[真人真事][校園][純愛]《婚宴上的重遇》: 第八章

班主任:「各位靜一靜
等我身邊呢位靚女同學同大家打聲招呼先啦 」
全班屏息以待,
安靜程度同考緊試有得比
插班生:「大家好,
我叫X若凝
你地可以叫我做若凝呀 」
點解我會成個人o晒嘴
俾唔到反應?
聰明嘅讀者一定會估到


原來若凝就係我心目中嘅麥當勞女神
我同佢終於可以再見喇
之前一直以為見唔返,
每一次都失望而回
估唔到依家嚟個反高潮
女神,呀唔係,
係若凝無啦啦出現返喺我面前
仲要同我做同班同學
好老土嘅比喻,
就係好似坐緊過山車咁 ,


初初見到佢嗰陣,
心情已經好興奮
到後來慢慢同佢熟左,
開心程度直上最高點
誰不知之後竟然見唔到佢
仲要一唔見就唔見左兩三個月,
正當我打定輸數之際
佢又再一次出現喺我面前
心情就係升下跌下升下跌下,
好彩最後個結果係理想啫


都冇問題,
係個過程比較曲折
老實講丫,
當時我梗係喺度ff啦
咁都同佢撞得返,
我地真係好有緣呀哈哈
又難怪我當時會咁樣嘅
咁開心,
俾我ff下都得掛
當然啦,
呢個時候有好多男同學,
都同我一樣
眼甘甘咁樣望住若凝
睇嚟佢應該榮登班花,甚至係級花嘅寶座
的而且確,


全校唔係好多人個面孔及得上若凝
你知架啦,
中學生睇靚女就最易
喺班出左名之後,
跟住好快會流傳出去
到時就會有好多人上嚟睇下係咪名不虛傳,
加上若凝仲要係插班生
身分更加特別,
之後班主任再講:「若凝你自己搵個位坐啦
都中六喇.」
若凝:「知道miss 」
跟住若凝周圍望下附近邊度有空位,
可能佢見到我喺度係咁望實佢
之後我同佢個視線就接上左
我當時喺度諗,


佢會唔會坐埋嚟呢
係就發達喇,
結果
佢真係坐左我隔離呀
今晚記住要裝返炷香先.

若凝:「原來你係喺度讀架 」
佢認得我呀,
估唔到若凝冇見過咁耐都仲認得我
呢個時候少不免又ff啦
跟住我就喺度諗,
好似若凝呢啲咁靚嘅女仔
身邊梗係有好多男仔阿諛奉承
嗰啲狗公肯定會話「一定認得你啦,你咁靚女」之類嘅說話
如果我又好似呢班狗公咁樣,


咁樣根本就突出唔到我係邊個
佢可能只會覺得,
我只係其中一個狗公
所以我決定特別啲,
同佢玩下先
事後我都唔知點解我會有呢個咁白痴嘅諗法
我將把聲變沉咁講:「下,
你係咪認錯人呀 」
事關小弟平時冇野叻,
扮野,忍笑就有返兩道
所以我完全唔擔心我會自爆
若凝:「下
冇理由架,
你同佢咁似樣
冇理由會認錯架.」


我:「佢即係邊個呀 」
若凝:「冇,
之前一個識嘅人啫
可能真係我認錯啦 」
我:「多數都係啦
因為我唔係好認得你個樣 」
好野,
若凝信左
以前係咁無聊架啦
鬼咩,
對住自己鍾意嘅人,
梗係想做特別啲嗰個啦
希望咁樣可以比較容易,
令自己喺佢心目中留低一個印象,
無論個夢想幾渺小,幾無聊都好,
只要係對住自己鍾意嘅人,
都會出盡力去做
為嘅只係留低一個印象而已.