埋單喇？
」夠鐘喇咩？哦…原來係咁。
Ellie講既時候仲同我打咗一下眼色，我即刻明白佢打緊咩主意。
佢係為免情況繼續尷尬所以先提出話不如返學校，等大家可以轉移下視線又或者係話題。
不愧係Ellie，真係聰明。
平時食飯如果有人提出差唔多係時候要走，通常都唔會有人會反對。
今次都唔例外，連山長水遠走黎「搵我食lunch」既阿惠都好爽快咁話好。
阿惠話今餐佢請，但我呢邊有三個人，Sarah又係咁加配料，再加上我應該一盡地主之誼，所以最後都係由我埋單。
起初我以為Ellie所計劃既就係得咁多，點知而家先係開始。
係我埋單既時候，Ellie一個人走咗埋黎我身邊。
我以為佢想睇下自己食咗幾多錢啦，但佢又唔係喎，佢對眼望住張單，但講既又係另一回事。
Ellie：「阿惠個邊就由你去問喇，Kathy個邊就交比我同Sarah。」
我：「唔？你想問咩呀？」
我講完呢句之後一秒就後悔，因為我已經知道Ellie想我去問既係咩。
可惜已經太遲，Ellie已經擺出一個「屌，你係咪咁蠢呀
」既樣。我只好苦笑，一邊話知喇知喇一邊拖住佢出去。
出到去外面，Sarah已經捉住咗Kathy，不斷撩佢傾計，又問呢樣又問個樣，有心令佢無辦法痴住阿惠。
阿惠而家只可以企係旁邊，笑住咁望住呢兩個女仔傾計。
呢個都係Ellie既計劃？厲害啊。阿惠真係完全無位入。
直至我同Ellie行埋去，情況先改變，阿惠先開口講野。
阿惠：「咁我就返去先喇，下次見喇大佬明。」
我：「喂等我送你去搭車喇。」
阿恵：「唔洗喇我又唔係女你唔洗對我咁好架喎，返去上堂把喇。」
我：「屌你講到我好似淨係對女好咁既，黎！淨係我地兩個黎個boys talk！」
我講完就捉住阿惠個膞頭，都唔理佢有乜反應就拉住佢行。
至於Kathy？Sarah同Ellie就帶咗佢行另一邊，返學校既路。
到見唔到佢地三個個陣，我先放開阿惠。阿惠即刻深深嘆左一口氣。
阿惠：「我只係想照顧佢，保護佢咋，我真係唔係想溝佢架大佬明。」
喂阿惠哥仔，我乜都未問你就自爆都有既。
我：「照顧佢？咁其實唔係代表你鐘意咗佢咩？唔係鐘意佢你點會有呢種諗法。」
阿惠：「因為佢係阿樂個妹，同時又係阿偉造成既悲劇對象？」
「你仲記唔記得我中一個陣個女友。」
啊佢咁講一講…阿惠以前個女朋友都係因為D無謂既逼害先…
阿惠：「收留佢係學校既呢段時間我同佢傾咗唔少，佢話咗好多關於阿樂既事比我知，全部都係我地以前唔知既。」
「我知道阿樂對佢係幾咁重要，無咗阿樂之後佢既世界好似塌咗落黎咁，起初佢仲可以透過憎我地去分散呢種唔開心既感覺，但去到最後居然又發現原來自己被人利用，仲要係比間接害死自己阿哥既人利用，簡直就好似將堆返好既積木再掃冧咁…」
哇我好似都係第一次聽阿惠講咁多野仲要咁認真非鳩嗡…
我：「所以你就想…？」
阿惠：「嗯，我大概係想暫時代替阿樂，幫佢照顧住Kathy，直至佢可以真正企返起身過返正常既生活…」
我：「你不如正正經經追人，之後好好照顧人喇，唔洗搞到而家關係尷尷尬尬咁。」
阿惠：「唔喇，我唔想嚇親佢，而家咁已經可以，而且佢可能會去外國搵佢父母呢？如果一齊咗既話，到時可能又會難捨難離，無謂喇係咪先。」
我：「嘩乜你諗到咁長遠都有既。」
其實我係想話你會唔會諗得太多…
阿惠：「好喇有車喇，我走喇，係學校幫我好好睇住Kathy啦。」
佢講完就上咗架巴士，消失係我面前。
阿惠突然變到聖人咁款既？其實佢係咪唔知自己可能鐘意咗人？
定係佢知道，但係專登…
唔知Kathy又點睇阿惠呢。