《想當年，我係跑Online入面搵到初戀》: 【序】

「喂！我哋玩返跑Online好無呀？」暴龍提議，「玩到無嘢好玩啦，等咗條仆街成半日啦。」

「哇！幾耐之前嘅 game呀？」暴牙好驚訝暴龍竟然會講出玩跑Online，「乜原來你都會玩？」

我一諗起跑Online，就諗起好多往事，於是乎我只好笑笑，表示無咩所謂。

「會呀，小學雞嗰陣玩咗一陣。」暴龍講得好輕描談寫。

咁又係，佢咁沈迷係槍game，好難將佢同跑Online鈎埋一齊。



 「係喎，依家我哋咪夠人玩四人同心囉？」芝士腸佢數一數人頭，然後好興奮咁講。

「你戇鳩架？成班男人係度玩乜鬼四人同心？」暴龍老實不客氣，「係男人就玩章魚爸爸！」

「好喎！」暴牙附和，「都Okay喎！」芝士腸立刻180度轉軑，仲快撚過一級方程式。

「喂！司華力，你呢？」佢哋叫住我。

「我無所謂呀，玩乜都得。」



其實我暗暗係度驚，因為我唔想開個ac俾佢哋知，原來我已經玩到飛鞋。

會俾佢哋笑……真係恥笑架。

好順利咁登入去，懷著戰戰赫赫嘅心情入去玩。

我成功登入，見到一個好熟悉而又陌生嘅名——司華力腸。

「人呢？係邊？開咗房！」



「頂你，你連人哋咩名都唔知，開乜撚嘢房？叫雞叫得多？」暴牙忍唔住了。

「情天霹靂音速小子！」芝士腸大大聲咁講出嚟。

換嚟嘅係我哋幾個嘅笑聲，「屌屌屌」聲咁係網吧入面迴盪著。

我哋幾個都好耐無嚟過網吧，自從放榜前一晚，大家一齊係網吧打機打天光，然後去拎成績表。

以前放學有時間就去打機，玩CS，信長，LOL都有，有時都會玩下freestyle。

依家偶爾去下網吧，都覺得懷念，額外覺得珍惜。因為咁嘅日子，越嚟越難得。越係難得，就越係珍貴。

「你哋又叫咩名呀？係度嘈！睇過？」芝士腸不甘示弱。

佢探過頭去睇下暴龍同暴牙叫咩名，「挑！乜撚嘢點蟲蟲又蟲蟲飛，咪一樣咁戇鳩！」



佢哋兩個都難得理佢。

又難怪佢嘅，佢平時改開啲名都有頭有路，估唔到佢以前咁膠，我都笑埋一份。

以前小學雞時代，改名都特別傻仔過人，依家諗返起，除咗傻笑，更覺係一份難忘嘅回憶。

「點蟲蟲、蟲蟲飛都入咗嚟啦！快啦司華力！」芝士腸叫我。

而我……則點開好友，望住一堆失去顏色嘅名字。

係喱堆名入面，我只留意一個人——牛奶糖。

一個我係跑Online入面，搵到嘅初戀。