「無啦啦多左幾個家姐同細妹 Season 2」: 何處
之後Anna鬧咗我地一餐，話我地做乜係學生會室度玩，不過都只係話咗幾句，之後就叫我地快D食飯。
一打開飯盒，Ellen就衝埋去狂掃，我地幾個都唔敢食住，打算等佢食飽先。
不過，我諗我有D後悔呢個決定，因為當佢終於離開D飯盒既時候，幾乎所有飯盒都可以用「空空如也」去形容。
估唔到佢都會咁大食…Sarah佢地都嚇一跳。
最後，我地五個都係靠小食部同學生會入面既小食填飽個肚。
Ellen：「呼~~食飽飽，舒服哂~~D手手腳腳終於返黎囉~
」Ellie：「精神返嗱？
」Ellen：「嗯，訓咗覺，食咗餐飽，又比阿明揹過，梗係精神返哂啦~
」「話時話，你地係點樣入到黎架？邊個開門比你地？Yui？」
Yui：「嗯，係啊，做乜？
」Ellen：「你點可以隨便帶外人入黎學生會室架，我地呢度有好多機密文件架。
」Anna：「Sorry囉我地呢D外人唔應該係度，唔應該擔心你係咪唔舒服。
」嘩，Anna唔通想發火？
我，Sarah仲有Yui察覺到形勢唔係好對路，大家都紛紛向後退一步。
Ellen：「講下笑啫~唔係咁都嬲呀~~？你地又點會係外人呢~~
」Anna：「哼，嬲呀，咁熱走出去幫你買埋飯返黎無得食不突止，仲要比人話係外人喎，點會唔嬲？
」「除非你俾我個soc下次book場排先啦，咁我就唔嬲啦。
」Ellen：「哈哈呢個既話你就要問阿明啦，話哂佢地贏咗學會接力，場地優先權係佢地度。」
Anna聽到之後就擰過黎望住企係一邊既我，無啦啦燒埋我個疊都有既。
Anna：「唉，算啦唔玩啦，夠鐘返上去未？」
喂做乜突然又唔講唔嬲？因為我所以唔想再講？
Ellen：「唔…仲有D時間咪留係度涼多陣冷氣傾下計囉~~係喎話時話阿明我俾你份禮物你打算點用？」
我：「禮物？你幾時有送過禮物比我？
」Ellie：「家姐指既應該係陸運會個陣比你同你學會既人個D呀。
」Ellen：「真係不愧係我細妹，一下就知我想講乜~
」哦…原來係講緊E神D飛…
我：「我諗我或者俾其他人啦，得一張我自己去又唔係，比你地其中一個又唔係。
」Ellen：「哈哈，你果然會咁做呢，不過如果你真係想睇既話咪去囉~
」我：「唔啦，同你地一齊去先好玩架嘛。
」Ellen：「講起好玩，我Daddy朋友聽晚有個party，我打算帶埋Kathy去玩喎。
」又Party？會唔會又有事架。話咁快又過咗日，今晚就係Ellen講既party。
原本我以為我地唔洗去，因為係Ellen屋企個邊架嘛，點知大家姐話我地都收到邀請，今晚都要去。
就係我換好衫，坐係梳化度等其他人換衫既時候，大家姐走咗埋黎坐低。
今日佢著既係上次我地去行街買既衫，一條紅色長裙，顯得優雅大方又大波。
大家姐：「做乜鄒哂眉咁呀好細佬？有心事？話俾大家姐知啦~~」
我：「哦無呀，只係有D怕咗去呢D場合啫，你知啦我…
」大家姐：「哈哈真係同阿may講既一樣，唔洗咁驚喎，有我係度唔怕既。」
「其實好多都係好人黎，唔洗擔心咁多，不如諗下一陣去到有乜好野食，有乜靚女仲好啦。」
我：「二家姐？二家姐講過D乜？
」大家姐：「eh…哈哈嘩Sarah你地黎嗱？個個都好靚咁喎，咁我地快D出發啦，我地做賓客既遲到就唔好啦。
」大家姐巧妙咁避開我既問題，帶住我地三個坐車去會場。
今次呢個party因為Uncle同老母去咗巴黎，所以我地屋企又係得我地D後生既去，二家姐仲要去咗日本，所以人數更加少。
話說二家姐唔係度感覺真係有D奇怪，唔知佢而家係日本做緊乜呢？食緊三文魚？
咁諗一諗搞到我突然好想食壽司添，唔知個度有無得食呢。
好快，司機就送到我地去會場，W hotel。
當我地黎到既時候就已經有好多靚車泊咗係度，即係代表應該有好多人到咗。
我：「呼…」
Sarah：「唔洗咁緊張喎阿明，你睇下你已經成頭汗喇。
」Sarah一邊講一邊用紙巾幫我汗。
無錯，我莫名其妙咁緊張，背脊同額頭都好多汗。
我：「唔該，我諗我一陣入到去應該要去洗手間…」
我原本想話去洗個臉，但我突然諗上次係慈善基金發表會洗臉所發生既事，所以我即刻打消呢個念頭。
諗起都覺得恐怖。
大家姐：「係咁驚既話就拖住大家姐隻手一齊上去啦，等大家姐俾勇氣你~
」Sarah：「大家姐！要拖都係我同Yui拖啦，我地係阿明既女朋友黎架。
」大家姐：「但Daddy同Auntie唔係度，我就係你地既監護人，我話拖阿明就拖~
」Sarah：「邊有得咁架…阿明都17歲啦，仲邊洗監護人。
」我：「唔好嘈啦~多得你地我而家完全唔覺得緊張啦，我地快D行啦。」
其實我講大話，仲係好緊張，好怕D人會用奇怪眼光望我。
不過，真係同二家姐講既一樣，我諗太多，根本無人留意我。
Anna Ellen佢地過咗一陣就到咗，同其他人談笑風生，而我就企係大家姐旁邊飲我既fruit punch，𥄫下女咁。
好快，我就注意到有人同我一樣咁唔自在，就係Ellen佢帶黎既Kathy。
佢企係Ellen旁邊陪Ellen同其他望落同我地年紀差唔多既男女傾計，但表現得好尷尬，好想搵機會走咁。
直至佢見到我同大家姐，終於搵到佢既甩身機會。
佢一望到我同大家姐就走埋黎我地呢邊，好似想向我地求救咁。
佢急到差d撞到人，差d就成裙都係紅酒。
不過黑色裙濕到紅酒應該唔會好覺眼，所以應該唔會係大問題…？
唔係喎，重點唔係係度。我做乜鬼。
佢幾經辛苦，排除萬難，終於走到黎我地呢邊。
佢喘哂氣，而我就氣定神閒飲緊我既fruit punch。
大家姐見到佢咁就即刻拎咗原本我打算飲埋佢既fruit punch俾Kathy「定驚」，仲開始同Kathy寒暄。
大家姐：「哇Kathy妹妺你今日好靚呀，套衫好襯你！
」Kathy：「多謝…套衫係Ellen比我架。佢今朝仲揀咗好耐先揀出呢套比我，話呢套最襯我。」
大家姐：「係啊~？Ellen眼光同品味仲好好喎咁，點解你喘哂氣咁呀話時話。」
Kathy：「eh…其實我唔知應該點好，我係第一次黎呢D party…D人好似全部都有頭有臉咁…我好怕自己會失禮…我失禮既話可能會令到Ellen無臉…
」大家姐：「所以你就咁緊張？一見到我地呢d熟人就即刻走埋黎哈哈。
」Kathy：「係啊…始終同D識既人係埋一齊會安心D…頭先Ellen帶我去同佢d uncle傾計我真係勁驚…好怕會講錯野或者做錯野…」
大家姐：「估唔到有人同你一樣喎阿明，咁你兩個今晚痴埋一齊就岩啦~咁你兩個咪唔會緊張囉~
」大家姐…點解要係人地面前踢爆我呢…
Kathy：「一樣？阿明你都緊張？呢d party你唔係已經去慣去熟架咩？
」我：「唔好聽我家姐亂講，你見我而家緊張咩？
」Kathy：「eh…檯面D fruit punch…都係你一個飲哂？
」佢咁講一講我先發現自己原來已經飲咗五杯fruit punch，到底係幾時既事。
我：「eh…」
大家姐：「咦我有朋友黎咗，我過去打個招呼傾兩句先~你地慢慢傾啦~
」我：「喂大家姐…
」叫都叫唔住，佢已經走咗去搵佢既朋友，留低我同Kathy兩個。
偏偏呢個時候Sarah佢地就行開咗…早知唔同佢地講話D野好好食啦…
都唔知同佢講乜好…好尷尬呀…
我一邊飲fruit punch一邊不時望下佢，見到佢都係同我一樣飲住fruit punch，環顧四周。
屌，又飲完一杯，再叫多杯先，，咁岩就有個侍應經過，岩哂。
我：「唔該俾杯fruit punch我吖。
」Kathy：「麻煩你俾多杯fruit punch我吖。
」我地兩個同時講出呢個說話，唔只我地自己，就連個侍應都嚇親。
之後當然係大家一齊笑出黎啦。
Fruit punch好快就送到我地面前，我地又可以繼續飲。
多得呢個神同步，我對住佢開始無咁尷尬，佢都係一樣，大家開始傾計，講既內容都係關於學校既多。
我話佢知佢陸運會出現完之後又突然唔返學搞到大家好擔心，尤其係阿希。
我仲「唔小心」咁將阿希既「找數計劃」話咗比佢知，佢聽完都係一笑置之，話阿希真係創意十足。
好快，我就唔小心問咗佢到底有乜煩惱，今次真係唔小心，講得太high一時忘形就講咗出黎。
Kathy：「其實都唔係咩重要野既…只係我覺得自己係時候認真諗下自己之後應該點行啫。」
「我應該去邊度先係？」
嘩…呢個問題…