家姐:「始終都唔肯同佢講,咁真係好咩?」

我:「有咩唔好啫,而家咁樣咪幾好,睇落佢今次終於生性咗小小,或者之後就真係可以有所成長,唔會再渾渾噩噩又或者走火入魔,咁應該會係大家都想見到既發展。」

家姐:「仲好講,唔係你之前一直唔肯放手,邊會搞成咁,或者阿明一早就可以獨當一面啦。」

我:「係係係,係我唔好,所以我而家咪已經放手囉,之後既事就等佢自己搞掂啦。」

「不過如果到時有咩事佢又搞唔掂既話,必要時就要靠你啦家姐。」





家姐:「哎,你明知我唔識handle呢D野架。都係留返俾你啦。」

我:「唔得啦,你知道我…」

家姐:「我意思咪就係叫你唔好去囉,留係度陪住佢,睇住佢大喇。」

我:「唔啦,你知道我一早就已經plan好哂所有野,就連個慈善基金都係為咁無後顧之憂先…」

家姐:「我明…之但係你捨得咩?你唔想留係度睇住佢地咩?你對佢…」





我:「但係我有更想做既野啊,媽咪個陣講過想去既地方,而家等我幫佢去啦。」

家姐:「但係…」

我:「唔洗但係啦,決定咗就係咁啦,反正我又唔係話唔返黎,你咪當我去咗旅行咪得。你想出去定留係度睇我換衫?」

唔係咁講都唔知點送走佢。

呼…奇怪喇,點解而家心情咁複雜既?我到底係開心定唔開心?





唔洗再哂咁多心機幫佢打點前路,打響名堂,真係成身鬆哂。

早排為個基金忙住傾九萬幾個合作忙到隻狗咁,而家唔洗再煩,真係正。

之後就真係可以全心全意去享受生活啦,諗起都正。

咁多開心野等緊我,點解我個心好似仲係拿住拿住,好似比人扼住咁?

點解我個刻要縮沙呢,係因為見到佢聽完我講個句「我愛既細佬妺」既反應?

佢真係蠢到一個點,講咗咁多野,咁都睇唔出我既意思。

不過咁都好既,多得佢既遲鈍,事件先無走到去一個無可挽回既地步。

「二家姐」同「細佬」呢個關係,我好滿足,亦唔想有咩變化,而家咁樣就好。





而家咁就應該無我既事啦,佢唔再需要我幫佢,啊唔係,其實一開始佢就可能唔洗我幫,只係我太過擔心先做咗多餘既野,反而限制咗佢。

或者真係同家姐仲有阿晨講既一樣,係因為我,佢先係度不停兜圈。

哂咗咁多時間,而家總算重回正軌,都唔算太遲。

雖然比起預期係快咗D,不過都唔影響到我個時間表,搞掂埋學校既野就可以出發。

而家要做既,就只係等?有無其他野可以做下?應該有D地方我會想去,趁而家仲有時間要去咗先。

啊…去個度都好,反正上網睇到呢排天氣都會幾好,應該都會睇到唔小星星。

一於咁決定,過兩日就去。





如是者,同死人老豆交代咗事情既來龍去脈,再同公司幫手營運基金既同事交代之後,結果過咗成個星期先搞掂。先有時間比我準備返去馬鞍山間屋。

今朝天文台話成日都會好天,而且仲會無乜雲,可以話係天都幫我。

我無叫司機車我,而係自己坐車去,雖然用多咗時間,但反而令人增添咗一份期待,好想快D去到。

我真係矛盾,做乜都咁矛盾。

都係去到間屋,睇黎入面有乜野淨先決定出去買D乜喇。

於是,我無係馬鞍山行街,而係直接去間屋。

一入到屋,好多以前既回憶都湧咗上黎。

呢度既一磚一瓦,都令我諗起每一次黎既情境,幾乎每次黎都係唔開心,掛住媽咪先會黎。





唔?點解個架上面會有六個玻璃汽水樽既…?我走埋去,隨便拎起其中一個樽黎睇,見到上面畫哂野,好多心形仲有D字。

寫住Yui…即係呢個樽係泳琦既?

仲有個花字…係咩意思呢…

我再拎起其他幾個樽睇,全部都寫住佢地幾個個名,仲每個都有一個單字。

我將六個樽排埋一齊,組合好呢六個單字。

「我的秘密花園」

原來係咁,又幾有心機喎個幾隻野,見到都覺得青春。





我再環顧四周,細心D睇先發現原來呢度有唔少野唔同咗。

多咗幾隻杯,又有幾盒玩具,大富翁,層層疊,UNO,仲有部PS4係度,幾時放低咁多野係度架。

你班友吖…當我呢度Party Room?上次借比你地玩一次咋喎,當正自己地方?

唔洗問肯定係家姐叫佢地咁做架啦,連我呢個最後既淨土都要入侵埋,你真係有辦法呀陳煒明。

算喇,都唔係咩大問題,佢地又執得呢度企企理理,由佢地啦。

我係睇完間屋仲有咩野食淨低之後就出咗去,去咗附近既商場行,睇下買唔買到D乜野。

一個人就係自在,想食乜都係自己話事,真係特別開心。

附近既商場唔係好大,只係得一間超級市場,不過都無乜問題,要買既野都可以搵到。

買咗D餸,麵條,小小野飲仲有零食,只係住一晚,呢D分量點都夠我一個人食啦。

買完野之後我就慢慢行返去間屋,放好D食材,再係間房度hea。

就算D野已經比我搬走咗,但一坐係度,所有野都好似無改變咁,係我眼中,房入面既相冊,飾物同衫都仍然仲係原封不動咁係度。

媽咪…如果你而家仲係度既話,你會同我講D乜?你會話我好傻定係讃我?

我真係好掛住你,好想同你傾計…

坐坐下,不自覺就訓著咗,再擘大眼望出窗外既時候,太陽就已經幾乎沉哂落海底咁濟。

拎個電話出去睇,已經差唔多七點,都係時候去準備我既晚餐。

今晚打算煮比自己食既係番茄蘑菇意粉,雖然話係得我一個人食,其實我準備咗二人份量。

我都唔係好明點解自己會準備二人份量,或者我係想煮埋比媽咪睇?

呢個意粉係以前媽咪成日煮比我地食,個陣我地覺得媽咪好叻,竟然可以煮到咁好食既野出黎,大個自己試整先發現原來一D唔難煮,真係傻。

不過雖然係煮到個大概味道出黎,但始終都同媽咪煮既有D出入,應該係我廚藝未到家啦。

係差唔多煮好既時候,我聽到屋外傳黎男女既吵鬧聲,兩邊既聲仲要非常熟悉且愈來愈近咁。

我無意識咁伸個頭出廚房望去門口,而大門亦咁岩係呢個時候被打開。

出現既,居然係佢地六個。

阿明:「咦二家姐,點解你會係度既?」

點解佢地會黎咗既…?

Ellie:「咩叫點解你會係度既呀,呢度本來就係二家姐既屋…所以我先話唔好黎呢度打攪…」

阿明:「啊係喎,唔係,我梗係記得啦,我意思係二家姐你唔係好少返黎呢邊架咩,大家姐都係咁都同我講我先敢黎…二家姐你突然返黎呢度係咪有乜特別事?」

果然係家姐呀…豈有此理吖…

我:「無,只係一時興起想返黎呢邊啫,家姐係點同你講,你又點解會想黎呢度。」

阿明:「啊呢層真係說來話長…」

佢之後就講咗一大堆廢話,簡單咁總結一下就係佢又一次好好反省過自己對Sarah佢地既態度,覺得自己對佢地未夠好,未夠似一個稱職既男朋友。

佢想可以同佢地多D一齊玩,唔想成日留係屋企,於是家姐就推薦佢地黎呢度,仲話可以成日黎,當呢度係Party Room就可以,所以佢地就決定而家幾乎每一個禮拜六都要黎一次。

聽完之後我忍唔住為家姐既自作主張嘆咗一口氣,唔怪得佢地會放咗咁多野係度啦…原來係家姐叫佢地當呢度係Party Room咁…

Sarah:「二家姐我地係咪阻住你呀?如果係既話我地而家就走吖。」

我:「唔係,無乜所謂既我,不過…」

Ellen:「咩味咁香啊?」

弊,唔記得自己煮緊野添!

多得Ellen一提,我即刻走返入廚房繼續煮我既意粉,好彩無煮過龍。

花咗少少心機擺好碟之後,我先發現原來佢地六個都望住我同兩碟意粉。

我:「有乜出去廳先講啦,唔好堆哂係個廚房度。」

佢地幾個都好聽話,即刻好似一班鴨仔咁一個跟一個行哂出去廳,好可愛,令人不自禁笑咗出黎。

放低兩碟意粉之後,佢地都蜂擁埋去檯邊望住碟意粉,個個額頭好似都寫住「想食」兩個字咁。

我:「想食既話就食呢碟啦,反正我煮多咗,自己去拎碗筷啦。」

一聽到我話可以食,佢地即刻表現得好開心,幾個都衝哂去廚房,唯獨陳煒明條友仲企係度望住碟意粉。

我:「望乜呀去幫手啦你。」

阿明:「無…只係無諗過二家姐你都會識煮野食,不過點解你會煮兩份既。」

我:「無,唔小心煮多咗啫。」

Sarah佢地好快就拎咗碟出黎,再由Yui三扒兩撥咁將碟意粉好好咁再分成六份,一人拎住一碟係我面前食。

一人份量既意粉分比六個人食,都唔洗一陣就食哂。

Sarah:「好好食啊…」

我:「好食就好喇,不過你地黎呢度有乜玩?唔會係偷偷係度搞野掛?」

聽到我突然咁講,佢地即刻面都紅哂,Yui仲即刻dup低頭。

Ellen:「我地邊敢喎二家姐,我地呢度好多野玩架,又有PS4又有好多boardgame,你玩唔玩?」

Ellie:「除咗係屋入面之外,我地仲會出去玩架,頭先我地就去咗沙灘睇日落。」

Anna:「我地仲買咗餸,Yui話佢煮飯比我地食。」

我:「哦?睇日落咁浪漫呀?咦你地玩煮飯仔咁咪變咗我阻住你地囉?」

阿明:「唔係,邊會呢,不如二家姐你都同我地一齊食飯?」

我:「我…」

Sarah:「係囉係囉!二家姐你頭先煮咗碟意粉比我地食,而家等我地煮返比你食喇。」

Yui:「二家姐你想食乜?我會盡力煮…」

我:「無所謂啦,你煮乜我咪食乜。」

原本想拒絕佢地,但見佢地咁盛意拳拳,由佢地啦。

Yui Sarah仲有陳煒明走咗入廚房,而Ellen Ellie仲有Anna就同我係廳玩UNO。

點解會變成咁架…我個計劃明明係自己一個係度架嘛…

玩玩下UNO,Anna忽然問Ellen個汽水樽洗好未,Ellen即刻嚇到將手上既牌都dup哂,衝去搵自己個袋,仲係入面拎咗個同架上面一樣既汽水樽出黎。

我:「咩黎架?我見個架上都有幾個?」

Ellen:「哦呢幾個汽水樽係阿明第一次帶我地黎呢度既時候同個麵店老闆買當做留念,之後我地就自己裝飾個樽,架上呢幾個已經係第二個喇,係為作裝飾呢度所以再整既。」

「咦咪住先…阿明!!」

Ellen好似忽然諗到D野,衝咗去廚房搵陳煒明,過咗無耐又同Sarah跑返出黎,兩個個樣都好興奮咁。

Sarah:「二家姐你不如同我地一齊都整返個樽放係呢度吖!」我:「吓…做乜無啦啦要我整?」

唔知係因為佢地咁突然定係因為我太敏感,聽到Sarah咁講我其實真係嚇親,只係我控制住自己表情,唔比佢地發現。

同你地一齊…真係吖突然咁講。

Sarah:「無啊因為間屋係二家姐架嘛,咁你都應該同我地一樣放個可以代表自己既野係度先係~」

Ellen:「哇講到咁好聽既你,我係諗起我地仲差個字先打算搵二家姐咋。」

Sarah:「喂呀你咁樣講咗出黎二家姐咪會唔肯囉!咁蠢架你。」

啊啊,原來係因為唔夠數所以先叫我既。

我再追問原因下得知佢地原來之前係想用可樂樽砌出「我們的秘密花園」七個字放出黎,但奈何佢地只係得六個人,一人一個既情況下只可以變成「我的秘密花園」。

今日佢地準備既呢個新樽,就係打算寫哂六個人既名落去,話係無辦法之中既辦法。

我:「唔係吖,寫哂六個人個名都係個幾好既主意,唔洗我啦。」

Sarah:「唔係呢,我同阿明都想二家姐你整呀,因為你,我地先可以有呢個祕密花園,應該都要有你份先岩。」

我:「你地係咪真係咁諗架,唔好用D花言巧語氹我喎。」

Sarah:「真係架,咁樣比起寫哂我地個名上去仲好。」

Sarah既請求我從來無辦法拒絕,今次都係一樣,最後我都係應承咗。

我一應承咗之後Ellen佢地即刻係唔知邊度拎到一大堆顏色筆出黎比我,仲圍係我旁邊教我應該要點裝飾先係。

同呢幾個妹妹玩下玩下,都唔知整咗幾耐先符合佢地既要求。

一交到貨佢地就即刻將個樽放上架,仲不停影相。

我個樽係代表「們」字,好自然就放咗係有「我」字既樽旁邊。

我而家先留意到,「我」字既樽原來係陳煒明既。

而陳煒明亦係呢個時候同泳琦係廚房拎住幾碟野食出黎,時間可以話係岩岩好。

泳琦既廚藝絕對無需懷疑,煮得出黎既都非常好味,係平時係屋企食到既味道。

雖然明明係平時係屋企食到既味道,佢地幾個依然食得好開心,好似第一次食咁。

我自己都不知不覺咁比呢種氣氛感染到,同佢地笑埋一份,開開心心咁食呢餐飯。

食完飯,原本我想幫手執碗,點知去完個洗手間出黎所有碗碟已經拎哂去廚房,由陳煒明洗緊。

又幾快手喎佢…

之後終於到我自己今日最期待既節目,觀星。

我無叫佢地一齊睇,我只係自己一個靜靜咁上天台自己睇。

期待咗成日,總算無令我失望,今晚既天空同星星都好靚,可以話係喜出望外。

媽咪,你會係邊粒星星?你係咪都係度睇緊我?

唉,我真係傻傻地,居然開始係度自言自語。

呢度既星星咁靚,唔知下次再睇到會係幾時呢。

「啊,你果然係度。」

一聽到身後有人聲,我就馬上轉身,就見到佢企咗係度,呢個「佢」當然係指陳煒明。

佢慢慢走黎我旁邊,最後仲坐低咗。

我:「上黎做乜,唔係下面陪佢地幾個?」

阿明:「哈哈我都唔知呀,我始終都係覺得二家姐你係有D事所以先會突然走黎呢度,點都放心唔落咪走上黎睇下。」

「不過可能係我諗多咗啦,你知啦你都成日話我亂諗野。」

我:「嗯,知道就好,你而家咁幾好吖,真係似返個似樣既男朋友。」

阿明:「係啦,我都知道自己要對佢地好D,我仲開始操體能同跟晨哥朋友學拳,希望就算遲D發生咩事我都有辦法保護到佢地。」

「啊,我咁講當然唔係期待又有咩事會發生,只係有備無患,買個保險啫。」

哦…?真係同家姐仲有阿晨講既咁,佢真係可以成長唔少喎…早知係咁我就一早放手喇。

阿明:「咦?講開又講,我地終於可以一齊睇星星啦喎?」

我:「你仲記得?」

阿明:「記得啊,都唔似好耐之前既事啫點會唔記得,哇D星星真係好靚。」

我自己都差D唔記得,佢居然仲記得?

我望住佢,望住正係抬頭觀星既佢。

我:「你有無興趣黎我學校同我影畢業相?」