一個遇上女神，再忘記她的故事: Chapter 23

Tracy說完後，我簡直不相信自己的耳朵，我為CaRmen做那麼多，三年的光陰消費掉，得不到她的首肯，然而卻無聲無息地影響著另一個人。
 
以往我聽前輩說過不要馬虎做任何事情，因為你永遠無法估計有誰人會一直留意你做事。我以為這金句只適用於職場，想不到連情場也是這樣。
 
「但係呢Tracy，」我放開了她說「其實我唔值得你愛架，我唔係一個好既男仔，我都想講樣野你知。」
 
「好吖。」
 
「其實嗰次我濕完Karl一鑊之後，我比人拉左，差人要告我普通襲擊罪，而家我仲揹緊擔保，雖然坐監機會好微，但都要守行為，難道你會接受到同一個犯過法既人一齊?
 




再者，你都知我又食煙又飲酒，成個麻甩佬咁，樣又唔討好，唔值得你去愛架。」
 
Tracy想了想，然後回答。
 
「犯左法咁又點?你細路仔讀書嗰陣冇試過抄功課?冇試過犯校規?每個人都犯過錯架啦，問題係犯完錯之後有冇反省。
 
你知唔知我有一個心願，就係喺事業上摶殺完想追求安穩既時候，我會開一間簡單既茶餐廳又或者三文治檔，個理念同一般中小企好類似，但我只會聘請釋囚，一個有案底既人要去重新投入社會係一件好難既事。
 
有案底絕大部份既公司都唔會請，咪搞到啲釋囚想改過既機會都冇，最後為生計咪重返歪途囉。我想比個機會佢地去改過自新，個咁冇腦既政府成日賣廣告話生命冇Take Two，其實只要肯改過，生命真係有Take Two架!間餐廳我都諗好埋名，就叫Take Two。我連釋囚都接受到，點會接受唔到一個只係守行為既人?
 




再者，你食煙飲酒我雖然好唔鍾意，但我覺得如果有機會一齊，我可以慢慢改變你，你本質根本唔壞，點解要去做啲傷害自己身體既野呢?仲有，你話你個樣唔討好，咁唔通靚仔先有機會拍拖?男人最緊要上進，有決心有毅力，樣呢啲野根本唔重要。
 
我講咁多，其實係想話你知，如果愛一個人，你唔會介意佢身份唔會介意佢所有唔好既人，每個人都有去愛人既責任，亦都有被愛既權利，李智傑，你有權去得到愛架，你已經係一個條件好好既人，唔好諗埋一邊啦。」
 
「被愛既權利…我有咩?哈哈。」我自嘲的問。
 
「你唔信我講樣事實你聽，我知道有一個癮君子，佢一路有食白粉既習慣，但同一時間，有三個女人供養佢之餘甚至比埋錢佢食白粉，而呢三個女人都互相知道大家既存在，你話佢值得愛咩?但佢係一個毒癮好深既道友。你話佢唔值得愛咩?但同時間有三個女人無條件對為佢付出。
 
愛情係一樣好奇妙既東西，冇對與錯，冇好定唔好，喺我立場，只要我認為我愛嗰個男人，佢就係最好，唔輪到旁人去說三道四，包括你。你有權唔愛我，但冇權阻止我去愛你」