[真人真事][校園][純愛]《婚宴上的重遇》: 第三十九章

之後嗰幾日,
我就喺度諗
聖誕約若凝出嚟做咩好
點樣講都好,
聖誕都冇乜理由求其就咁過
點都要諗啲野呱
可能嗰陣係我小毒毒嘅諗法
覺得聖誕好重要
但係慢慢大個出嚟做野嗰陣就會發覺,
其實有時所謂嘅節日,


真係唔好睇太重
嗰啲乜野中秋節聖誕節等等等等,
其實都好似係平日一樣
最正都係有一日假
其他野已經唔再好在乎
唔會再好似中學嗰陣咁樣,
睇得咁重,咁上心
究竟係節日氣氛減少左,
定其實係我地成長左呢
講返嗰陣,


除左諗去邊度玩之外,
我仲諗緊,
究竟我地係約平安夜,聖誕節,
定係boxing day
你問我嘅話,
我梗係想平安夜啦
各位唔好諗錯隔離
而係我覺得,
平安夜玩耐啲嘅話,
去到十二點嗰陣,


就等於同佢過聖誕
希望事情發展會好似我所諗嘅咁樣啦
你知啦,
有時人唔係真係咁好彩
唔會你想點就點
唔知若凝會揀邊日呢,
佢淨係同我講左聖誕期間,
但就冇講邊日
跟住我突然靈機一觸,
諗到有個方法令我可以知道佢會揀邊日出嚟.

話說嗰一日喺平安夜嘅前兩日,
我就決定喺面書嗰度搵佢
我:「你食唔食韓燒 」
咁我梗係希望佢食啦


唔係我因為想食韓燒
而係佢食唔食會影響到我個計劃
等左一陣之後佢就覆左我,
若凝:「食呀做咩呀 」
我:「咁就啱
話說之前食過有一間任食韓燒幾抵食
制唔制 」
我嗰陣冇錢呀
淨係夠錢食任食韓燒
唔夠錢出去食其他韓燒
嗰啲真係貴好多,
若凝:「好喎
今次幾醒喎識諗野 」
我:「不嬲都識諗
冇同你講啫 」


若凝:「乜係咩 」
跟住落嚟就係重點,
我:「你想邊日出去
因為我要卜位 」
若凝:「24號丫 」
我一見到佢打24號,
即刻yes左出嚟
事情終於如我所願
若凝:「咁就麻煩你喇 」
我心諗緊係唔麻煩,
同到你出嚟食喎
仲要係平安夜,
區區卜位有幾難
我:「卜完搵你呀
講定先你筆值幾多,


會唔會話太貴唔食 」
若凝:「唔會啦
難得平安夜仲就住就住咩 」
講到呢度又唔好話我盲捧若凝
事關我真係識過一啲人,
真係好q麻煩
又話呢度貴嗰度遠
總係有方法挑剔
但係自己又唔幫手卜
明明問佢嗰陣就冇所謂
正一食屎狗
好似若凝咪幾好
夠爽,
唔似一般女仔咁樣,
醃尖腥悶


又諸多藉口,
咁之後我就打去卜啦,
話說喺2008年,
當時任食嘅風氣冇依家咁流行
我覺得啦下
冇做過統計,
同埋印象中價錢好似冇依家咁貴
你諗下,
嗰陣聖誕節,
我去問價嗰陣,
計埋加一都係二百多啲啲
咁當然啦,
以一個冇返兼職嘅學生哥而言,
二百幾都唔係平
不過聖誕就冇所謂啦
好在平時都唔係成日用錢,
同埋嗰陣我係諗住請埋若凝
通常電視嗰啲都係咁樣架嘛
男主角請埋女主角食,
理性上我係好清楚知道
我唔會係男主角,
但係講就咁講啫,
有邊個男仔唔想利用節日嚟飾演平時做唔到嘅男主角呢
咁樣卜完之後,
我就搵返若凝
我:「啱啱book左
喺旺角,
二百幾有冇問題
有問題就快啲講
我再搵過第二間.」
若凝:「冇呀
唔該晒你
今次幾勁喎 」
我:「使乜你講 」
若凝:「食幾點呀 」
我:「八點 」
若凝:「咁到時再約幾點等啦 」
我:「好 」
其實佢未必知,
我卜嗰陣嘅過程都唔係易,
因為有好多間都冇位
有啲都要去到十點幾先有位
咁樣就死啦
前前後後我都問左成五六間,
不過聽到若凝讚我就已經抵返晒
有邊個男仔,
唔想喺自己女神面前威水架
即使只係卜位咁簡單嘅事,
都會不惜一切去做
可能真係好傻啦.