[真人真事][校園][純愛]《婚宴上的重遇》: 第六章

跟住落嚟,
唔使問我呢個毒勁梗係會好似以前咁樣,
隔日去麥當勞望佢
不過,
事情出現左變數
咩變數
就係我喺麥當勞見唔到女神
自我第一次知道麥當勞有佢喺度嘅時候,
今次係我第一次見唔到佢
點解無啦啦冇返工嘅


係咪考口試呢
算啦唔緊要啦,
聽日再嚟望過
原本我隔日去個原因,
係唔想俾佢知道我日日喺度望佢
咁既然佢今日冇返工,
即係唔知我今日有嚟過啦
所以我決定聽日再嚟
唔會日日都考口試掛
之後我第二日再嚟,


好景不常,
都係見唔到佢
當時我仲呃緊自己,
話佢可能係短暫休息
因為之前日日返,
又或者可能準備口試姐,
事實上其實我當時已經有個諗頭
就係唔通佢已經冇做
跟住落嚟,
我都冇再喺麥當勞見過女神


平時又唔見我咁準
今次一講就中,
要知道,
習慣嘅野好難改到
我已經慣左一星期有幾次會去麥當勞見佢,
突然之間見唔到,
心情梗係有少少失落
其實我自己知架,
大家極其量都係普通朋友
無啦啦同一個普通朋友冇聯絡,
對自己影響唔係真係咁大
鬼叫我嗰陣已經沉左船咩
人就係咁,
鍾意就係鍾意,
冇得解釋咁多


有啲人可能會諗,
你連人地名都唔知
住邊度讀邊度又唔清楚,
咁都鍾意
我唔係話幫自己辯護,
但鍾意嘅野邊有得量度
唔係話要做啲乜野先有資格鍾意架嘛,
對我嚟講,
初見嘅一個眼神已經足以令我神魂顛倒
你地話我傻
我完全可以接受,
因為我自己都覺
竟然鍾意左一個自己完全唔了解嘅人,
又唔諗辦法親近佢,
淨係識戇居居望人


乜都唔做,
鬼叫我毒咩
但係依家無啦,
過左成幾個禮拜,
都仲見唔返佢,
有時我自己出街,
無論出門定係返嚟嗰陣,
我都會特登經麥當勞
睇下佢會唔會返嚟
雖然係唔順路,
但係我希望可以再見佢
好想再見到佢個樣,佢嘅笑容,
好想聽下佢把聲,
好想再俾佢一次問我係咪照舊,
所以唔順路我都會照去搏一鋪


但每一次都失望而回,
當時我已經有個打算,
就係我以後都未必可以再見返佢
仲話下次問佢讀邊度,
依家都唔知仲有冇機會問
唉,
早知上次問埋啦,
咁起碼到九月中六開學嗰陣,
我都可以乘乘機機去佢嗰間學校扮喺街撞到佢

小弟就有幾個朋友好frd
但如果你話最frd
就係得一個,
嗰個frd叫呀成
我同佢真係好frd,


以前會一齊踢波,
依家大個左,
仲邊有時間成日踢波丫
就多數會一齊打機
電腦又好,
ps4都好
唔係話其他朋友唔frd,
平時玩嗰堆都係好好朋友
依家仲一路都有見,
出嚟食下飯
一個月踢一次波咁
但最frd真係呀成
你知啦,
其實男仔同女仔一樣,
都會有啲少年心事
我平時就唔鍾意周圍同人講,
但當我要講嗰陣,
我多數都係會搵呀成
或者同佢傾呢啲野舒服掛
咁點解無啦啦會介紹佢
當然係有原因啦,
話說小弟同佢講左呢件事
呢件事即係我同女神由初見到依家見唔到佢嘅事,
呀成:「你就唔得啦
你講到咁正,
都唔同我講
等我搵日去睇下佢係咪真係咁靚丫嘛 」
我:「一時唔記得左啫 」
呀成:「咁你依家點,
仲係日日都落去望佢喺唔喺度扮痴漢呀 」
我:「係呀 」
呀成:「嗱老實講,
鬧你乜野大膽啲,點解唔問佢係讀邊度係廢話嚟嘅
我識左你咁耐,
點會唔知你係咩人 」
我:「係嘅 」
呀成:「冇乜野嘅,
你都唔係第一次無疾而終架啦
當試多一次 」
我:「真係難聽過粗口 」
呀成:「我都係講事實啫
如果我喺度安慰你,
你都驚啦下話 」
我:「咁你又冇錯 」
最衰當時互聯網冇依家咁發達,
想搵人真係大海撈針
我又唔知佢係咩名,
其實有時佢心口都掛住個牌
我唔係冇機會知佢個名,
不過如果我望佢會好礙眼
費事俾佢誤會啦
同埋我有時真係掛住望佢個樣而忽略左,
自己真係蠢到死
依家想見想搵都唔得啦.