[真人真事][校園][純愛]《婚宴上的重遇》: 第三十三章

食完早餐之後我地就返去考試
第一日係考中化同埋英文,
全級一齊喺禮堂考
咁啱我個位,
同若凝個位其實都好近
我右邊前三個就係佢,
所以其實都係望到
我又唔會話因為見到佢就考得特別犀利
考試嘅野,
識就識,唔識就唔識架啦


好彩整體上都唔係好難
雖然我禮拜六出左去扮溫書,
搞到我溫少左一日,
不過好彩好多都識
咁當我見到有啲題目唔識嗰陣,
我個心真係冇怪責自己禮拜六出左去
雖然平時好鍾意賴三賴四
但係嗰一刻真係冇
我唔會話因為溫少左一日,
所以就話嗰條唔識做


更加冇後悔禮拜六嘅決定,
講真丫,
大家讀過書都明,
有時溫得耐未必真係條條都識做
最多都係有較大機會啫
點都唔可以肯定
咁我冇理由用一樣未知嘅野,
去否定我禮拜六嘅決定架嘛
做完仲有時間,
覆完卷之後


咁就梗係周圍望啦
上幾年考試,
我都係望隔離班嗰啲靚女
今年唔同喇,
梗係望返自己班嗰個
最重要係大家嘅距離唔遠,
又咁啱佢喺我前面
我望嗰陣都好自然啦,
如果若凝坐我後面就麻煩,
擰轉頭望就大家都知咩事
所以真係好好彩呀
唔知佢識唔識做呢
不過自己諗諗下又係多餘,
若凝假假地會考都考18分,
高我咁多分


邊使我擔心
考校內試輕鬆啦
即使真係要擔心
都唔輪到我啦
咁我地要等老師收晒卷先走得,
之後準備走嗰陣,
若凝即刻行左過嚟,
都係問我考成點之類
估唔到佢會咁心急
當然啦,
喺嗰陣我都冇太過ff,
始終考完試,
問人幾多分係好正常
跟住佢就同佢班frd食飯,
我都同我班豬朋狗友食飯,


講起上嚟,
佢都幾快認識到一班新朋友
始終大家都係同一班,
都睇得出佢地好快就好frd,
佢班frd其實即係之前喺度讀嗰班人
有幾個都係中五之後原校升上嚟,
所以都知佢地係邊個
嗰幾個女仔幾好
起碼識左幾年,
都知佢地個性格唔錯
起碼唔係八婆格先
而且個樣都見得人
當然啦,
一拍埋去若凝嗰度就冇得比
不過咁樣都好正常,


我記得嗰陣,
自己就好似若凝個老豆咁樣,
唔知會同邊啲人frd,
萬一同啲港女格嘅人做朋友
都唔知會唔會影響埋佢自己,
始終朋友係互相影響架嘛
依家諗返起真係好好笑,
明明就乜野都唔係,
但係嗰陣就好似一個老豆擔心個女咁樣.

之後我地成班豬朋狗友去食飯
有我啦,呀成,丁仔,呀余,同埋仲有一個
嗰個人之前喺其他故未出現過,
所以就唔開名
一於叫佢做朋友1號


以前仲有樂仔
樂仔未去外國嗰陣,
我地就係成班frd六個咁樣
一齊玩,一齊食飯,一齊打機,
咁我嗰次考完試,
就五個去食飯啦
朋友1號:「呀行其實你同若凝係咪有野 」
我:「你又知人地叫咩名 」
丁仔:「仲使問
佢條淫蟲梗係一早起左人底 」
朋友1號:「我就唔信你冇 」
丁仔:「真係冇 」
朋友1號:「假到你
咁點呀行哥,
係咪真係有路 」
我:「冇呀邊有 」
朋友1號:「我聽人講你地好frd喎 」
我:「嗰啲人擺明吹水
佢地溝唔到人就老屈 」
呀余:「實係咁啦 」
丁仔:「實係咁啦 」
我:「你兩條基佬唔好喺度扮晒野 」
順便講埋,
呢班豬朋狗友係知道,
若凝就係之前我講嘅麥當勞女神
因為開學嗰陣我太興奮爆左出嚟
而喺當時,
班上面的確有傳我同若凝嘅緋聞
我估若凝都知,
因為有時見佢聽到嗰陣,
個反應有啲啲唔自然
有啲唔好意思咁樣
好彩嘅係,
佢冇因為緋聞而同我刻意保持距離
而當時嘅我,
當然都會覺得唔自然
有時一聽到佢個名,
我就好驚其他人會望住我
特別係我同佢上堂傾計嗰陣,
跟住老師就叫我地專心啲唔好傾計,
我就會有呢個反應
塊面會好熱
總之成個人就好緊張,
其實咁樣真係好毒
咁我嗰陣的確係一個毒男嚟嘅
我唔會否認
而喺九年之後嘅今日,
我反而有第二個諗法
俾人傳緋聞,
其實都係一件幾甜蜜嘅事,
昔日嘅唔自然感覺已經冇晒
或者真係唔同時期就真係會有唔同睇法,
依家諗返起都會會心微笑.