「咁又唔係,因為好多嘢你都會同我講,慣咗啊嘛…haha」
 
喱一句我係諗咗好耐先覆,中間不停來來回回地刪改。心中嘅失落無得呃自己,因為我見到喱句我真係唔知點覆。
 
通常我回人好快,諗到咩就打咩,但今次……係我第一次唔知點樣覆。
 
我心口微微發痛,好輕微…
 
好快,喱種痛楚一轉即逝,就消失咗。
 


「好啦,下次去跑步同你講啦!」牛奶糖微笑道。
 
原來表情符號存有一種魔力,可以令你從冰冷嘅螢幕中感受到對方溫暖嘅微笑。
 
「一齊去跑好無?」
 
不知不覺,牛奶糖已經有能力去控制我嘅喜怒哀樂。
 
當時嘅我,開始明白咩嘢叫做「鐘意」。
 


「好啊!我哋將跑Online變為實戰,由虛擬跑到現實喎,係咪勁先?」
 
「係啦係啦,我哋乜都係『跑』,緊係勁啦屌你!」
 
當其中一個人開始改變,喱段關係都一樣……其實都係度變緊。
 
「喂!我同你講啊,我琴晚又追緊一套新劇,好正啊!」牛奶糖興高彩烈咁同我講。
 
一返到學校,牛奶糖放低書包,就轉過頭同我講。
 


老實講,其實心入面係幾enjoy喱種主動俾人搵嘅感覺。
 
而且以前係所有無聊嘢都可以傾一餐,依家就連開口問候一句,都覺得困難……
 
「又咩嘢戲啊,啊……你哋啲女仔真係好鬼鐘意追劇㗎喎!」
 
「咁女仔係咁㗎啦,你哋啲男仔夠鐘意睇動漫啦,我夠唔明囉屌!」
 
我俾佢串到口啞啞,次次駁咀都唔夠佢嚟。

「動漫同台劇係兩樣嘢嚟架,無得比嘅!」我笑住講。

「算!唔同你拗。」佢覺得曬氣嘅眼神,每次都吸引到我想笑。

「我喱排追緊惡作劇之吻!真心好正......直樹又靚仔,湘琴又蠢下蠢下咁.....好匹配啊!」



見牛奶糖打曬冷震咁興奮,我開始慢慢習慣佢喱種俗稱男人婆嘅性格。

自從我成日都同牛奶糖講嘢,個死肥婆我就無理到佢,佢次次同我講嘢都唔會so佢,話知佢死。

「你話呢......男仔係咪,,,,都會鐘意喱啲傻下傻下嘅女仔架?」

牛奶糖眼神閃閃縮縮,無端端咁怕醜都有。

不過我唔會放過可以串佢嘅機會,「做咩啊?咁怕醜?有鐘意嘅人啊?」

我只不過係想串下佢,期待佢俾我嘅反應係「傻啦咪戇鳩啦!」

點知牛奶糖話「有係有...但係好多嘢都唔知啊嘛......」



我估唔到會咁樣,自己初戀條路都唔係易行...

我同啲動畫男主角一鳩樣,自己鐘意親嘅女仔係點都唔會鐘意自己。

好可悲,櫻木花道如是,鳴門都是如此。

嗰一下,好似俾人用槌仔一嘢打埋嚟心口度,好大衝擊。
 
我只能夠強裝微笑。
 
「係啊?邊個啊?講嚟聽下?」我感覺到自己把聲抖震緊,笑容都好僵。
 
「挑!講俾你聽有鬼用咩!?」
 
「快啲啦!答咗我問題先啦!」見佢好心急嘅款,我只好將自己嘅情緒收埋入心。


 
「嗯……每個男仔都唔同喎,就好似有啲女仔會鐘意男仔好cool,有啲會鐘意男仔陽光一樣。」
 
「你講下個男仔係點嘅,先幫到你㗎嘛!」我越係唔想承認喱種酸,就越係覺得酸。
 
自欺欺人嘅感覺唔好受……
 
「佢啊……普普通通咁啦,同佢幾啱傾,傾傾下就……」
 
「哎呀!我做乜同你講埋喱啲嘢㗎?」牛奶糖臉上泛起紅暈。
 
見到咁樣,我嘅妒忌心就越嚟越強。
 
「我哋好朋友嚟㗎嘛,有咩唔講得啊?」我開始心不在薦咁係書包亂咁摷嘢,
 


為嘅就係可以分散下自己嘅注意力,同埋係度諗,牛奶糖講嘅幾啱傾,會唔會係講緊我呢?
 
「唉……算啦,見你咋!」
 
「我哋係補習社識嘅,我覺得佢幾型仔㗎……咁啱我哋補習坐埋一齊,咁就……」

我後尾先知,原來佢口中所謂嘅型仔,只不過係個MK仔。
 
MK仔之所以黑人憎,無非都係因為佢哋搶走我哋喱啲毒撚嘅女神。
 
「咁快就有feel?」其實我想問嘅係……咁我呢?對我又有無feel?
 
「唔知啊,佢就係俾到喱種感覺我……」
 
唔經唔覺,啲人開始返曬嚟,次次都停係啲敏感位。
 
究竟…牛奶糖係要啲咩感覺呢?
 
唔知係咪我錯覺,感覺上牛奶糖覆我MSN嘅感覺耐咗,次數少咗。
 
玩跑嘅時間都少咗,我終於明白現實好多時候都係殘酷,不盡人意嘅事多到數唔曬。
 
我好唔開心,我可以確定自己真係鐘意咗牛奶糖。
 
「喂!司華力,放學去打機啦!」好彩自己仲有班老死。
 
「去囉!」我諗都唔諗,我唔想再唔開心落去,我決定去發洩。
 
以前嘅日子,放學唔係打波就係去網吧打機,諗返起都覺得開心。
 
而係喱種時光入面,我先可以真正專心打機,唔去諗牛奶糖。
 
我開始專心上堂,件肥嘢已經無出聲好耐,好似係佢俾人排斥返咁,我只可以話係自作業,抵撚死。
 
我突然間感覺到褲袋震咗一震。
 
我拎部古董出嚟(而家嚟講),Song ericsson嚟,仲要係推機嚟㗎!
 
當時嘅我,認為自己全身上下最型就係喱部推機Song ericsson,成部機推出嚟真係好鬼死型!
 
不過可惜啊……都無女搵,有乜柒嘢用?
 
就好似你有一碌好大條嘅鳩,但無處展露自己嘅雄風一樣,得物無所用。
 
嗰時係同台sd SMS免費,我同牛奶糖唔同台,我3仔,佢人仔,sd SMS要錢。
 
所以我哋MSN算啦,唔洗錢啊嘛。
 
但突然間佢Sd咗個SMS過嚟,『你係咪唔開心啊?成日都唔見你出聲嘅?』
 
收到喱個SMS,其實內心係幾驚喜同埋感動。就算要俾錢,佢都想要關心下我……
 
我手握部手機,同時思考緊點樣覆牛奶糖。

我掩飾唔到心中嘅喜悅,依家我開心定唔開心,都俾牛奶糖牽引住。

『係啊,有啲唔開心,不過無咩嘢啦。』我一覆會覆好多,因為覆少句就要俾錢,所以一次過打曬自己想打嘅嘢最為實際。
已有 0 人追稿