[真人真事][校園][純愛]《婚宴上的重遇》: 第三十一章

星期日,
個個學生哥做嘅野都應該差唔多啦
一係就出去玩,
一係就喺屋企hea
同frd打機,煲劇,甚至睇av
我敢肯定不出呢三樣,
依家大個左,
出左嚟社會做野
先知咁樣做係好奢侈
奢侈得嚟自己其實係好開心


因為依家基本上冇咁多時間俾你hea
以我自己為例,
一至五返全日工,
星期六返半日,
食埋野搭完車返到屋企嗰陣,
已經成三四點
有時禮拜日,
一係就陪朋友出去
再唔係就陪屋企人行街
唔出去嘅話,


自己又要買野
你知啦,
一星期得一日放假,
有啲乜野買嘅話,
都會揀禮拜日嗰日去買
除非我要買嗰樣野係有限期
又或者非嗰日買不可
我知你地會問,
如果我係平時放完工之後去買野乜唔得咩
但係咁樣嘅話,


平時我又會遲左返屋企
變左返到屋企自己嘅時間又少左
所以我多數都係禮拜日出去買,
亦即係話,
基本上每一日都會出街
同以前學生時代hea足全日差天共地,
我知有啲學生會諗,
放假留喺屋企好悶呀
唔知做乜好,
一係就出去玩,
一係就返part time
每個人意見唔同
但如果你問我,
我就覺得,
喺屋企hea有佢嘅好


起碼你真係唔使諗
你估同人出去玩唔使諗咩,
又要諗下食乜,
又要諗下去邊度玩
你知啦,
唔係個個學生哥都咁有錢
成日都有多餘錢喺禮拜日出去玩架嘛
至於返part time,
我就覺得,
其實將來出到嚟社會,
大把工俾你返
有冇必要咁快就出嚟做野
我知你地話唔返part time邊有錢,
呢個的確係
但係調返轉諗,


做學生嗰陣,
係你最有資格同人講你係hea緊
當你大個左畢左業之後,
如果你日日留喺屋企,
仲唔俾人白眼咩
到時你覺得冇問題嗰陣,
側邊嘅人都會俾說話你聽啦
反而,
當你仲係一個中學生,
你都可以用溫書嚟做藉口
到時閂埋房門,
你想做乜就做乜
邊個咁理你
所以我成日講,
hea有hea嘅好


因為當你大個左,
你想hea嗰陣,
時間都唔容許你咁做,
有時真係要珍惜.

咁我嗰個禮拜日究竟係做咩呢
講你都唔信,
其實我就係留左喺屋企溫書
我知你地又會問我,
尋日先同若凝去左圖書館溫書
今日又溫
咁其實大家都知啦,
尋日我擺明就唔係溫書
但係我又確確實實喺下個禮拜要考試
雖然話只係校內考,


但係點都係考試丫,
萬一唔溫嘅話,
成績表滿江紅嗰陣就唔好啦
到時實俾人潤
成日話出去溫書,
點解成績仲係咁差
我點樣答佢呀
唔通我話我出去係為左「目及」女?
講出嚟都唔好意思丫
同埋自己覺得,
中六同中五個程度真係有少少分別
而且仲有年半就要A-Level(10年高考生),
依家唔開始勤力到時就真係食屎
同埋我都講左好多次,
喺屋企溫書係集中好多
或者真係好傻啦,
就嚟考試,
禮拜六嗰日都仲要出去陪若凝,
而自己冇溫書,
反而禮拜日就死溫爛溫
我唔否認嘅
講真丫,
我都唔係第一次咁傻啦
傻多一次又有乜所謂,
唔知各位巴打又有冇試過咁呢
明知要考試,
又或者有其他野要做,
女神一出聲叫你去第二度,
你就即刻仆過去
放低晒你要做嘅野,
而你自己,
係完全冇同佢講過你唔得閒
然之後第二日,
就死死氣自己喺屋企度,
做返尋日你應該要做嘅野
而最重要嘅係,
你係從來都冇後悔過.