隨住Anna話我知其實呢一切都係一場騙局,只係用黎嚇下我之後,所有野看似都終於回復正常。

放咗兩日假之後,大家都繼續返學,一齊食lunch,一齊放學。

唔係喎,點解大家都係咁忙既?明明陸運會都已經過咗,仲有咁多野忙既?

Ellen Yui Ellie就係度對住疊文件係度研究唔知D乜,而Sarah同Anna就坐係一邊密密寫,唔知寫乜。

而我,就坐係佢地中間食緊蛋糕。 





我:「eh…有無人有興趣玩大富翁? 」

出動到佢地最愛既大富翁都係無人理我,佢地繼續做緊自己野。 

我仲以為自己去咗自修室或者starbucks,周圍既人都係唔識既。 

出於好奇同無聊,我走咗過去Sarah同Anna個邊,睇下佢地到底寫緊乜。

我:「喂喂喂,你地係度寫緊乜呀?功課?」





Sarah:「唔係吖,我幫Anna寫緊稿咋嘛。 」

我:「稿?點解要寫稿既?咩稿黎?」

Anna:「校刊想訪問我呢個全場總冠軍吖嘛,全場總冠軍呀知唔知。 」

又提全場總冠軍… 

我:「咁明明係人地同你做訪問,點解會係你準備稿既。 」





Anna:「你啊…咁難得有個機會,自己梗係都要好好準備下先係架。尊重自己又尊重人地吖。 」

我:「哦…原來係咁…咁你打算到時講乜?」

Anna:「我諗佢都係會問我原動力吖,有乜心得同心情可以分享架啦,我地而家都係向呢個方向寫緊。 」

我:「咁你有乜原動力令你有陸運會咁好成績?你唔會話係一心為咗個全場總冠軍架? 」

聽到我咁問之後佢就擰轉頭,同係佢對面既Sarah對望咗一眼,之後兩個係度傻笑。

我:「有乜咁好笑呀?係咪我問錯野? 」

Sarah:「無,你無問錯野呀,只係我地頭先都有討論過呢個問題,所以聽到你咁問先會笑啫。 」

我:「你地已經討論過?咁有乜答案?」





Anna:「有啊,我同Sarah都第一時間就load到個答案,咪你囉,你咪個理由囉哈哈。」

我:「我?你真係諗住到時咁答?  」

Anna:「唔知呢哈哈,你到時睇校刊咪知囉,喂我口渴呀,你無野做就幫我去拎D野飲啦。 」

就係咁,我就被委派咗去樓下拎野飲比佢地。

佢地話個原因係我呀…?氹我咋掛?嘻嘻…

咦…大家姐同二家姐?

當我準備行入廚房既時候,就比我見到大家姐同二家姐企係大門口,身邊仲有一個喼。





又係因為好奇,我無入到廚房,而係走去大門口搵大家姐佢地。

佢地好快就注意到我,大家姐仲笑住咁向我揮手,問我做乜會自己一個走咗落黎。

我:「無呀Anna佢地叫我落黎拎野飲比佢地咋嘛,係呢大家姐你又去旅行?今次又去邊?」

大家姐聽到我咁講之後表情變得尷尬,仲擰轉頭望企係後面既二家姐。

唔通係…

二家姐:「唔係佢,係我。想去個旅行轉換下心情。」

哦…好彩係去旅行啫,幾驚佢又要搬出去住。

我:「咁去邊度玩?」





二家姐:「東京。」

我:「嘩咁正?肯定有好多好野食好野買啦。」

二家姐:「可能啦,唔洗日日聽到你班馬嬲嘈喧巴閉就已經謝天謝地啦其實。」

嘩講到去旅行既原因係因為我地咁既…

二家姐:「唔洗咁既臉口既,我都係講下笑啫,唔關你地事既。」

「只係覺得呢排太攰,想出去行下啫。」

大家姐:「阿May…」





二家姐:「我唔係度既呢段時間,唔好又搞D乜事出黎呀,我無辦法係咁遠幫你執手尾架。」

「仲有呀,唔好令Sarah佢地唔開心呀,俾我知道既話係幾遠都好都會返黎打你一鑊。」

我:「知道喇…我都唔希望再見到佢地任何一個唔開心,你放心去玩,玩得開心D啦。」

二家姐:「放心喇我會,時間都差唔多,我要去機場啦,家姐陪我去機場啦。」

我:「不如我地都同你去機場?我而家就上去叫佢地。」

二家姐:「唔洗咁麻煩啦,送唔送機都係一樣啫,佢地都有自己野做架嘛,唔好要佢地專程抽時間去一趟機場。」

「你唔係要拎野飲比佢地架咩?快D去啦。」

係喎差D唔記得件事添,如果一陣兩手fing fing返上去肯定又會比佢地鬧。

我:「多得你提我,如果唔係我肯定又俾人鬧,等我而家就去廚房拎先。」

二家姐:「嗯,去啦。」

於是我轉身,開始向廚房跑去,但跑咗兩步又比二家姐叫住。

我再一次擰轉身,打算望返過去睇下二家姐叫我係所謂何事。

但我一轉身,佢已經係正我面前,近乎零距離。

佢一下就攬住咗我,仲要係攬到好實個隻。

我完全估唔到佢會咁做,所以我係成個人呆咗,當識反應既時候,佢已經放開咗我。

二家姐:「無時間啦,幫我將呢個擁抱轉交比Sarah啦。」

佢講完呢句就同大家姐一齊出咗門口。

而我,就傻傻咁繼續望住已經無人係度既門口。過咗一陣,我先傻頭傻腦咁拎住幾杯野飲返上去比佢地。

二家姐…好似比平時都更加奇怪咁。

點解個套路好似咁熟,好似係邊度睇過聽過咁既?好似係高登D故咁?

Sarah:「阿明?做乜呀你咁既樣既?係咪有乜事?」

我:「eh…點講好呢…」

Ellie:「係咪樓下發生咗咩事?有關大家姐或者二家姐?」

嘩Ellie一睇就睇得出呀?會唔會太勁? 

我:「嗯…岩岩落去幫你地拎野飲個陣…見到大家姐同二家姐準備出門口,二家姐仲話佢要去東京旅行散心…你地知唔知道呢件事?」

我問完之後就同佢地幾個交換眼神,睇下佢地對呢件事有乜睇法,而佢地既眼法俾出既答案亦同我預計既差唔多,大家都係感到疑惑。

Sarah:「無聽過wor…二家姐真係咁講? 」

我:「係啊…仲話覺得呢排太攰,想出去行下咁喎…」

Ellen:「咁可能二家姐真係想自己去下旅行啫,點解阿明你咁在意? 」

Ellie:「係咪二家姐仲有同你講D乜? 」

而家輪到我一個比佢地五個望住。

我:「二家姐…仲突然攬咗我一下,叫我將個擁抱轉交比Sarah你,就係呢個我先覺得好奇怪…平時二家姐又點會咁做… 」

「你地話喇,二家姐係咪好奇怪先?」

我咁問完之後,間房靜咗一陣,直至Yui開聲問我。

Yui:「阿明你覺得應該點做…?」

我:「你話…我地係咪應該去機場問清楚二家姐到底係咪有咩事唔開心呢…?話哂大家都係一家人…」

Ellen:「嗯,一於咁決定啦。」

Anna:「車已經準備好啦,可以隨時行得。」

Sarah:「大家姐話佢地而家仲有段時間先到機場,如果我地而家即刻去追既話應該仲趕到既。」

我句野只係岩岩講出口,佢地三個居然已經即刻俾到反應我。

Ellie:「而家就只係等阿明你咋。」

反而係等我呀?

我:「嗯,行啦咁。」

就係咁,我地六個人上咗Anna屋企既車,開始向機場奔去。

多得Anna司機神乎其技既駕駛技術,我地唔洗半個鐘就去到機場。

透過大家姐暗中既通訊,我地亦得知到二家姐仲未入閘,仲同大家姐一齊係機場行緊。

所以,我地可以好快而且好準確咁去到佢地既位置。

事前完全唔知情既二家姐見到我地六個著住校服出現係度當然係好驚訝,不過都只係一𣊬間。

好快佢就收起驚訝,改為擺出「無你咁好氣既樣」向我地走埋黎。

二家姐:「你呢…真係無一次可以做好我叫你做既野架喎… 」
佢所指既「你」仲可以有邊個?咪只會係我囉。佢仲走埋黎用手指彈我額頭,好鬼死痛。

二家姐:「話咗唔好要佢地專程抽時間黎一趟機場,做乜仲黎,你地唔係好多野忙緊咩。」

我:「唔係呀,因為…」

Sarah:「二家姐!! 」

我說話都未講完,Sarah就已經撲咗入二家姐懷中,抱到二家姐實一實。

二家姐:「Sarah?做乜呀你?點解無啦啦喊?係咪有咩唔開心?話俾二家姐知! 」

Sarah:「因為…二家姐你好似唔開心囉…仲唔開心到話要去旅行散心…」

「二家姐你到底發生咩事呀…?我地係一家人,有咩唔怕同我地講架… 」

聽到Sarah咁講,二家姐靜咗落黎一陣,只係繼續攬住Sarah,但過咗無耐佢又放開咗Sarah。

二家姐:「做乜你會咁講啊?邊個同你講話我唔開心? 」

Sarah:「阿明囉,佢話你話要去東京旅行,問我地事先知唔知,仲話你D行為好似有d古怪,怕你係因為唔開心但又唔想講出黎,所以我地先趕出黎囉。」

二家姐:「哦~~Sarah乖,二家姐無事,只係覺得近來太多野要處理,覺得有D攰,想任性下黎個即興旅行啫,唔係你諗既咁。」

佢講完就輕輕推開咗Sarah,將Sarah放係自己身邊,之後就重新望住我,唔係,係啤住我。

二家姐:「你真係好鐘意亂諗野,我隨便講兩句你都可以聯想到咁多野既?

我:「咁…二家姐你無啦啦抱我真係好奇怪吖嘛,你唔怪得我會咁諗架喎…」

二家姐:「係,係我唔好,我唔應該同你呢個白癡講咁多野,搞到我自己成為我寶貝妹唔開心既原因。 」

「時間都差唔多啦,我要入禁區啦。」

二家姐講完就轉身準備離去,但Sarah眼明手快,即刻捉住二家姐唔比佢走。

Sarah:「你會返黎架可?」

呢個問題,我都好想問,但又唔敢問。

二家姐:「當然會返啦,話哂我屋企,我可愛既細妹們都係呢度呀,我又唔捨得唔返黎? 」

「兩星期後見啦,雖然係因為某D誤會,不過都好多謝你地黎送我機,我會買手信比你地架啦。」

佢笑住咁同我地講,之後就開始向閘口走去,今次再無人攔佢。

大家都目送二家姐既背影離去。

可能…真係我諗多咗?