《香港革命戰》(上): [13-陷阱] PART 2
離開心曠神怡既海邊，離開簡樸純淨既村落，再次坐上Aston Martin...
*叮*「注意，你還有五十分。」
真係係時候返去啦...
雖然仲有五十分鐘，而由呢道返去到黃金海岸都唔駛五分鐘，但預鬆小小係好D既...
而且...可以慳返D LILITH留返下次用。
始終...LILITH太寶貴...
“吼”一聲響，Aston Martin沿住殘舊既青山公路返屋企...
返到去都仲有好多野要做...
“颼”...黑色既Aston Martin衝過樹影...
“沙沙...”捲起地上既枯葉...
*叮*「注意，系統將會offline。期間將不能再使用任何程式，請小姐小心。」
離開地獄...
我真係好想幫系統改過另外一個名...
同埋可唔可以唔好用“小姐”黎稱呼我?!
但...我唔可以話改就改細妹個作業系統...
本身如果要使用一個已被SPIRIT擄走既人既作業系統，就要喺假晶片建立假關聯瞞騙MINDER...
更何況要更改...
要瞞騙MINDER更改作業系統，就要用INTRUDER修改假晶片同MINDER之間既關聯...
要用INTRUDER修改假晶片同MINDER之間既關聯就要借助細妹...
咁麻煩既野，細妹採我都傻啦...
而且當初問佢借用作業系統既時候，就已經千叮萬囑叫我唔好亂咁搞佢個作業系統...
我呢個細妹真係好鬼固執!
呢樣又話唔得...嗰樣又話唔俾!
唉...算數!做大事不拘小節!
都係跟住死海文書行事罷啦...
“颼”...已經見到誡律之牆...則係話...
就快到小欖...
“吼”...衝過長長既架空天橋，駕到黎交匯處...小欖...
小欖，除左係我地SPIRIT既外部臨時基地外，上面仲住左一個好重要既人...
前任屯門統治者－陳星，亦則都係我既生父...
唔知你而家係唔係喺山上面，居高臨下咁俯視整個局勢?
唔知你而家仲係唔係好似以前咁自以為事，不可一世?
一個自視過高既人，係唔係點都諗唔到會俾自己親生仔表決踢出SPIRIT呢?
唔知你有無怪我呢?
你唔可以怪我...
邊個叫你咁狠心，連自己既親生女都忍心放棄!
虎毒不吃兒，你俾獅子老虎、洪水猛獸仲要毒!
係你犯下規條在先...
你無得怪我!
你好好留係呢個山頭上反醒啦!陳星!
“颼”...衝過小欖，又係時候減速，因為好快就到目的地－黃金海岸。
更重要既係...收返埋架Aston Martin...
都係嗰句...如果唔小心整花左架Aston Martin，細妹實唔放過我...
我好小心咁將架Aston Martin駛入橋底隧道...
橋底隧道又窄又暗...
岩岩好夠一架車過...
而且只可以靠Aston Martin既車頭燈照明...
話就話可以定住格，睇定d慢慢過，但壓力咁大...
呼...呼...慢慢黎...慢慢黎...唔好刮花...千期唔好刮花架車呀...
呢條橋底隧道已經無嘜人會用，大概就只有我地SPIRIT。
我地SPIRIT專用黎擄劫既白色輕型貨車就係收埋喺呢條通道後面，山腳既位置。
幾經辛苦，終於都將架Aston Martin駛出又窄又暗既橋底隧道，穿過兩邊長滿人咁長既野草中間嗰條小路，終於見到位於山腳木製車房。
呢個木製車房，裏面已經泊左三架白色輕型貨車，呢三架輕型貨車都係用黎擄人為主。
我地屯門領域而家都係以擄人為目標，但好快就唔再需要進行擄人行動...
只要再擄多兩個人...
三架白色輕型貨車既引擎一D都唔簡單，佢地都係用上微型偽EVE聚合反應堆作動力。
當放置喺車頭既引擎散發出綠色粒子既時候，就係引擎達到極速之時。
只可惜，偽EVE聚合反應堆一離開結界範圍就唔可以以無限能源方法演算...
而更可惜既係...結界範圍內都已經唔可以進行無限能源演算...
前人作既孽...
“沙...沙...”小心翼翼咁將架Aston Martin泊入木製車房入面...
檢查一下車身有無刮花到...
呼...好彩無事...
用黑色布包好車身...
呼~搞掂!
離開車房後，又要沿住草邊小路，穿過又窄又暗既橋底隧道，走到曾飽受戰火洗禮既黃金海岸。
望住呢一整片廢墟，戰火味濃...
黃金海岸...曾經經歷過激烈戰爭既地方...
早喺我未出世之前，SPIRIT岩岩出現無幾耐，解放軍曾經有一段時間，派左大批軍隊喺SPIRIT外圍佈防。
而黃金海岸就係戰略重地。
我地同解放軍曾經多次喺黃金海岸爆發激戰，雙方死傷慘重...
當時既SPIRIT仲未掌握到ADAM、EVE同LILITH既力量...
應該話根本就唔知呢三樣野係乜...
嗰陣時我地亦唔知道誡律之牆有幾厲害，我地唔知道只要ADAM、EVE同LILITH共存既話，誡律之牆係無堅不摧。
我地好擔心，好擔心誡律之牆終有一日會被攻破，所以我地就不斷試圖攻破包圍網。
由誡律之牆打到出小欖，又由小欖被壓返入黃金海岸...
呢種你攻我守，我進你退既情況維持左差唔多十年...
十年過後，由於死傷無數，雙方都唔想再貿貿然出戰。
解放軍決定喺小欖附近注軍佈防，我地就撤退到結界入面研究有關ADAM、EVE同LILITH既事...
呢段時間可以話係同時間競賽...
解放軍一直加強軍備，我地就致力研究ADAM、EVE同LILITH究竟係咩一回事...
跟住落黎既就真係十分精彩又十分複雜，要了解既話真係要花上十倍專心加十倍腦細胞先得。(好老實嗰句，就連我都唔係咁了解...)
喺結界入面，你會發現三種好特別既野:
1.天空上面一大片黑色既物質，我地稱佢為ADAM。
2.ADAM入面不時有一條發出綠光既光條好似水蛇咁遊走，我地稱佢為EVE。
3.平時地面好少見，但當你嘗試砍開結界裏面既樹既時候，樹幹就會流出藍色既液體、飄出藍色既粒子，我地稱呢D藍色既液體同粒子為LILITH。
ADAM、EVE同LILITH...可以話係我地SPIRIT既核心...我地既一切...
我地對呢三種物質進行左好多次調查、研究、測試...
用上幾年既時間，無數咁多人力，得出既報告指出...
ADAM擁有毀滅性。可以將所有物質扭曲、粉碎、分解、完全消失...稍有不慎，毀滅世界...
EVE擁有極強大既能源。強大既能源比起我地平時用開既電更有效益...但EVE既不穩定性接近失控狀態，而超乎想像既超載能量亦都係極具毀滅性...稍有不慎，毀滅世界...
而LILITH...起初我地係察覺唔到佢既存在，直到我地砍左一棵世界之樹...
我地發現被砍既樹幹會流出藍色既液體、飄出藍色既粒子...
呢D液體同粒子續少續少咁流出，續少續少咁飄散...
我地可以肯定呢D液體絕對唔係水...
但我地又唔知呢D液體由邊道黎...
而更奇怪既係，被砍剩留喺土地上既樹根並無壞死，反而繼續生長...
過左唔夠一個星期，整棵世界之樹又生返出黎...
我地認為LILITH係一種有助生命成長既液體...但副作用會係乜呢?
我地推算，LILITH為生命帶黎驚人既貢獻，自然會有更驚人既副作用...而且稍有不慎，毀滅世界...
可惜，當時既SPIRIT仲未發現LILITH既副作係一種咁強大既武器...
直到22年前，我出世嗰一年，解放軍經過一連串以荷電粒子砲系列對誡律之牆作直接攻擊測試後，決定向我地作一次性殲滅軍事行動。
我地深明荷電粒子砲系列破壞力驚人，可以輕易毀滅一切。
但強大既效益必須付出強大既代價係世界既真諦...
需要固定使用同長時間充能正正就係荷電粒子砲系列既致命缺點!
所以當時我地就決定喺解放軍未設好殲滅網之前，突襲佢地既Main Weapon Team!
而更主要原因係因為我地仲未完完全全掌握ADAM、EVE同LILITH既技術。(而更真實既係...到左而家呢一刻都仲係未完全掌握...所以之前點解我會話“就連我都唔係咁了解”呢...)
當解放軍既前線部隊掩護Main Weapon Team進軍致靠近黃金海岸既時候，埋伏喺黃金海岸既行者四面夾擊!
行者以五人一隊，用新型既實體子彈自動步槍同RPG，試圖突破解放軍既前線部隊，殲滅Main Weapon Team!
但事實上，莫講話要殲滅Main Weapon Team，就連突破解放軍既前線部隊都做唔到...
當時解放軍既裝備已經用上納米超合金科技技術，一般既實體子彈係無可能打穿...
再加上緲子學既發展，解放軍已配備高熱能光槍作為常規裝備...
輕輕一支熱能光都可以將肉體化為輕煙...
古老既實體子彈自動步槍對上新穎既高熱能光槍...科技上既差距...真的嗎?
但更現實既係，我地既科技早就已經超越左佢地...
早喺2054年，我地已經解開左ADAM同EVE既演算方式。
2054年對峙第九年，我地喺誡律之牆上有重大發現。
我地發現誡律之牆係以大量既ADAM粒子加上少量既EVE粒子「建造」出黎。
原來當大量既ADAM粒子加上少量既EVE粒子就會產生出一種極堅硬既物質!
呢個發現係相多重要，因為咁樣就意味住只要控制到ADAM粒子同EVE粒子既比重，就可以創造出唔同既物質出黎!
我地用好多時間、方法、人力去研究...
喺研究誡律之牆既同時，我地亦發現另一個更重要既問題，EVE粒子...
EVE粒子既能量雖然強大，但原來係會耗盡，需要充填...
但點樣充填呢?
調查發現，當EVE既能量差唔多耗盡，變得虛弱之時，喺天空上面，ADAM裏面，好似水蛇咁遊走既EVE就會游近誡律之牆上方，圍住誡律之牆上方轉一圈。
當EVE游完一圈後，誡律之牆既EVE能量就會充填完成。
呢種情況每12小時會發生一次...
我地相信，EVE粒子就同電池一樣，係儲存及供應能源既器皿。
而喺ADAM裏面好似水蛇咁遊走既EVE就好似發電機咁，有為其他擁有EVE粒子既質物充能。
我地亦相信誡律之牆有某種能力，呼喚喺ADAM裏面遊走緊既EVE游過黎，為牆裏面既EVE粒子充能。
但一切都係推測同估計...我地可以點樣測試呢?
我地想嘗試以律之牆既數據造出一個細小既模型做實驗，但點樣可以取得ADAM同EVE粒子呢?
我地有試過用小型飛行器飛上天空，探測下世上(應該係)最大既ADAM粒子...
但唔試由自可，一試嚇死人!
當我地嘗試用小型飛行器飛近ADAM，小型飛行器既電能突然全部消失!
當小型飛行器失去動力，正要急速下墜之時，突然一道力由ADAM傳黎!
小型飛行器突然開始扭曲...不斷慢慢扭曲...扭曲...慢慢一直扭曲...扭曲入ADAM裏面...粉碎、分解、完全消失...
小型飛行器完全消失...就好似從來都無出現過一樣...
當時在場既人都被嚇到目瞪口呆...
ADAM太可怕...
你要知道，就算要將一件物體整到變成粉、變成灰，仲會留返D粒子喺世上。
但ADAM...就好似吞噬一樣...全完唔知道將小型飛行器吞噬左去邊...
自始，無人再敢飛上天空...
接近ADAM係危險既事，我地又無辦法喺堅硬既誡律之牆上面求其挖一忽出黎做實驗...咁點算呢?
呢個時候，我地發現左地面上有一樣同ADAM有幾分樣似既野...
一樣係深黑色...一樣有綠光...
呢樣野就係世界之樹...
一路傳落黎既傳言話，世界之樹係由ADAM、EVE同誡律之牆出現後既第三日開始生長...
起初，世界之樹既生長速度極為驚人!
由開始到短短不足一個星期已經遍佈整個結界範圍!
密密麻麻，密密麻麻，整個結界範圍都佈滿密密麻麻既世界之樹!
世界之樹擁有住ADAM同EVE既特性，深黑色既樹幹，閃住綠光既樹葉。
我地對世界之樹展開深入研究。
研究發現世界之樹本身亦會產生出少量能量，而呢D能量亦都同天空上既EVE有連動。
當世界之樹釋出能量，樹葉發出既綠光就會特別光亮，而天空上既EVE就會游走黎，吸收部份由世界之樹釋出既能量。
被吸收能量後，樹葉發出既綠光就會減弱...
但問題黎喇，我地有收集世界之樹釋出既能量作分析，亦都有收集天空上既EVE發出既能量作分析。
將兩邊能量分析後再作比較...
比較後發現，兩者既能量並唔相同...
意思係EVE所產生既能源同世界之樹所產生既能源係唔一樣，咁點解EVE要吸收吸世界之樹既能量呢?
我地有嘗試以束子分離器抽取世界之樹裏面既EVE粒子。
但一抽取，EVE粒子裏面所儲有既能量就會立即耗盡!
我地亦有試過不斷向同一質物注入EVE粒子，但仍然無法追及消耗速度!
其消耗速度真係極快!
以緲子學換算既話，一秒就可以消耗一億mn緲子!
除此之外，喺EVE粒子消耗既同時，其不穩定性向四周散發高破壞性能量!
研究初期，有唔少設置被EVE粒子破壞，亦有唔少研究人員被EVE粒子殺死...
另一方面，當EVE既能量耗盡，ADAM粒子就會瓦解...
ADAM粒子瓦解既過程亦非常特別!
當ADAM粒子瓦解既同時，世界之木除左會越來硬，而且仲會越來越輕!
到左最後，世界之木就會硬到無堅不摧，輕到可以飄浮喺空中!
而家，世界之木已經成為左我地SPIRIT既主要材料。
咁EVE呢?
ADAM粒子可以話已經掌握到，但我地仲未掌握得到EVE粒子既能量控制...
我地相信，我地忽略左一D好微細，但又好重要既細節...
呢個時候，有一個聰明既科學家突然提出一個論點－包剪揼理論。
何謂包剪揼理論?
簡單黎講，世界萬物都有正反兩面，相生相剋。
有始必有終，有生必有死，有聚也有散...
還沒有開始，才沒有終止，難忘未必永誌...
互相抵消，互相剋制，互相結合先得以永恆。
既然ADAM粒子同EVE粒子唔可以產生出互生作用，則係話中間至少仲缺乏左一樣野...
呢樣野係乜?
正正就係由被砍既樹幹流出藍色既液體、飄出藍色既粒子...
起初我地並無為呢D粒子改名，直到我地發現呢D粒子既重要性先幫佢改名為LILITH粒子。
LILITH粒子本身除左有助生命成長外，仲有一種好特別既“副作用”－抑制能量。
LILITH粒子可以抑制EVE粒子既能量轉換，令能量穩定!
世界之樹所散發既能量正正就係LILITH粒子呢部份既能量!
所以我地假設，世界之樹有分解、聚合、過濾之用。
而我地既聚合反應堆就係base on世界之樹建造。
ADAM、EVE同LILITH亦以剪揼理論下，演算出無限能源方法實現。
其後五年間，我地利用EVE強大既能量開發出E.R.F.D.S.、EVE粒子槍、
EVE粒子砲系列等裝備。
相對當時既解放軍，我地既科技仲先進過佢地20年!
但最大問題係...我地無辦法喺結界之外用上呢D裝備...
因為唔知咩原因，當裝備離開結界範圍，裝備內既EVE能量就會消失...
就算用上大量既LILITH，亦都只可以維持到好似偽EVE聚合反應堆呢種機械運作，而且無法達成無限能源方法演算...
為左可以喺結界範圍外都可以用上EVE裝備，我地好努力咁搵出根源。
我地相信，根源就係LILITH粒子!
只要搵到LILITH本身，就好似天空上既ADAM同EVE，我地就可以用EVE作出反擊!
我地既努力，直頭可以用瘋狂黎形容!
花左好多年，花左好多人力，我地都仲未搵到LILITH本身...
直到解放軍將我地既行者迫返入黃金海岸...
解放軍先以強大既荷電粒子砲武器打開缺口，為地面部隊開路。
毀滅性既緲子直接將整個城鎮分開兩邊，我地頓時潰不成軍，忙於重整旗鼓。
解放軍派出地面步兵向我地既陣地進迫。
大量身穿納米超合金智能科技戰鬥衣，手持高熱能光槍同身穿納米超合金智能科技戰鬥裝甲二型，背住手持式長距離線性集速炮既解放軍士兵由四方八面迫近黃金海岸。
我地以古老武器，實體子彈、炸彈、炮火還擊。
子彈殼散落滿地，爆炸聲此起彼落，風煙四起。
只可惜，我地既抵抗軟弱無力，根本傷唔到解放軍。
解放軍步步進迫，身穿智能科技戰鬥裝甲二型既士兵雙腳發出勾爪式設備，緊緊地爪到地面，使身體穩固地固定喺地上...
一條又一條強烈既紅白色光線由各手持式長距離線性集速炮口發出，直擊我地既陣地。
牆身被打穿，建築物開始倒塌...
身穿納米超合金智能科技戰鬥衣既士兵趁機突入，高熱能光槍不斷發射出高熱能光...
高熱能光打穿牆身，打中我地既行者，化分輕煙，飄散，消失...
我地面對強大既解放軍，只可以向後退守，一直向後退守，退守到沙灘邊，海邊...
就喺呢個前無去路，後有追兵既同時，一道藍色既衝擊波由結界嗰邊衝過黎!
衝擊波一直衝過黃金海岸...衝過小欖!
好奇怪，被藍色衝擊波衝過既地方上面既電子產品全部失去能量!
就連我地既火藥都無效...
但呢個絕到係一個反擊既好時機!
因為面前既解放軍士兵所穿既戰爭衣或裝甲全部解除!
我地既行者利用常備在身，刀身刻有“SPIRIT”字樣既匕首將解放軍一個又一個殺死!
一刀又一刀...多年黎抑壓住既憤怒...仇恨...一刀又一刀插入惡魔體內!
一個又一個惡魔慘叫...一個又一個惡魔倒下...
血由被刀刺穿既傷口流出...血流成河...染滿整個黃金海岸...變成血紅海岸...
衝擊波...邊道黎既藍色衝擊波?
原來，結界內已經鑽探左一年既巨型地下鑽探機終於鑽出一個地洞!
地洞有成500KM深!
當地洞被打穿，大量LILITH粒子由地洞迫出!
產生巨大既藍色衝擊波!
藍色衝擊波帶有強烈抑制能量，將被衝擊範圍內既所有能量瓦解!
能量瓦解...就係LILITH真正既副作用...
而更嚴重既問題係，地洞打穿後，我地結界內既電能亦被瓦解，呢個時期足足維持左六年...
六年以黎，我地就要依賴EVE能源取代電能...
六年之後，黃金海岸以外既LILITH粒子開始減弱，電能可以再次使用，只係殘留住一D會影響電波既粒子，我地亦終於對LILITH有多一Ｄ了解。
我地研究出控制LILITH粒子既方法。
我地可以控制LILITH粒子既分裂，去控制影響對能量瓦解既狀況。
使電能可以再次喺結界範圍內生效或瓦解。
雖然可以再次使用電能，但我地早就已經全面使用EVE能源...
用左咁大篇幅去介紹我地SPIRIT、ADAM、EVE同LILITH，相信唔係悶到腐皮上一頁就係一頭霧水。
唔好話你地，就好似開頭所講，到左而家，我都仲唔係咁了解...
事實上，過左咁多年，我地對ADAM、EVE同LILITH既認知大約就只有70%...
坐喺海邊，吹住海風，望住掛有太陽既天空...有太陽既天空...
好喇...又要返去無太陽既天空下...
仲有好多野等緊我返去處理呢...
沿住沙灘一直行，行到去一堆瓦礫上面...
沙地上，佈滿左大大小小，三尖八角，不規則既瓦礫...
瓦礫之中，沙塵之下，有屬於我地SPIRIT既標誌－五芒星。
五芒星，係我地SPIRIT既根源，係我地SPIRIT既象徵。
我地將五芒星設計成折疊之門既開關裝置。
裝置需要名冊去認證。
只要用我帶上名冊既左手喺五芒星上面輕輕一掃，黑色既名冊上就會出現綠光線遊走。
呢D綠光線其實就係EVE粒子。
名冊之所以可以喺結界外使用，原理就好似偽EVE聚合反應堆咁，要用上大量LILITH去暫時鎖住同穩定EVE能量。
當然，唔可以長時間同大量使用名冊，亦只可以用有限度既EVE能量...
EVE能量傳送到五芒星，兩者產生出關聯。
五芒星刻紋中亦開始發出綠光。
綠光線慢慢咁越黎越強烈，越黎越鮮明。
一道強綠光閃過後，面前出現好似黑洞一樣既折疊之門。
望住個太陽，行入折疊之門...『點樣先可以將陽光帶到結界之內呢?』
被黑洞吞噬既同時，身體感覺到好似置身於重力邊緣，失重既空間之中。
呢個好似黑洞一樣既折疊之門其實係用上ADAM粒子製成。
ADAM粒子除左帶有毀滅性外，只要注入適量既EVE粒子同LILITH粒子，就可以令空間折疊。
而呢個失重既空間我地稱佢為ADAM領域。
另外喺眼前飛過既綠色光子，正正就係EVE粒子。
好神奇呢?
只要有效咁控制ADAM、EVE同LILITH，我地SPIRIT無咩野做唔到。
只可惜前人作既孽...
EVE粒子移動速度越黎越快，越黎越急，越黎越多，越黎越光，越黎越強，越黎越耀眼。
ADAM領域被EVE粒子既強光掩沒，眼前就只有綠光一閃...
開始感覺到EVE系統經由我手腕上既名冊同我作出連動...
眼睛開始見到一D想知既資料...
包括我既身體狀態...身處既位置...阿風搵過我既通知都由一個又一個白色外框顯示出黎...
EVE系統...
我開始睜開雙眼，眼前所見，一個廣闊既大堂。
牆身、地板、天花、扶手、樓梯都用上黑色既世界之木製造。
空間中充滿一個又一個拳頭咁上下大既EVE粒子飄下飄下。
呢D EVE粒子非常光亮，可以用作照明。
但當然唔會只係用黎照明咁簡單...
呢D喺結界內無處不在既EVE粒子，主要用黎監察四周。
所有呢種EVE粒子都有連接EVE系統，就好似地獄裏面天眼連接MINDER一樣...
但當然唔會好似全方位主動式防禦系統咁有殺人既權力。
而至於呢道...係聚合反應堆(西部)。
雖然我地喺結界裏面唔同既地方設置左好多個折疊之門既啟動裝置，但我地屯門領域只會利用呢個聚合反應堆(西部)同黃金海岸作為進出既聯繫。
一切都係因為LILITH...
折疊之門聯繫既距離越遠，所需要既LILITH能量就越大...
我地唔可以再浪費太多LILITH...
沿住黑色既樓梯一直落，向住大門方向行。
其間一直都有一部又一部外表白白，銀銀，中間一個拳頭咁上下大既圓形物體，發出綠白既光向纖幼既四肢同頭部流動，閃下閃下，好似流水，好似心跳...
全身以金屬、塑膠質料製造...
防禦者RU系列，用黎保護屯門領域既安全。
由外表睇上黎，呢D防禦者RU系列有D似機械人，實質係由人手遠端Remote控制。
RU意指Remote Unit。
全身以EVE能量作能源，心口設有一個拳頭咁上下大既圓形物體係微型EVE聚合反應堆，基本上喺結界範圍內可以以無限能源方式演算。
身體各部份材料都係由世界之木用唔同方法冶煉出黎，黎種技術可以話係神賜俾我地...
一部又一部防禦者RU喺身邊經過，一部又一部防禦者RU專注自己既任務。
其間並無任何一部防禦者RU向我敬禮。
雖然我係呢個領域既統治者，但實質我同普通一個平民無分別。
因為雖然我地有分唔同既崗位，但就無階級之別。
就好似我地既行者咁，雖然有預行者、先行者、執行者、隨行者、修行者之分，但就無高低之別。
行者既分別主要在於處理任務，唔同既行者有唔同既任務，而每個任務都係咁重要。
所有人都係平等，並無貴賤高低之分。
我地並唔會計較得失，我地並唔會計較多少。
我地每一個人，只會做返自己想做既事，岩既事，唔傷害別人既事，對SPIRIT有貢獻既事。
人，本來應該就係咁，但由幾時開始，人類變得自私自利，斤斤計較，非賺到最盡不可?
大概係由傲慢出現開始...
一直行到去壓縮空氣閘門前，門就立即打開。
“颼”一聲響...EVE既光芒照亮面前每一個角落。
又會咁岩遇上能量聚合...
喺我身處既地方，聚合反應堆(西部)既用途就係好似誡律之牆咁，吸引EVE過黎俾能源我地。
但我地做多左少少...
我地改良左少少，令EVE直接飛落黎，將大部份EVE能量吸走，加工再分去有需要既地方。
我地亦都會儲起部份EVE能量，因為EVE能量仲有好多用途用得著...
沿住黑色既樓梯行到落地面，“颼...” ...“颼...”...左邊已經有好多架車喺馬路上行駛緊。
SPIRIT裏面既馬路係唔需要燈位，因為所有車輛都係由EVE系統駕駛，就好似地獄裏面，MINDER所控制既自動導航系統一樣。
不過EVE系統就更加強大，因為只要你帶住名冊係手，佢完完全全知道你諗緊乜，想點做。
所以就算你突然衝出馬路，都唔會被車撞。
雖然交通好方便，但我唔想坐車，我想慢慢行返去。
我向住右邊既公園行過去。
每次由地獄返黎，我都會經過呢條小路。
小路兩邊長滿閃住綠光既世界之草。
一閃，一閃，襯托黑色為主既環境。
閃亮既綠光帶領住我走去傷心既地方－行者墓園。
自SPIRIT出現之後，所有為SPIRIT犧牲既行者都會葬喺呢個墓園上。
而由我擔任屯門領域既統治者之後，每一個墓碑都係由我親手製造。
一枝又一枝以世界之木製成既墓碑...由我親手製成既都已經有615枝...
「戰爭總要有人犧牲。」老豆以前成日都會講呢句。
假如真係要犧牲既話，亦都太過多喇...
「每一條生命都係寶貴。」細妹周不時都會提醒我。
我地已經犧牲左好多寶貴既生命...
我地實在犧牲得太多...
犧牲左咁多，審判之日都仲未降臨...
我地仲要犧牲幾多先夠?
我地唔可以再白白犧牲...
好快...我唔會再俾任何人犧牲...
好快...唔快都唔得...
我地已經時間無多...
一定要速戰速決!
穿過行者墓園，穿過架空通道，經過幾個EVE能量存放壓縮空氣箱，行到黎監控中心(西部)，終於返到黎。
監控中心(西部)係整個控制中心既其中一部門。
監控中心(西部)充滿一個又一個用壓縮空氣幕牆間開既房間。
呢D房間裏面既工作人員主要監控整個屯門領域既保安同能源輸送有無出現異常。
裏面懸掛住一個又一個以EVE粒子實體顯示器，就好似投射顯示器一樣，不過有小小分別，你係可以實實在在觸摸到EVE粒子實體顯示器。
工作人員好小心好專心咁工作，確保唔會出現任何問題。
全個SPIRIT既人都會好似呢道既工作人員一樣，好熱愛自己既工作，好嚮往自己既工作。
至少屯門領域既人民係咁樣生活...
而我既工作...係要落到地下100層深既地底層...
沿住房間與房間之間既通道行，轉左幾個彎，穿過幾部正喺道巡邏既防禦者RU，升降機已經為我打開門。
當然啦，就正如剛才所講，我心裏面想D乜，EVE系統都會知道。
一切都盡在EVE系統手中。
行入升降機後，壓縮空氣閘門隨即關上，升降機亦開始開下落。
升降機一直向下落，一直向下落。
過左五層之後，進入地底層。
越底層既範圍主要係行者既基地。
每一層都有佢地既用途。
有D樓層係用黎訓練，有D樓層係用黎休息，有D樓層係用黎存放裝備，有D樓層係用黎做維修，有D樓層係用黎做研究，有D樓層係用黎做控制防禦者RU系列既控制室...
平日我地既行者全部都會住喺呢道，喺呢道生活，喺呢道工作。
其餘時間就係喺外面執行任務。
每過二十層，都會有一層分隔層。
主要係為左防禦外來入侵同埋地底深處既不穩定因素...
好快穿過四層分隔層後，黎到地底100樓層...
壓縮空氣閘門打開後，前面係一條好特別既走廊。
呢條以黑色為主既走廊大約就只有兩人既身位闊。
黑色既牆身、黑色既地板同黑色既天花裏面不斷有一條又一條綠色光線飛過。
大家都應該開始有一種認知，綠色既光線就係EVE粒子。
無數既EVE粒子不斷飛黎飛去，飛向正前方，又由正前方飛過黎。
我一直沿住筆直既通道行，一直行，一直行...
終於行到通道既盡頭，一道黑色大閘門面前，門上有寫住“INTRUDER”。