[真人真事][校園][純愛]《婚宴上的重遇》: 第八十七章

若凝:「喂,
肚唔肚餓 」
大家去過婚宴都明白,
其實去飮係食唔飽嘅
又要就住就住
同埋去婚宴最大嘅目的根本就唔係食野
或者你地係啦,
但係我就一定唔係
我:「少少啦 」
若凝:「去食野咯 」


我:「好,
你諗啦我冇所謂 」
若凝:「你都仲係咁樣,
諗都唔諗
咁呀......
不如去食m記好冇 」
我:「好 」
其實嗰陣我食又得唔食就得,
唔食咪返屋企囉
不過既然若凝叫到,


咪去食下
之後我地去屋邨嗰間麥當勞,
即係我第一次見到佢嗰間麥當勞
以前佢成日話驚俾佢啲舊同事見到佢,
所以一直唔敢嚟,
過左咁多年,
一早冇晒野啦
若凝:「今次好似先係第一次,
同你嚟呢間m記 」
我:「係呀


以前你話驚俾佢啲舊同事見到你丫嘛 」
若凝:「係囉,
嗰陣真係好傻 」
我:「你食乜呀 」
若凝:「咁好人幫我買埋 」
我:「你坐低啦,
雞翼餐全翼雪碧少冰 」
若凝:「咁你都仲記得?」
死火
可能我嗰陣太興奮,
一下唔覺意講左出嚟
唔知點解,
我都仲係唔想俾佢知道,
其實我對佢所有野都係念念不忘
仍然係記得佢嘅野,


睇嚟過左咁多年,
我都仲係冇進步過
我:「因為我識嘅人好少係飲雪碧
都係咁先記得 」
若凝:「真係 」
我:「真
你覺得我似呃你咩 」
若凝:「唔知呢 」
其實我真係呃緊佢,
仲要係唔知為啲乜野而呃佢
真係好懦弱.

之後我就出去買啦
咁耐冇見,
呢餐咪當我請佢


請佢邊有問題丫
以前請佢去迪士尼都係咁啦,
唔係因為我有錢
亦都唔係因為我大方
可能係我童心未泯,
仲係好想為自己鍾意嘅人付出
買完之後返到嚟,
若凝:「其實你食左幾耐脆辣雞腿包 」
我:「我都冇數幾多年
食開就食 」
若凝:「睇返張單先
俾返錢你 」
我:「唔使啦
咪當我請你囉.」
若凝:「唔得,


點可以要你陪我食野之餘,
仲要你請埋我,
你好彩呀今日我有散紙
俾返你 」
若凝之後竟然俾齊頭我
我:「咁唔該晒啦.」
之後我就將啲錢放返落我銀包嗰度,
當我拎出個銀包嗰陣,
若凝:「你仲扣緊呢個守護符落銀包度 」
我:「係呀,
用開咪繼續用囉
又未爛,
起碼唔見左都易認啲丫嘛 」
若凝:「哦.」
對唔住呀若凝,


真係好難對住你坦白,
所以要扮到好似好唔在乎咁樣.

之後我地就傾計啦
大家耐冇見,
都係傾返以前啲野多
你笑下我我又笑下你,
就好似以前咁,
唯一嘅係,
大家都好有默契,
絕對冇提當年我同佢鬧翻嗰件事
可能大家都心裏有數啦
之後就講下佢喺英國,
同埋返咗嚟之後嘅野,
原來若凝喺英國係有親戚接濟佢
嗰度都有華人,
咁佢都有識番幾個朋友,
但係就冇中學嗰啲咁frd,
講開又講,
佢同佢啲好姊妹都仲係好frd
冇因為去左外國讀書而生疏
返到嚟之後,
好快就搵到份寫字樓,
要睇長短週嚟決定星期六使唔使返,
朝九晚六,
佢話都要搵到幾餐嘅
同埋依家食晏多數都係自己食
除非一班人嗰陣,
先至會一齊食
記得佢之前話唔鍾意自己食晏
我:「你唔係話唔鍾意自己食咩 」
若凝:「仲好似讀中學咁咩
話唔鍾意就唔鍾意,
出到嚟社會,
唔鍾意都要接受架喇 」
之後講下講下,
我問左一樣我好想知嘅野,
其實我知道個答案未必係我想要嘅,
但係我都係好想知道
一個困擾左好耐,
但又唔關我事嘅答案
我:「咁你依家有冇拍拖 」
若凝:「點解咁樣問 」
唔通我話好想知咩,
我:「好奇咁樣問下啫 」
若凝:「你估下 」
我:「有掛
你個樣唔似冇拍拖 」
若凝:「哈哈,
唔知呢 」
雖然佢冇直接咁樣答我,
不過應該多數都有啦
香港地嘅靚女,
點會冇可能冇拍拖丫
若凝:「咁你呢 」
我:「早幾年有,
依家冇呀.」
若凝:「點解嘅 」
我:「冇錢冇樣冇人要 」
若凝:「會唔會係咁呀 」
我:「真係咁 」
若凝:「咁點解之前分手
唔想答可以唔答 」
我:「可能大家唔夾掛 」
我當然唔會同佢講,
我同前女朋友分手嘅真正原因啦,
因為實在講唔出口.

之後我地就返去
我:「送你返去啦,
咁夜 」
若凝:「嗯.」
估唔到我仲有機會送佢返屋企,
今日真係好特別
做左好多我好耐冇做過嘅野,
有啲野耐冇做,
再做返,
感覺真係好特別
我都唔識形容
送到佢去屋企門口,
我:「咁好啦拜拜 」
正當我準備走嗰陣,
若凝:「喂.」
我:「做咩呀 」
若凝:「其實呢,
你頭先用手機開巴士app嗰陣呢,
我見到你嘅密碼 」
我個手機密碼,
其實就係佢嘅生日
0828,
唔止係手機密碼,
提款卡,上網討論區嗰啲密碼等等,
其實全部都係關於佢
我都解釋唔到點解我咁樣做
淨係知我當年set密碼嗰陣,
我第一下諗到嘅,
全部都係關於若凝嘅數字,
以前嗰個女朋友問我,
手機密碼有咩特別,
我都係求其講左啲野解釋就算
冇講到真正嘅原因,
依家原來俾若凝見到,
有一種俾人睇穿嘅感覺
好冇安全感
呢個密碼應該冇乜人知點解,
唯獨係若凝,
佢一定知呢四個數字點解,
我:「係咩哈哈 」
嗰陣我已經無言以對,
同埋個人好緊張
淨係識傻笑
若凝:「頭先你係咪問我有冇拍拖嘅
我想講你估錯左,
我係冇拍拖,
由我去英國嗰陣直至到依家,
我都係冇拍過拖.」
我:「係咩
點解嘅 」
若凝:「因為喺我心裏面,
一直都裝住左個人,
我唔知我究竟係咪仲係鍾意佢,
定係自己以為自己鍾意佢,
一日未搞清我一日都唔會拍拖
返到嚟香港之後見返佢,
我終於知道自己係咪仲係鍾意佢喇,
原來我自己真係放唔低嗰個人 」
我:「嗰個人係你初戀男朋友 」
若凝:「唉,
你真係好蠢呀
傻·仔·行,
你自己估下係邊個啦 」
之後若凝就拎轉面,
入左去屋苑,
佢終於再叫我傻仔行
呢個名真係好耐冇聽過,
我再望一望個電話,
過左十二點,
已經係2016年10月16日
七年前嘅今日,
就係我特登避開若凝,
等佢離開我個世界嘅一日
七年之後,
原來都係我同佢見返嘅日子,
前後足足七年,
冇多亦都冇少,
冥冥中真係有主宰.