[真人真事][校園][純愛]《婚宴上的重遇》: 第五十九章

咁究竟我去拎乜野呢
就係我尋晚叫我呀媽去搵嗰張,
我同表妹細個嗰陣嘅合照
都係啱啱講講下先記得
其實今日嘅目標係要氹返若凝
我嗰陣一支箭就走左入去更衣室,
拎我個書包
之後好趕咁出嚟
你知啦,
我唔知若凝會唔會走丫嘛


一出嚟就去返操場嗰個位,
好彩若凝仲喺度
若凝:「趕頭趕命做咩呀
鞋帶都甩左 」
我:「咁你都見到
天生係訓導主任材料 」
我嗰下真係o晒嘴
咁佢都見到
若凝:「一路行一路講啦 」
我:「哦 」


一出去學校門口,
若凝:「咁究竟你要拎啲咩俾我呀 」
跟住我就拎左張合照出嚟,
我:「真係我表妹嚟架 」
若凝:「唔俾你地係青梅竹馬嘅 」
係喎,
點解我咁都諗唔到
呢張相個有力程度唔夠硬淨
咁我嗰陣真係唔可以口啞啞啦
如果唔係好失威架嘛


亂講一通都要架喇
我:「真係唔係呀
你尋日見到個鏡頭,
我地不嬲都係咁樣玩
完全唔係你諗咁樣
真係冇野
你諗下,
邊度有女仔會鍾意我先得架 」
若凝:「做乜咁話自己呀 」
我:「又唔靚仔又冇錢
已經輸左啦 」
若凝:「係囉
邊度會有人鍾意你先得架
我都唔明.」
我:「你講咩呀 」


若凝:「冇野喇你繼續啦 」
我:「你信就得啦
至於尋日點解咁樣,
係因為我個死人表妹無啦啦嚟左
我呀媽又唔得閒,
所以就要我返屋企先
如果唔係佢冇門口入,
點知佢喺學校等我
就係咁喇 」
若凝:「唔準再呃我知唔知 」
我:「知 」
若凝:「你知我好憎人呃我架啦 」
我:「咁依家仲憎唔憎 」
若凝:「唔知喎 」
講完之後佢擰歪面,


唔俾我見佢個樣,
但係其實,
街道上有塊類似倒後鏡嘅物體
已經出賣左佢
因為係塊鏡可以望到,
佢笑得好甜
你知唔知我尋晚幾驚,
我好驚,
佢可能唔會原諒返我
以後可能我就冇機會再見佢呢個笑容
不過好彩,
今日終於見得返,
都仲有機會.

之後行行下,


突然之間我有個諗法
我:「你趕唔趕時間返屋企 」
若凝:「唔趕呀做咩 」
我:「你依家有相機喺身丫嘛 」
若凝:「有呀 」
我:「可唔可以跟我去一個地方
同我做啲野 」
若凝:「好呀 」
各位唔好心邪
其實我做嘅野,
係想佢同我影一張相
因為我依家著緊喺身嘅學校波衫,
係我最後一次為左學校活動或比賽而著架喇
雖然平時我都可以著,
但係個意義都唔同啦


我好想今日影張相做紀念
咁起碼到第日,
我唔記得左嗰陣
都可以透過張相,
喚醒返我嘅記憶
你知啦,
千祈唔好高估自己嘅記性
唔係乜野都會記得,
幾好幾重要嘅野都好,
去到某一日,
都有可能會諗唔起
而當到你第日諗唔到嗰陣,
你就會不斷責怪自己
點解我當日唔咁咁咁做
我唔想第日有呢個情況
所以就保險啲,
希望今日,
若凝可以同我影一張相
係我著住學校件波衫
喺平時屋邨嗰個足球場影相,
若凝:「你好彩喇
我係我地住嗰條屋邨個名)邨首席攝影師 」
我:「咁都有朵
膠都費事俾 」
若凝:「咩呀 」
我:「冇野呀,
咁就麻煩你喇首席攝影師 」
之後我地就去左屋邨嗰個足球場
嗰個足球場係普通五人街場,
冇乜特別
我地入到去就見到有班小學生喺度踢波,
大家踢過波都知,
街場如果冇人跟隊嘅話,
係一人用一邊球場
若凝:「你地平時就喺度踢波 」
我:「係呀 」
若凝:「不如你射波,
我喺後面影你
有時睇報紙嗰啲人都係咁樣影相 」
我:「你睇波經 」
若凝:「係咁易立下眼啫
快啲搵個波嚟啦 」
之後我就問嗰班小學生借個波嚟,
大家都知中學生問小學生,
係冇可能問唔到
嚇都嚇到啦
跟住我就將個波擺定喺中間
若凝就幫我影,
我:「記住影型仔啲 」
若凝:「好難喎
不過有我喺度幫你應該有啲機會嘅 」
我:「你真係好野
又串我又讚自己
一箭雙鵰 」
若凝:「講事實啫
你快啲射波啦 」
之後我就射左幾球,
若凝:「再射過
好似影得唔夠準
可以再靚啲 」
我自己就交俾佢揸弗
總之佢覺得靚咁就得
你知我個人邊有審美觀
女仔都仲話,
相就真係冇
搞左一輪之後,
若凝:「呢張幾好喎
睇下你覺得點 」
之後我同佢就喺度睇緊佢部相機,
你知啦,
兩個人哄埋一齊睇同一部相機
嗰個距離真係好接近,
基本上真係連五厘米都冇
幾乎係面貼面,
我嗰下真係有啲好唔自然,
近距離咁樣望佢,
皮膚真係零瑕疵
我終於知自己點解,
會咁迷戀佢
佢個樣真係有一種魔力
令我好似沉左船咁樣,
好想不斷咁樣欣賞
就係喺我望緊佢嘅期間,
若凝都擰歪面望住我
大家近距離咁樣四目交投,
我記得嗰陣真係好緊張,
個心係咁跳
迅速咁樣變到好熱
我唔知佢有咩反應呀,
我就係咁喇
去到依家我都仲記得嗰陣嘅感覺,
大家冇進一步嘅動作
淨係望住大家,
呢個大概係我地最接近嘅距離
幾秒之後就分開左,
若凝:「無啦啦好熱呀可 」
我:「冇喎 」
始終唔可以對佢坦率
若凝:「死人頭叫你睇相呀
你望邊度
拿拿臨整完就返屋企食飯呀 」
我:「係
真係幾靚喎 」
若凝:「都話有我出手一定冇問題 」
我:「至叻係你呀 」
若凝:「梗係,
做icon呀 」
我:「諗下先啦 」
若凝:「記住好好收藏,
第日我出名嗰陣,
你呢張相就價值連城
到時要收錢呀 」
我:「好 」
之後我地就返左屋企,
食完飯我就上面書,
就見到若凝send左頭先嗰啲相俾我
不約而同,
我同若凝都覺得其中一張相係最靚
咁我梗係乘機ff啦
當然好快就完左
跟住我就整左icon,
好快若凝佢就喺面書搵我,
若凝:「真係做左icon喎 」
我:「唔做icon即係唔畀面你啫
影得咁靚 」
若凝:「幾識講野 」
我:「要嘅要嘅 」
記得我地以前講過,

若凝:「不如遲啲我幫你影啦,
我估你都係冇人同你影.」
我:「唔好咁坦白啦.」
若凝:「講中左呢,
唔緊要喎,
好多人讚我影相好靚,
唔使擔心.」
我:「咁多謝你先.」
若凝:「影完你要擺上去喎.」
我:「真係影先算啦.」

今次終於可以守諾言
影完真係有擺上去
而去到七,八年之後嘅今日,
我個面書個icon都仲係冇轉過
甚至乎whatsapp都係一樣
仍然係用呢張由若凝影嘅相,
唔係因為我懶,
亦都唔係因為我唔識轉相,
而係因為咁多年入面,
我都仲未搵到一張相,
係靚得過呢張.