我嗰陣已經諗到佢想要我整乜野
擺到明就係朱古力蛋糕
之不過,
嗰陣我唔明點解佢咁樣做,
點解一定要整朱古力蛋糕
仲要係自己親手整
頭先講就咁講啫,
但係邊度識整丫
唔好話甜品
平時我最叻都係整公仔麵,


依家叫我整蛋糕
有冇搞錯呀,
不過頭先點可以失威呢
梗係打死都話識
依家大鑊喇,
咁樣跟住嗰度上網睇食譜啦,
嘩大佬完全唔知咩嚟嘅
又話要雞蛋又話要乜野粉,
又唔知要雪幾耐
真係極度麻煩,


呢個時候梗係whatsapp搵人求救,
搵嚟搵去咪又係嗰幾個
我:「有冇人識整蛋糕
丁仔:「無啦啦做乜勁要整蛋糕
呀余:「老老實實我都想知
之後我就將所有野同佢地講晒,
丁仔:「頂你原來發生啲咁嘅事
正喎
呀余:「估唔到你地見返不特止,
依家仲有機會拍拖


因乜事發展得咁快
我:「成件事好q長
唔好講住先,
麻煩各位大佬幫幫手
呀成:「你就真係唔好彩,
我都唔識整蛋糕
丁仔:「上高登問人啦
我:「高登仔一定吹水
呀余:「唔好話唔幫你,
不過識做啦
我:「輕鬆啦
遲下放題我嘅
不過你諗住點樣幫
你唔係識整下話
呀余:「我梗係唔識啦


我:「挑
呀余:「我女朋友識整
早幾日佢屎忽痕,
又整左一個出嚟
我:「余哥今次靠你
呀余:「好唔好食唔敢包呀,
我喺佢威迫之下一定話好食
我:「咁就夠啦
喺度講下先,
我地幾個都識呀余女朋友
佢叫做Chloe,
有時會一齊食飯
Chloe好好人,
乜都可以同我地傾一餐,
佢同呀余兩個一齊就好搞笑.



之後星期二我地就成班人上左去呀余屋企
因為佢屋企竟然有焗爐
聽講係Chloe叫佢買
而喺嗰晚,Chloe教我整蛋糕,
呀成,呀余,丁仔就上嚟負責試食
頂你個肺
依家都咁夜(我係放左工之後先去),
擺明要聽日先食得啦
不過依家有求於佢地,
我忍
我:「Chloe姐今次真係唔該晒
Chloe:「你搵啱人喇,
最鍾意就係整蛋糕
呀余成日食都話好食


呀余:「梗係好食啦
Chloe:「聽到啦
我:「係咪真架
呀余:「梗係唔係啦
Chloe:「即係我要勤力啲,
繼續整多啲蛋糕俾你啦,
唔係點樣進步
呀余:「咁唔使喇
依家已經好好食
我,丁仔,呀成:「唉
你真係呢
Chloe:「你想整咩蛋糕
我:「朱古力慕絲
要甜啲嘅
呢個係我當初送俾佢嗰個蛋糕,


順理成章就揀返呢個啦
之後佢就開始教我,
完全唔識做
以前家政堂嗰陣,
我都係靠我個partner幫我手
我淨係負責清潔,
完全冇煮野食嘅天份
我好記得嗰個禮拜,
日日放工都上去
其實真係好攰,
你諗下放完工仲要去整蛋糕
不過佢地都唔話得,
真係晚晚都幫我
有時有啲野唔使講嘅,
自己會知咩事,
依家你問返我點樣整,
我已經唔記得
基本上係Chloe叫我做乜我就做乜
完全冇思考,
淨係聽佢講,
星期六嗰日仲特登請一日假,
話嗰日有野做,
好彩之前有假未放啫
其實就梗係搞埋個蛋糕
去到夜晚,
我就whatsapp若凝,
我:「聽日邊度等
若凝:「兩點喺公園好冇
我:「好.」
依家萬事俱備,
等緊聽日來臨.

星期日,
我計返時間,
去左呀余屋企拎左個蛋糕之後,
就直接去公園
我:「今次真係唔該晒
呀余:「識做啦屎忽鬼
我:「放題丫嘛
Chloe:「輕鬆啦
唔使咁客氣
我:「我都知煩到你地
唔好意思
呀余:「頂你講埋啲咁嘅野
得啦,
得左你就喺個group同我地講啦
唔會冷你場
我:「挑
你問我有冇信心得
其實真係五十五十,
只不過都係盡力做好就算
以前嘅我,
就係因為冇盡力,
所以先至有咁多遺憾,
就係曾經有遺憾,
所以先知道後悔有幾辛苦
今次一定要盡力去做
之後就去到公園,
若凝同以往一樣咁準時,
我:「仲係咁準時嘅
若凝:「你都係
我:「整好左,
你睇下啱唔啱
之後我地就坐低,
打開個蛋糕盒俾佢睇下,
若凝:「你知唔知呢,
其實我有一刻覺得你會唔知我講乜
我:「咁睇小我嘅記性
若凝:「都係一刻啫,
唔好講住快啲食啦
我:「你冇食野咩
若凝:「未食晏晝
跟住我地就食蛋糕,
好彩都唔係好難食啫,
同埋真係好甜
Chloe信得過
若凝:「幾好食喎
老老實實係咪出去買
我:「自己整架
尋日冇返工就係整呢嚿野
若凝:「幾好食
我:「我估你仲係鍾意食甜野咋,
所以先整甜啲
若凝:「有時真係鍾意一樣野,
好難會去改
因為已經變左習慣,
快啲一齊食啦
若凝原來真係好鍾意食
同當年一樣,
起碼有一半都係佢嘅,
佢食朱古力個樣都仲係好滿足
依然係冇變,
食完之後終於去到關鍵環節,
我:「咁我嗰晚究竟講得啱唔啱
若凝:「不如俾我講啲野丫
我:「嗯.」
若凝:「其實我以前呢,
好早已經對我初戀嗰個男朋友冇野,
因為我已經習慣左身邊有另一個人,
當然呢啲野我都係後來先知
嗰個人好搞笑,
成日同我鬥氣
把口好硬,
但係其實就心軟到死,
次次我講兩講,
就會即刻順我意,
佢好少展露佢認真個樣俾人睇,
唯一嗰次應該係踢波嗰陣,
輸完之後佢好唔開心,
原本我係嬲緊佢
但係唔知點解,
嗰一刻我覺得,
行埋去安慰佢,
係重要過所有野
嬲唔嬲已經唔重要
最好笑嘅係,
之後佢係咁解釋嗰個樣,
我真係忍唔住笑
佢成日喺我身邊,
好似做乜都一齊,
但係佢又冇表達佢嘅心意
初初我覺得佢係鍾意我
但係慢慢就覺得唔似,
搞到後來我都唔知佢係點
所以一直都唔敢同佢講,
我都係鍾意佢,
直至之後我同嗰個男仔分開左,
因為啲好白痴嘅原因分開
其實我好想同佢好返
但係唔知佢鍾唔鍾意
所以一直無視佢,
去到外國,
原來我先知,
自己真係鍾意左佢,
返到嚟之後,
我好想聯絡佢,
但真係唔夠膽
直至最近見返佢,
我先知原來自己都係冇放低過
我:「你以前係咪問過嗰個男仔,
點解佢要對你攪住初戀男朋友呢一件事咁緊張嘅
若凝:「嗯

若凝:「其實,
可唔可以話俾我聽,
點解你要咁緊張?」


我:「我諗今日可以答到你
因為我鍾意你
之後我就拖住左佢
佢亦都冇反抗,
跟住我喺佢耳仔細細聲講,
我:「其實你知唔知呢,
我由麥當勞嗰陣,
已經鍾意左你
若凝:「唔怪得你日日嚟啦
點解唔搵我傾計
我:「費事俾你當我係狗公
若凝:「咁又係,
如果你嗰陣咁進取,
我諗之後發生嘅事就會唔同
亦未必會鍾意你
等左你好耐喇
我:「你又唔講
若凝:「咁我係女仔丫嘛,
呢啲野點樣講出口
又驚你唔鍾意
咁你又唔講
我:「淆底
若凝:「冇吉屎
不過點都好啦,
最緊要都係活在當下
可能有人會覺得,
我地錯過左咁多年,
咁咪當俾考驗我地
最緊要都係日後.」
我:「嗯.」
之後我就左手拖住若凝,
右手whatsapp嗰班豬朋狗友
我:「多謝各位
之後仲影埋張相我地拖住手
呀成:「頂你好曬呀
丁仔:「咪就係囉
呀余:「Chloe問係咪靠佢嘅蛋糕先得米
我:「你幫我多謝佢啦
之後俾若凝見到,
若凝:「一早估到你係搵人幫手
邊有可能咁好食
我:「你真係醒嘅啫
若凝:「過左咁多年都仲係鍾意講大話
我:「對唔住對唔住
下次唔講
不過可唔可以講下點解你要我咁樣做
若凝:「其實我一直好想我鍾意嘅男仔
整我最鍾意食嘅野俾我食,
哈哈
不過頭先講嘅野有冇呃我先
我:「可以發誓真係冇
若凝:「信你
我:「梗係要信啦
若凝:「喂係喎,
你個facebook icon好似用左好耐
一直想問你點解唔轉
我:「因為張相係你影
我覺得好靚咪唔轉囉
若凝:「識貨
我:「梗係啦
若凝:「不如我地依家影返張
我:「又好啫
之後我地就面貼面影,
2016年10月30日,
我同若凝終於正式拍拖,
呢對手我以後都唔會放.

話說時間真係過得好快
今年嘅4月30日
係我同若凝嘅拍拖半週年紀念
你知啲女人幾睇重呢啲日子
咁我梗係識做啦
我一早訂左機票,
叫埋佢攞假
因為想帶佢去日本玩
直至佢喺機場先問我,
若凝:「點解你要帶我嚟日本嘅
我:「因為我以前講過
若凝:「講過啲咩
我:「話要帶你去日本迪士尼

我:「下次帶你去日本迪士尼.」
若凝:「痴線你講笑咋話,
吹到咁大.」
我:「未來係點冇人知嘅,
可能真係得呢.」
若凝:「咁我等住呢一日.」


我:「今次我冇講大話喇
雖然遲左少少.」
若凝:「你真係好傻
之後若凝就好開心咁攬住我,
而我,
好希望可以繼續同佢行人生淨低嘅路.