[真人真事][校園][純愛]《婚宴上的重遇》: 第六十五章

之後就開始放暑假
呢個暑假應該係我地最後一個嘅中學暑假,
我就不嬲都懶嘅
梗係喺屋企盡情享受暑假啦,
但係大家都知啦,
下年就係會考
邊有咁多時間休息丫,
所以有時都會出嚟溫書
聰明嘅讀者一定知道,
點解我要出嚟溫書而唔喺屋企溫


冇錯喇,
因為若凝都會出嚟一齊溫
呢個舉動仲要係佢同我講嘅,
佢話不如一個禮拜搵幾日出嚟溫書,
時間真係唔多,
無論理性好又或者係情感上都好搵唔到,
都搵唔到抗拒嘅理由
以前唔覺架,
成日都覺得a-level係離我地好遠
但係不知不覺間,


依家淨係得返八個月嘅時間
先至真真正正感受到嗰份,
唔夠時間嘅無力感
溫得多又辛苦,
老實講我真係冇咁好意志力,
溫得少又成日覺得好似唔夠時間,
記唔晒啲野咁
壓力點都有架喇,
冇可能完全冇
咁好彩都冇俾壓力凌駕自己嘅情緒,


唔會因為壓力而亂咁發脾氣,
同埋可以同若凝一齊溫書,
一齊經歷備戰a-level呢個階段,
或者呢樣就係叫做苦中作樂啦.

喺度講返先
若凝係處女座,
八月廿八號生日
我地依家放緊暑假,
你諗下個時間線係點喇
係好接近佢嘅生日,
其實喺八月頭,
有一晚我地去溫書,
喺餐廳食緊野嗰陣
我都有隱約問佢,


生日有乜野節目
我:「你係咪好似八月尾生日 」
其實點會好似丫,
我有乜可能會唔記得
不過咁樣講好似令佢唔會覺得我係一個痴漢啫
若凝:「係呀,
點呀想同我慶祝呀 」
我:「你之前送左對波鞋俾我,
一定要做返啲野架啦 」
若凝:「唔想慶祝冇所謂喎,
講到好似還債咁樣 」
我:「又唔好講到還債
唔想欠人野啫 」
我真係好冇用,
明明就係自己想同佢慶祝,


但結果就要利用返,
嗰次佢送我一對波鞋作為原因
以前嘅我好懦弱,
懦弱到完全唔似一個男人,
若凝:「好呀,
咁多謝先 」
我:「你想嗰日做咩呀 」
若凝:「呢啲唔係你諗嘅咩 」
我:「乜呢啲唔係你諗嘅咩,
你生日喎 」
若凝:「呢啲梗係你俾驚喜我啦 」
我:「我唔知你想要啲咩話喎 」
若凝:「失望,
咁都唔知.」
我:「大把時間諗啦


唔使驚.」
若凝:「聽住先啦 」
喺嗰下,
若凝好似真係有少少失望,
我唔可以坐以待斃,
一定要諗方法同佢慶祝,
作為男仔,
最唔想就係自己鍾意嘅女仔對自己失望
衰啲講句,
其他人對你失望係冇問題,
因為你唔會在乎佢點睇
你根本唔會放喺個心度,
只有三類人,
你會好想做到最好,
令佢地唔會對你放棄


仍然會抱有期待,
第一就係屋企人,
第二就係信任你嘅人,
第三就係你重視嘅人,
或者平時你係一個好懶散嘅人,
但如果你係對住以上嗰三類人,
再懶散嘅人,
都會有動力去做任何野
個個都一定會架,
我有信心咁樣講,
每個男仔中學時代都會試過做呢啲野
到你大個左,
就會好欣賞當日咁有衝勁嘅自己,
一個只為某一個人,
就不斷去努力做好嘅自己.