如是者,我們回到小小的倖存區裡,就開始計劃起來。


王達尼負責引開木匠老伯,我則潛入其家中搜索遺失的寶石袋。


倖存區雖然離繁華的寶琳不遠,但因為四周皆木林的關係,令這裡添上了一分郊野的景色。


沒有大量買賣不停的交易,也沒有喧嘩推銷的人們,大家都很木訥地專注在木材的成品上,連自己也快要變成木頭一樣。






就我所見,區內的倖存者都在專心工作或是休息時才會戴上軟木耳塞,日常要進行交際談話等工作,則不需要用上。


「就同佢講,我有興趣投資佢間木材加工廠‧‧‧‧‧‧」王達尼在路上,跟我說出自己的注意:「咁樣先引到佢行出屋企,同我去附近一路飲嘢一路傾~」


「好注意。」我們快到木匠的家了。






木匠老伯他的家,為三層高的村屋。


外牆還是玻璃都已經佈滿了植披,裡頭隱隱約約地飄來木頭的味道。


到達後,我躲在外面,背靠住牆壁,等待著王達尼把木匠老伯引出去。






「喂~漢木。」王達尼先敲了敲門,叫著某個名字。



漢木‧‧‧是這個老伯的名字嗎。


「點啊?黑鼠老闆,知你好傷心,但係唔好難過啦!」漢木,果然就是木匠老伯:「生離死別總有。」


「同啲貨生離死別,當然好傷心~不過點樣賺返啲錢先係關鍵,我諗係時候投資下你間木廠‧‧‧‧‧‧」王達尼那滿嘴錢臭的賤嘴中,很少人能聽出其失去同伴的哀傷。


漢木老伯滿心歡喜地問:「你真係想投資我間木廠?!」






「嗯~行出去傾下吧,你屋企啲木味我唔係太習慣。」


「附近有間嘢,係用啲松樹汁液混合沙糖仲有熱水嚟飲,幾正架!就去嗰到。」說罷,二人就徐徐地離開這間村屋。


也許這倖存區小小的,大家都互不設防,所以木匠老伯家的窗戶都沒有反鎖過,能扯斷亂生的藤蔓然後一手把窗戶打開,讓自己溜進裡頭。


入面如我不久前所見的一樣,放住各種的木製傢俱,長木桌上更放住一罐咖啡粉,害我想找杯熱水沖來喝喝。


第一層我用心地搜查過一次,基本上沒有什麼異樣。






而第二層,則放住了各種把木材加工的工具,看起來是漢木老伯自己私人的加工室,小到木刨大至割木機也有。


因為要搜查得全面的關係,我又用了幾十分鐘的時間在這一層。



「最後一層,」我望住那道被木板封住的第三層門口:「點解封住咗‧‧‧‧‧‧」


於是,我只好另尋方法上去。


那便是借著牆外的水管和藤蔓爬到去三樓的窗戶外,再開把窗開了進去。






「滴噠──」窗戶被打開了。


進去後,我發現第三層是放住一套珍貴的木製收藏品──火車模型。


包括道路、火車、小場景,都是木製的小玩具,看不出那老伯雖然年紀已老,但對玩具也有著這種興趣。


「‧‧‧」我無聊地把木製路軌上的木製火車,用手輕輕推了一下。


我也挺無聊的。






在我想繼續於三樓搜尋寶石的下落時,倖存區外突然傳來了「噹~噹~噹~噹~」的沉重,又緩慢的鐘聲,感覺像是喪鐘般令人心中發寒。


我下意識地走近到窗邊,打算觀望外面的情況。


在外面一貫正常的村民,聽到鐘聲後臉色稍變,大家面上添了一分的緊張,並快速地回到自己的屋子中。



木匠老伯也不意外,他不理會王達尼的拖延,直接急步回到屋子中。


「喂‧‧‧老嘢,咩事啊!?」王達尼追問。


「快啲!快啲入嚟!!」漢木老伯向他招手:「佢哋要嚟啦。」


「佢哋?」


「病者平權組織啊!」老伯似乎發現了屋中的一點異樣:「咦‧‧‧點解嗰窗口好似打開咗咁‧‧‧‧‧‧」


「風吹呱‧‧‧‧‧‧」王達尼替他關好了窗子。


「好似有人入過嚟‧‧‧」老伯疑神疑鬼地說。


聽到此處,我已經在三樓找了個木櫃去躲藏好自己。


「喂‧‧‧‧‧‧唔好上去啦,試下講俾我聽咩事先!點解病者平權組織佢哋會嚟啊~?!」王達尼問。


「你一陣就明。」漢木毫不理會,繼續在屋中周圍搜尋。


等等,我在躲什麼?



三樓的門早就被木板封住了吧,除非那個老木匠自己把木板拆掉去。


想到這裡,我就從櫃子中出來,不想困在窄狹的地方。


「噹~噹~噹~」鐘聲去到村子中央處。


是一群白衣教徒,的確如木匠老伯所說‧‧‧‧‧‧是病者平權組織的人。


沒想到,那些瘋子居然還未死透。


但他們到來的目的又是什麼?


「我嘅上帝!我今次有貢品俾你!可以供奉你!!各位天使,請你哋帶我去見上帝,我想見番我嘅家人!!!」一個衣著樸素,年約五十的男人從一間屋子中跑出:「帶我上天國‧‧‧‧‧‧」


「村長?你果然係最誠心,今次你嘅供奉係啲咩。」病者平權組織一位成員說。


「呢到!」那個被稱為村長的男人,從背後取了一依東西出來:「係寶石!貨真價實嘅寶石!」


「我啲寶石點解喺條仆街手上‧‧‧‧‧‧!」樓下的王達尼,似乎看到了什麼。



「即係‧‧‧」我凝望住窗外,那村長手上的一袋寶石:「嗰條友先係偷寶石嘅人。」


看來誤會漢木老伯了。


「喂‧‧‧喂!!黑鼠老闆,你想去邊啊!?」漢木老伯焦慮的聲音。


「拎返我袋寶石啊!」王達尼說。


「咪傻啦,對方唔可以睇小!」


得知寶石真正下落的我,輕輕力地打開了窗戶,在他們不為意時,順住藤蔓滑下去了。


「你當整跌咗啦啲寶石!」老伯的聲音還在屋內。


「擺明俾班友拎咗!我唔可以當見唔到!」王達尼把門推開,打算出去時‧‧‧‧‧‧就撞正站在門外的我了。


「咦‧‧‧乜你咁快‧‧‧‧‧‧」王達尼愣然地望住我。


「原來係個村長偷咗。」我抱住雙手,說:「仲唔跟蹤佢哋?」


「正有此意啊。」


「喂,你哋唔好啊‧‧‧!」漢木老伯叫住我們,說:「去咗嗰到嘅人,都會變成另一個人嫁!」



「老嘢,咩意思啊‧‧‧‧‧‧」王達尼不耐煩地追緊對方。


「一開始佢哋派人過嚟我哋村,叫我哋村長供奉出一樣嘢,就可以去天國見番自己家人,村長一開始都唔信,但直至有次試咗之後,成個人就好似變哂咁,每星期都拎大量物資供奉俾「病者平權組織」去換取乜嘢‧‧‧上帝嘅因賜,我唔想你哋都變成咁。」漢木老伯語重心詳地說。


「難怪呢個組織可以沒完沒了咁有物資運作落去‧‧‧‧‧‧」我心中當下明白:「原來除咗之前用公主威脅寶琳倖存區之外,仲有你呢啲小型倖存區都有份養佢哋‧‧‧」


「理得佢,」王達尼握緊拳頭,說:「我會用我嘅方法,去拎番袋寶石。」


「對方有十幾個人,就算跟蹤佢哋後面,都冇可能直接突襲對付哂所有人。」我也建議不要亂胡行動。


「跟到去佢哋地盤,我要連本帶利拎番自己啲嘢。」


「停,」我抓住王達尼的膊,說:「你唔好一損失咗少少錢,智力就即刻下降。」


「嗰條友‧‧‧‧‧‧」王達尼拳頭握得更緊,轉頭往後、怒視著我:「喺我死去嗰班同伴身上,拎走咗啲寶石,之後毫不猶豫咁供奉咗俾識都唔識嘅人。」


「我明,不過‧‧‧‧‧‧」我凝視住王達尼:「都唔好白白賠上自己條命。」



「嗄‧‧‧」王達尼低下頭,不帶感情地問:「嗰村長大概幾耐返到。」


「呃‧‧‧呃‧‧‧‧‧‧夜晚之前‧‧‧黑鼠老闆,你唔好咁傷心‧‧‧」漢木老伯說。


「好,我就等到佢返嚟。」說畢,王達尼就前去到村長的家中等待。


我和老伯一同目睹著王達尼憤怒的背影,離我們而去。


「老伯,每星期都會咁?」我見只餘下我們兩人,便問。


「係啊,已經一段時間。」漢木如實地說:「原本呢到都有好多居民,但佢哋出現之後,令一部分人開始信奉病教,最後仲拋棄咗呢到去做教徒。村長本來都想咁做,不過最後都係冇‧‧‧‧‧‧唉,似乎係對方想要利用佢村長嘅身份,去獲取更多利益同物資。」


「呢個組織‧‧‧想要連根拔起,似乎有啲難道。」我說。


「近乎無可能啦,就連你哋寶琳倖存區嘅皇政府都只可以趕走到佢哋,殺絕唔到,我哋呢啲小社區更加無可能。」


「宗教嘅力量真係強大‧‧‧‧‧‧」


「你哋無勸過佢?」我問。



「村長佢勸唔聽,我哋都冇計~只希望有一日佢識醒覺。」漢木老伯搖搖頭。



在等待村長回來的這天,王達尼早早埋伏在村長的家中。見他只得自己一個孤獨地待著,我就去到屋子裡陪他一起等待。


「你有冇覺悟。」待了大半天,在荒寂的屋子中,我問了一句。


「‧‧‧覺悟?」王達尼怒氣未退,語氣還隱約帶點不憤。


「死嘅覺悟,你要知道,對方係病者平權組織。」一個,實力不可估量的組織。


「為咗錢,我摧毀佢成個組織都得。」


「錢?你應該唔係咁著重錢嘅人,因為你已經有好多‧‧‧‧‧‧」我說出自己想法:「你係覺得,自己同伴用生命作擔保去運送嘅寶石,因為一啲咁愚蠢嘅理由落到呢啲人手中,覺得好唔值吧。」


「‧‧‧‧‧‧隨你點諗。」


「放心,我明白有啲說話講咗出口,就唔符合自己形象。」我說:「但我唔會笑你。」


「黑鼠商團嘅每個人,比起金錢,都重要好多‧‧‧‧‧‧」



我不能體會他的心情,


但我明白就足夠。


「呵欠~」門外傳來聲音。


「有人。」我提醒王達尼。


我倆馬上靠近到大廳的左、右兩邊的牆後轉角,村長一進來後就馬上把他制服在地,並將他五花大綁。


也許這裡人煙稀少,根本沒有鄰居聽到他的呼喊救命聲。


我們把他綁在一張椅子上,打算要盤問一些事情。


「你‧‧‧你哋係咩人‧‧‧‧‧‧想‧‧‧想殺咗我‧‧‧?」村長瞳孔畏懼地睜大。


「只係問你一啲事情。」站在一旁的我抱住雙手,說。


「點解‧‧‧!」王達尼一手便捏緊住村長的頸子,問:「我團員嘅寶石袋會喺你身上。」



「寶‧‧‧寶石袋‧‧‧‧‧‧」村長苦痛地回想,說:「嗰個‧‧‧我‧‧‧我‧‧‧‧‧‧只係喺‧‧‧外面執番嚟‧‧‧」


「我依家同你講,」王達尼給予他臉上一拳:「你執錯人嘢!」


「呯」很響的拳頭聲。


「啊‧‧‧呀!」村長叫了一下。


「入正題吧。」我說。


「寶石袋呢家係邊!」王達尼問。


「喺‧‧‧我唔講‧‧‧‧‧‧我唔會背叛上帝,我唔會‧‧‧如果唔係‧‧‧佢哋唔會俾我再見到家人‧‧‧‧‧‧」村長說。


「家人?」王達尼在他的家中,找來了啞鈴:「或者呢啲痛楚,可以令你痛到阿媽都唔認得。」


然後,他把啞鈴在半空中放下,讓它直墜到村長的腳趾上!


「呯──」趾甲爆響入肉的聲音。
已有 0 人追稿