一個遇上女神，再忘記她的故事: Chapter 44

「喂，做乜呆左喺度?」飯局中，CaRmen問。
 
「冇，你曾經講過話可以食食下飯訓覺，我特登唔出聲，睇下你會唔會訓著。」我回答。我記得，你如此說過...
 
「哈哈，我飲左咖啡好精神呀。係喎，我地識左幾耐呀?」
 
「差唔多七年喇，我仲記得嗰一句嘩頂吖...爭啲遲到。」說完我會心一笑。
 
「哈哈，係呀，咁快就七年，呢句其實係我口頭禪黎架。」
 




「我知道...你Year 2第一日上堂講過，我上庭嗰日又講過。」
 
「你都幾好記性喎。」
 
「雖然你冇選擇我，但你每一句說話，我都記得。」
 
「例如呢?」
 
「最記得咪你成日SMS覆我一句「嗯「字囉，你嗰啲傻佬呀BB呀咁囉，仲有成日話男人冇本心囉，仲有仲有...」我想說，但開始失笑。
 




「仲有咩呀?」
 
「仲有你話你驚入到U冇人陪，所以我轉U陪你，仲有你同宇軒分手嗰一幕囉。」
 
「喂，可唔可以講啲開心啲架?」
 
「哈哈，你話你成日唔小心整爛啲USB，我就笑你係USB終結者，啲Mouse呀USB手指呀成日比你唔小心整斷，我嗰次仲傻到一次過買十隻USB同三隻Mouse比你。」
 
「哈哈，你後生既時候真係好傻。」
 




「我係架，有次你又唔知幫嗰啲乜野瀉藥做Model，仲叫我去試，搞到我屙足三日。」
 
「咩呀，嗰隻叫瘦身清呀，好好賣架，傻!」
 
「我傻?我都唔夠你傻啦，成日訓訓下喺自己張床碌落黎，又要驚但又要半夜三更開著個收音機聽鬼故。好彩我冇揀你，如果唔係我要成日喺床尾執你番黎，又要聽住鬼故陪你驚。」
 
「咩喎，乜我而家好差咩?」
 
「唔係，係我差啫。」
 
「車，唔鬼理你，喂食埋甜品我地行下落下格咯。」
 
於是我和CaRmen用膳後，便來到上環的海傍散步。一個令我充滿回憶的地方。我第一次見証她分手，第一次攬著她，第一次跟她身體如此貼近的地方...
 
一段感情結束後，我們習慣去逃避那些令我們充滿足憶的地方，因為我們怕觸及那藥引，把以往的情感引爆出來。再勇敢的人，也需要一段時間才可闖過這關。正如我跟Tracy分手後，我再也沒有到南山村品香樓用膳、沒有到城峰閣品嚐32元的Tea Buffet。如果可以選擇，我們寧可把以往熱烈的感情埋葬，都不願意去從提舊事。




 
然而，今天來到這裡，一來是因為一種純粹的偶然，二來是我希望証明，今日的我，或許可以勇敢面對以往的種種。
 
「仲記唔記得呢度呀?」CaRmen問。
 
「記得，我第一次攬你嗰度吖嘛。」
 
「係呀，你條死PK仲要乘人之危。」
 
「咁最尾我都冇錫到你啦，你都冇蝕底...」
 
「唉見你之前鍾意我咁耐，又應承幫我簽保單，當我豪比你喇。」說完CaRmen便走過來，攬著我。我再次感受到她頭髪的香氣、胸脯的起伏、以及她如斯接近的呼吸。
 
只要再近一點...再近一點...
 




不，不用再近了，要近，便應該在五年前靠近過來...
 
理性的一方告訴我，這只是CaRmen對我的一種補償，以及我為她解決困難的道謝，然而感性的一方，卻不爭氣的將所有回憶全數打開...
 
「傻佬、BB。」
「Calling傻佬李智傑Calling傻佬李智傑。」
「你唔會好似其他男人咁冇良心架可?」
「咁…你會唔會繼續喺我身邊支持我架?」
「多謝你呀傻佬。」
「乜我有親口講過，我唔鍾意你咩?」
 
就在這時，CaRmen輕輕的在我唇上吻了一下。