[真人真事][校園][純愛]《婚宴上的重遇》: 第二十五章

咁喺嗰個星期嘅禮拜五,
若凝同我喺facebook inbox嗰度傾計
若凝:「聽日係咪出嚟溫書 」
佢真係丫
以為我會唔記得
傻豬嚟嘅
我自從嗰日講完之後,
都唔知幾期待禮拜六
因為可以約若凝出嚟,
同埋見下著便服嘅佢


你要知道,
平時我係未見過佢著便服個樣
麥當勞嗰陣佢就著制服,
同佢做左同學,
佢就著校服
斷估佢禮拜六都唔會著校服咁得意掛
係嘅話我認輸啦
講開又講,
唔知各位巴打有冇一種感覺,
就係好期待見到女神著便服


我都唔知點解會有呢個感覺
依家諗返起,
明明係一件好平常嘅事
但係以前嘅自己,
就會將一件咁平常嘅事,
睇得咁重要.

返返嚟我同若凝嘅對話先
我:「係呀,
你想走數 」


若凝:「睇個樣似你想走喎
明明都冇講過話會唔去 」
我:「我呢啲應承得人就唔會放飛機嘅
點呀幾點等 」
若凝:「以我所知,
嗰間圖書館晏晝去都冇乜人
一點半好冇
我諗住喺屋企食埋晏出嚟 」
我:「冇問題呀 」
等我仲諗住可以同若凝一齊食完晏先去圖書館,
點知佢話喺屋企食晏
咁就算啦,
無謂強求
若凝:「係喇,
你夜晚食唔食架


因為我諗住溫到六七點 」
心情真係來回地獄又折返人間
先前嗰一秒我個計劃先被破壞,
點知下一票又出現返
仲要食夜晚添
你知啦,
我同若凝好少一齊食夜晚嗰餐
反而晏晝就經常
今次發達呀,
跌左個桔,
但係賠返個橙
雖然唔知佢係咪唔想自己一個人食先至搵我啦,
不過我都唔理咁多
諗多都係盞自己煩
我:「好呀 」


若凝:「你會唔會又講大話呃你媽咪呀
如果你要返屋企食我冇所謂喎 」
我:「梗係唔使呃啦
光明正大講不知幾型 」
若凝:「但係聽你講足球隊成日都有聚會
個阿sir好有錢,
成日請足球隊食下午茶 」
我:「好彩我呀媽唔識睇電腦
俾佢見到就死 」
若凝:「多數嘅媽咪都唔會睇
我就係知你媽咪都係咁先喺度講咋 」
我:「得喇,
唔使再潤我喇 」
若凝:「咁我就當約實左架喇 」
我:「你諗定聽晚食乜好過啦 」


若凝:「聽晚先諗
係喎,
見到你icon仲係乜野都冇嗰陣,
我先醒起之前話同你出去影相 」
原來若凝記得
我之前仲以為佢係吹水,
嗰下真係幾開心
因為有人同你講野,
而嗰個人係會記得,
而唔係社交技倆
即係嗰啲呢,
成日話下次見
但係個下次都唔知去左邊
好彩若凝唔係咁啫
當然自己又會暗自對佢加分啦哈哈


我:「你得閒咪約囉,
不過最好一至六
禮拜日不嬲都係喺屋企hea 」
若凝:「同我一樣喎,
禮拜日都係喺屋企懶 」
我:「做乜抄我 」
若凝:「你掉返轉講喎 」
我:「禮拜日不嬲都係咁 」
若凝:「我夠係咯 」
我:「算啦唔玩
以前小學雞年代成日都話你抄我我抄你丫嘛 」
若凝:「係呀
啱啱諗起一樣野,
約出嚟嘅話不如留低電話
萬一有咩事都可以即時通知 」
大家都知嗰陣,
智能電話係冇依家咁發達
離開左屋企,
真係要靠打電話聯絡
同時間,
亦都因為咁樣,
就知道左若凝個電話
我:「幾醒目喎今次 」
若凝:「不嬲都咁醒
94340634呀,
你打過嚟丫我save咪得 」
之後我梗係打俾佢啦
準備接通嗰下真係有少少緊張,
因為真係估唔到我可以同佢傾電話
我:「喂.」
若凝:「你把聲同現實都幾似 」
我:「其實你都係
分別唔大.」
若凝:「好彩我醒
冇啦啦諗到,
咁樣嘅話就算有咩事都可以通知你 」
我:「又幾醒喎若凝姐 」
若凝:「多謝 」
我:「咁好啦聽日見到先講啦
瞓覺.」
若凝:「早抖喇你 」
我:「硬係覺得你呢句好似唔係同我講晚安 」
若凝:「你諗多左喇
聽日見啦拜拜.」
呢次就係我同若凝第一次傾電話,
毒男就係咁樣,
對第一次特別著緊
往往都係會銘記於心,
但其實人地根本唔會放在心上.