一個遇上女神，再忘記她的故事: Chapter 60

我說完，很想哭，但我沒有哭，因為我答應過自己不能再孩子氣地流下眼淚。但眼前的Tracy，已經忍不住眼淚，不停的抽泣。
 
我把話說完，便提早離開聚會。離開並不是因為我要避開Tracy，而是因為我想Tracy考慮清楚會否重新認識我，一個在感情路上受盡傷害，但同時傷過她的人。
 
三日後，我收到一封電郵，是熊仔公司發給我的，裡面有Tracy的各項聯絡資料。
 
「喂熊仔。」我趕緊致電給他。
 
「點呀，都話你唔會後悔黎架啦。」
 




「多謝你，你一早知Tracy會黎?」
 
「唔係，其實係我叫佢黎既。」
 
「下?」
 
「雖然你冇再同Tracy聯絡，但我都有用朋友身份同佢keep contact，你中間有冇搵過佢?」
 
「有呀，不過打佢電話成日都唔通。」
 




「梗係啦，佢同你分左手後佢自己都改左電話，呢幾年佢感情路上都未係好穩定，有時我同佢食開飯佢都講，話好掛住你好唔捨得你。咁我咪叫佢係做下媒，順手叫你黎，睇下有冇機會拉番埋囉。」
 
「熊仔真係多謝你好意，但點解要等到而家先幫手?」
 
「因為而家既你，先似番個男人，先襯得起Tracy呀!」
 
我聽罷，再次回想自己以往所做的一切，為一個錯的女人，做了一些錯的事情，令我一生的命運截然不同。基本上在與CaRmen的生活相交的時間，我完完全全忘卻了自己的存在，只記掛著自己愛人的一切。在那時，我的確枉為男人，亦失去了自己的本色。
 
直到這三年，我把我的心思全放在維繫與家人的關係，以及工作上，才完完全全的為自己而活。由以往膽小，思前想後的小伙子蛻變成冷靜、決斷的成年人。
 




「我明白喇，熊仔，好開心你會見証到我有呢個改變，但我想問一個問題，嗰日Tracy有冇剔到我個名?如果佢冇剔而只係你一心想幫我而比佢Contact我，咁我未必會搵佢。」
 
「咁作為一個專業既Speed Dating公司，我地處理客戶既私人資料一向跟足程序做既。」熊仔的答覆，令我如釋重負。
 
「真心多謝你呀熊仔，你挽救左我條命，仲比多次機會我追番我以前唔識珍惜既野。」
 
「唔好咁快多謝住，聽晚八點鐘，有骨氣，比多個驚喜你。」
 
八點，有骨氣...
 
一圍火煱，兩支大啤，五位兄弟...
 
我、熊仔、達哥、軒仔、阿偉...五位三年不見的兄弟，我以為在友愛村的打邊爐事件，已令我們幾兄弟訣裂，想不到三年後我仍然有機會和他們對飲。
 
「喊出黎，估唔到Henry仔呢三年黎有咁大改變，我都真係好欣慰，呢招苦肉計果然有效。各位兄弟，點睇，講下!」三年不見，達哥依然貫徹他的口頭禪。




 
「嘩不枉我地當日咁大苦心忍住唔扶起你。」軒仔汗顏道。
 
「難道你地當日係有心唔扶番我起身?」我驚訝的問道。
 
「梗係!Henry仔你成日喊苦喊忽，以為喊完就可以冇事，以為有咩失敗挫折就有班兄弟去扶你，你都唔識自己企番起身。以我神算達既估計，你當年咁頹廢得一個原因，就係嗰個公廁CaRmen，我地其實一早估到，只係要諗一個方法令你徹徹底底咁醒，我地特登唔扶你，特登三年唔搵你，就係要迫你成長，迫你搵番自己，你明未?」想不到各位兄弟其實在最後關頭都沒有離棄我，只是以令一種方式去令我成長令我獨立。面對著這班兄弟的苦心，我又有不堅強的理由嗎?
 
「嘩!真係好多謝你地，你地呢一招真係好高，我已經完全醒晒，三年黎個人有番自信，仲完完全全知道我過既每一日係為左自己而活。好彩當日我自殺唔成乍。」畫面定格在三年前頹廢的自己，不禁叫我汗顏。
 
「講多野樣你知吖，其實我本身諗住走左就算，但達哥出於苦心，驚你會做傻事，所以叫我暗中留多陣睇下你搞乜鬼，好彩冇搞出人命乍。」熊仔解釋道。
 
「你地咁對我，我真係無言感激，搞到我有少少想喊添。」我回答。
 
「咪咁婆媽，今晚餐飯你請，當無數。」達哥一聲令下，我唯有唯唯諾諾的答應。
 




「Henry，既然重新做人又見番Tracy，有乜打算?」阿偉問。
 
「各位兄弟，喺答之前我想問一個問題，今日你地再見番我，如果你係女人，你覺得我係咪一個可以付託既人?」我問道。
 
「我達哥觀人於微，短短十五分鐘都見到你改變好多，你真係大個仔左。」達哥說。
 
「留意左你三年，就係放心比你見Tracy，先比個機會你。」熊仔也附和著。
 
「好，如果係咁，呢三年黎我做既野總算冇白費，我會再去追番Tracy，今次我唔會放手架喇，就算有十個CaRmen喺我身邊出現我都唔會分心，我知道而家既我係點，同埋想變成點。」我決斷地回答。
 
「好，祝你成功!」一聲祝福，再加上響耳的碰杯聲，像徵著我重生後的感情生活，開始了新的變化。