大家回望青春時代,
我諗都總係會有啲遺憾
可能你地會對自己嗰時嘅決定感到錯愕
大個左你就不斷問自己,
點解嗰陣我會咁做架
好想可以返去,
用返依家個心態去處理嗰陣嘅事,
改寫歷史,
但係邊有咁多時光倒流
你估真係睇戲咩


久而久之,
嗰樣野就會成為你嘅遺 ,
嗰份遺憾係來自於你自己嘅無力感,
因為你已經唔可以回到過去,
但其實你又諗到應該點樣做
青春時代係咁架啦,
可能以前真係太細個,
處理決定唔夠成熟,
又或者係睇得唔夠全面
同埋好多野都係當局者迷,


老實講丫,
做旁觀者又或者係馬後炮嘅,
梗係易啦
因為其實已經唔關你事
睇嘅野特別通透,
唔會綁手綁腳,
但係你身處其中就唔同
要諗嘅野多好多,
有時嗰一刻做錯,
其實我覺得都係人之常情,


當然你地可以話廢就廢啦
咁多野講,
我都絕對唔會否認
冇計啦,
我只可以話青春就係咁,
佢可以俾到好甜蜜嘅回憶你,
但亦都可以提供痛心疾首嘅記憶,
係一把雙面刃.

話說有一日,
冇記錯嗰陣係2009年十月初嘅一個禮拜六
即係中七開左學嘅一個月
咁樣喺嗰日,
我就屎忽痕
落左去麥當勞食脆辣雞腿包,


其實都唔係屎忽痕架喇
以前唔使返學嘅日子,
肚餓就一定係落去麥當勞食脆辣雞腿包
咁樣嗰日就好正常,
原本就冇乜特別事發生,
不過既然我話得係原本,
咁即係之後有野發生啦
我食完野之後,
就返屋企,
我行返屋企會經過一個公園,
嗰個公園唔係之前我同若凝慶祝生日,
一齊食蛋糕嗰個公園,
係另一個嚟
話說我行行下,
喺嗰度見到一男一女


唔好講男先,
因為其實佢唔係重點,
第一下吸引我眼球嘅係個女仔
佢係邊個應該呼之欲出啦,
如果唔係若凝嘅話我講嚟做乜
呢個大家都知,
咁究竟若凝同個男仔喺度做咩呢
嗰個男仔攬住若凝,
首先我係唔識嗰個男仔
因為我淨係見到若凝嘅正面,
我嗰陣梗係拿拿臨避開若凝嘅視線範圍
但係又好想知個男仔係邊個,
所以我特登走到去另一邊
背住若凝同時係望住個男仔嘅正面,
嗰陣真係心驚膽顫


因為驚俾若凝見到,
我一路行去另一邊嗰陣,
個男仔完全冇放過手
若凝亦都冇抗拒,
如果佢係抗拒的話,
我諗住好型咁樣行出嚟救若凝架嘛,
可惜我個如意算盤打唔響
話左自己諗多左架啦
跟住我終於去到另一邊,
見到嗰個男仔嘅正面,
好彩我冇近視啫
呢個人我係唔識,
我唔肯定係咪佢之前嘅男朋友
我要返屋企睇下若凝個面書先知,
如果嗰陣電話嘅影相功能好似依家咁樣就好,


我可以影完之後返去比對
但係依家唔得,
我要出力將眼前呢個男仔個樣記住,
直至返到屋企上面書之前都要記得
咁先可以睇下佢係咪若凝之前個男朋友,
我見到佢個樣之後就走左,
已經冇再睇落去,
因為我好驚見到啲,
更加唔想見到嘅野
一路行返屋企,
唔知點解個心揪住揪住,
從來未試過有呢個感覺
最麻煩嘅係,
我仲要記住啲我唔想記嘅野,
其實我可以當睇唔到,
又或者唔去記,
依家簡直係自討苦吃.