《香港革命戰》(上): [21-爭分奪秒] PART 2
同阿月、阿風喺人民區域浪費左太多時間。
無錯!我係會用浪費黎形容，因為我唔可以自甘墮落!
我無時無刻都要提高心理質素!
唔可以俾阿月帶壞!
「阿日!」腦內閃出阿霖聲音，「呢次弊喇!」
『咩事?』由思緒傳入阿霖既聲音都聽得出佢好緊張...
「岩岩收到匯報，有消息指元朗領域正派出行動部隊要殺死李飛揚!」阿霖既聲音大到差D就要轟掉我個腦。
『咩話?確認左未?』元朗領域?!
「未能確認...因為喺外部出黎既元朗領域內部消息...消息來源比較複雜...不過有70%既準確性支持!」阿霖一邊講，一邊分析。
『阻唔阻止到?』點解元朗領域要殺李飛揚?!
「唔得!消息指，佢地足足派出圍數50人...一整隊攻擊隊!我地無足夠人手阻止!」阿霖既情緒明顯比之前梗焦急...
竟然派出咁多人手…
呢個鄭穎心...點解無啦啦要打李飛揚主意?!
『你繼續收集有關資料，一有咩消息就立即通知我!』
「了解!」
如果而家派出部隊營救...
無可能!以現事既情況，要喺呢邊派出咁大規模既部隊過去，一定會俾解放軍察覺到...
到時莫講話要救李飛揚，未見到元朗領域既人之前就已經俾軍放軍截擊...
但我地又無路可以繞過去截擊元朗領域既攻擊部隊...
點好呢...
我望一望身邊既阿月，我見到佢個樣好似想喊想喊咁，雙眼就快流出眼淚…
『阿月...』我都仲未將我要講既說話講出口...
「我要去救飛揚!」阿月就轉身跑走左去。
『喂!妳點救呀?』我向住阿月既身影大叫。
「INTRUDER!」阿月邊跑邊大聲叫。
INTRUDER?!
阿月...我而家理唔到妳，妳唔好亂黎先好...
「發生咩事?」阿風好似乜都唔知咁既樣。
當然佢乜都唔知啦...
『元朗領域派出攻擊部隊去擊殺李飛揚!』我簡單交代一下整件事。
「咩話?一隊攻擊部隊?幾多人?」阿風皺一皺眉。
『50!』我特別強調。
「50人?!咁誇張...睇黎元朗領域要致李飛揚於死地...究竟點解佢地要咁做?」阿風打量左一下...
『唔知...暫時所得既情報無講...但呢點都唔係重點!我地而家最重要既係諗方法阻止元朗領域...』我又諗左一諗...
「阻止...」阿風又諗左一諗...
阻止...無錯喇!我地要阻止元朗領域!
『我地要入去元朗領域，阻止佢地既行動!』要入去元朗領域...
「入去元朗領域?點入丫?仲有點阻止呀?」阿風一面困惑。
『無時間喇!我地邊行邊諗!』我立即起步，向住控制中心跑過去。
我同阿風一真跑向控制中心。
「阿日，你打算點樣走入元朗領域呀?我地無通道過到去架喎!」阿風跟住喺我後面。
『我都未諗到...』的確，唔係嗰D日子，我地根本就無辦法過去。
「咁我地跑去控制中心都唔係辦法架喎!」阿風繼續跟住喺後面講。
『我地搵左阿賢先!阿賢係對外防禦既決策人...仲有天欣!話晒內部禦係佢負責!』阿賢...天欣...
無錯喇!要先聯絡左佢地!
我立刻利用思緒，同時間向阿賢同天欣連接:『你地立即去作戰策劃中心等我!』
「了解!」阿賢同天欣諗都唔諗就立即回覆。
兩名先行者級數既要員都召集左，仲有D乜要準備?
我同阿風一直跑，好快，我地就跑到入控制中心範圍!
擦過一部又一部正在巡邏既防禦者RU...
防禦者RU...
『我地既防禦者RU有無可能可以進入到元朗領境?』我問一問緊隨其後既阿風。
「一定唔得!雖然未做過有關測試，但可以好肯定我地既波段係過唔到去元朗領域!」阿風立即否定。
果然真係唔得!
但如果無左防禦者RU，我地又唔可以就咁走過去元朗領域...
就算真係俾我地走到過去，乜輔助都無之下，同赤裸裸喺敵人面前裸跑無分別!
有乜野可以代替防禦者RU呢...
代替防禦者RU?!
無錯喇!
『Sacred-Armor!Sacred-Armor可唔可以喺元朗領域運作?』我地仲有阿風既得意之作!
「Sacred-Armor…理論上係可以...就算喺元朗領域，都可以吸取嗰邊既EVE粒子同LILITH粒子作能量轉換...之但係...未試過實際測試...」我未等阿風講完...
『而家有幾多套Sacred-Armor準備好?』而家唔可以再諗咁多…
「十...而家就只有十二套係完全通過測試!」阿風打量左一下。
十二套...就係得十二套咁大把...
『你立即去同我準備好呢十二套Sacred-Armor!十五分鐘內，我就會帶人過黎!』十二個人對一個領域...
「了解!」阿風立即跑左去第二邊。
而家講梗係十二個對一整個領域...
會唔會有D過份?
如果真係俾我地入到去，我地有好大機會會直接與防禦者EU對決...
十二個對一整個領域既防禦者EU...
會唔會太過衝動?
會唔會太過魯莽?
會唔會太過不智?
我跑得好快，喺精神液生效之時，我跑得比平常人更快!
好快我就跑到去早就為我打開大門既升降機。
唔得喇...唔諗得咁多喇...
點都要阻止元朗領域既行動!
升降機一直落，一直向下落。
好快就黎到作戰策劃中心，阿賢同天欣都已經企左喺道等梗我!
「以下既對話內容會被紀錄。」阿賢同天欣兩位先行者確認紀錄程序後...
『聽我講，而家元朗領域要派出一隊攻擊部隊擊殺李飛揚。我地今次既任務係要進入元朗領域阻止佢地!你地每人各帶四名最得力既行者跟我出發!』我已經急不可待指示阿賢同天欣。
天欣困惑咁望住我:「我地要進入元朗領域?點進入?」
『我仲未諗到，但我地要借用Sacred-Armor!』只可以借用Sacred-Armor...
阿賢打開左幾個顯示板:「Sacred-Armor?!我地未試過用...更何況未有任何計劃，貿貿然就出動會唔會太魯莽?」
我一手就掃走阿賢面前嗰幾塊顯示板!
『我地已經無時間喇!李飛揚唔可以死!李飛揚一死，就咩都玩完!』或者我咁講真係好無說服力，但唔係咁真係唔知可以點...
阿賢同天欣靜左落黎，諗左一諗...
『唔好再諗喇!我地無時間架喇!作戰計劃乜野乜野都好，邊行邊諗喇!而家立即召集行者!十三分鐘內去阿風嗰邊集合!』我向阿賢同天欣發出最嚴肅既命令。
「了解!」阿賢同天欣接受指領行，立即跑去升降機。
無錯喇，突發既情況唔容許我地再慢慢從長計議!
而家我地就只可以見招拆招!
『阿風，你嗰邊準備成點?』我一邊打開幾個顯示板，一邊向阿風用思緒連接。
「仲…仲準備梗…俾多少少時間我!」阿風有D急忙。
『俾多十分鐘你。』我拉出幾個SPIRIT既地圖出黎睇一睇。
「咁則係無俾多…」我無等阿風將說話講完就終斷連接。
我睇一睇元朗領域...被黑影遮掩左...
無錯，自從分裂之後，我地各自既領域都唔會俾對方以實時地圖睇得到。
我地就只可以見到分裂之牆既部份...
但我地可以利用仲未分裂之前既影像作對比...
假如我地要阻止元朗領域派出攻擊部隊擊殺李飛揚，我地就要去佢地既控制中心...
以我出席會議既印像，佢地既控制中心喺呢道...
同現時既地圖重疊...分裂之牆…控制中心...最近既位置...
都係分裂之牆既大門...
要走入元朗領域，都係要走到分裂之牆既入口...
簡單畫過幾筆路線圖，存入我既紀錄入面，去定阿風嗰道!
綠色既導引線已經出現，為我指引走向阿風既路線。
沿住路線，走入升降機，又走過幾條壓縮空氣管道，終於走到黎存放Sacred-Armor既地方。
『阿風。』我一邊接近阿風，一邊叫一叫佢。
「唔好催我唔好催我…仲差少少修正…好快好快…」阿風喺幾十塊顯示板包圍下指指點點。
我行到整間房間較中間既位置，面前放左十二個壓縮空氣管...
十二套銀白色既Sacred-Armor被浸泡喺LCL裏面。
『用LCL保存住Sacred-Armor...』我行一行梗D壓縮空氣管，望一望浸喺裏面既Sacred-Armor。
「係丫!保持機能完整性嘛!」阿風一邊喺D顯示板上畫畫掃掃，一邊解答我既疑問。
因為世事萬物只要係跟住時空流動，就會衰弱、衰減、衰退。
機械、金屬亦唔例外...只係時候比較長，所以唔多覺。
但用上LCL保存Sacred-Armor就可以令機能保持喺零消耗狀態，保持新鮮。
而且呢種LCL保鮮法仲可以重複使用，咁就唔會消耗LILITH。
「仲差少少!唔好催我!唔好催我!」阿風喺道自言自語。
睇黎阿風比我更緊張。
「佢地呢?」阿風雙眼仍然專注住喺顯示板上，眼尾都無望過我一眼。
『黎…』我都未將個梗字講出口...
“吱”後面既壓縮空氣閘門打開。
“咯...咯...咯...咯...咯...”幾個腳步聲走入黎...
我回身一望，係阿賢同天欣佢地...
佢地一行十人一字排開。
「立──正!」阿賢同天欣同時向佢地既行者發出命領。
『稍息!而家你地將要接受一項危險既任務!』我望住面前一眾行者。
今次既任務係前所未有咁危險...
『我地今次既任務係要進入元朗領域，搵出元朗領域既統治者鄭穎心!』我再望一望住一眾行者。
其中一個執行者聽到我話要搵出元朗領域既統治者之時，佢既眼神有D遊離。
『你!係唔係對任務有異議?』我指住嗰個眼神遊離既執行者。
「無!」執行者緊握拳頭，雙手打交叉放喺胸前，筆直地立正!
『我知道大家一定會有個疑問，點樣走入元朗領域。老實同大家講，我都未諗到。但!我地已經無時間!只可以邊行邊諗!我相信去到分裂之牆前，一定諗得出入去元朗領域既方法!大家對我有無信心?』我嚴肅對住面前既眾行者。
「有!為了SPIRIT!」眾執行者緊握拳頭，雙手打交叉放喺胸前，筆直地立正!
『為了SPIRIT!』我都緊握拳頭，雙手打交叉放喺胸前，筆直地立正!
但...我對自己都無信心...
我到而家都諗唔到要點樣越過分裂之牆，進入元朗領域...
「搞掂喇!我地可以先著上緊身衣!首先除晒身上既衣物。」阿風撥開晒所有顯示板。
除晒身上既衣物...
『但係天欣...』我都仲未將說話講完。
「我無問題。」天欣已經將身上既衣物除落黎。
眾人將自己既衣物逐一逐一除落黎。
我亦都不敢怠慢!
快快手手將身上既衣物全部除落黎，我地十二個人都赤裸裸肉帛相見...
老老實實我唔係好敢望住天欣，因為天欣既身段好優美...
我怕我望多兩望會...
色慾喔~七罪宗~
“吱”我望一望地下，地面突然升出幾個白色圓形圖形。
「都準備好喇嘛?黎!企喺白色圓形圖形上面，唔好郁。」阿風邊說邊企到白色圓形圖形上面。
我地十一人亦都跟住阿風，企到去白色圓形圖形上面。
過左一、兩秒後...
白色圓形圖形上一直有白色既液體由我腳掌向上遊走。
「放鬆一D。」阿風放鬆個人。
我地十一人都跟住阿風一齊放鬆企喺原地。
白色既液體一直由腳掌遊到大腿...呢種感覺...
外層有D反光，質感有D似...LCL...仲有D冰冷...
白色既液體一直遊向上，有D似被撫摸既感覺...由小腿...到大腿內...
被包住...遊到上小腹...胸口...左右手...一直到頸...耳背...停左落黎...
『呢個就係...』我望住緊緊包住身體每一寸肌膚既白色反光物料...
「LCL緊身衣。」阿風鬆一鬆雙手。
『以LCL固態化既緊身衣...』我都望一望自己雙手，握一握，鬆一鬆。
「無錯，以液態LCL轉換成固態化既緊身衣。」阿風再鬆一鬆雙腳。
估唔到阿風已經掌握到將LILITH固態化...
如果時間許可，真係唔駛過多十年，我地可以解開EVE、ADAM、LILITH三者互生既秘密!
可惜...我地就係缺乏時間...
「LCL緊身衣...就好似置身喺LCL裏面咁...好似乜都無著咁...」天欣摸一摸佢既豐滿乳房。
無錯...就好似無著衫一樣...
除此之外，我仲能夠感覺得到空間既溫度、空氣既流動...
「當然啦，」阿風摸摸身上既緊身衣，「因為呢件緊身衣，係用黎加強穿著者與Sacred-Armor之間既連接。所以根本就係同LCL一模一樣。」
『好喇，我地唔好浪費時間喇。』我行到十二件Sacred-Armor面前...
「解除Sacred-Armor既待命狀態。」阿風亦都行近壓縮空氣管。
“吱”一聲響，由十二個壓縮空氣管發出。
只見壓縮空氣管裏既LCL正迅速飛散到空氣中。
當管內既LCL完全飛散出黎之時，“吱”一聲響，十二個壓縮空氣管消失，十二件Sacred-Armor展露喺空氣中。
阿風一步一步走向Sacred-Armor..轉過身...踏喺Sacred-Armor既腳板上...
“吱”...“吱”...“咔”...“咔”...“咔”...幾下機械聲，Sacred-Armor完美咁與阿風結合起黎!
中間綠白既光線向四肢及頭部流動，閃下閃下，好似流水，好似心跳...
“砰...砰...砰...砰...”阿風著住Sacred-Armor行到我地面前...
我地其餘十一亦都行到去十一件Sacred-Armor前...
當我踏喺Sacred-Armor既腳板上既時候...
“吱”...“吱”...“咔”...“咔”...“咔”...Sacred-Armor各組件立即自動套喺我身上。
當第一次接觸人工納米仿製肌肉既時候，感覺相當冰冷。
無幾耐，仿製肌肉作出調整，我感覺到Sacred-Armor外面既溫度同空氣流動...就好似身體一部份一樣。
“吱”...“吱”...“咔”...“咔”...“咔”...各組件已經套上，“咔”...腰、“咔”...胸口、“咔”...雙手、“咔”...頸、“咔”...面罩...
面罩已經合上，但眼前既畫面非常清晰，比肉眼更清晰。
而且，身體各部份既感覺...好自然...
自然到好似無著到甲一樣...
我望一望自己雙手，機械手...
我好似一個機器人一樣...
當我握一握雙手，耳邊傳入阿風既聲音:「你地要記住一點，我地去到元朗領域之後，未必可以連接到元朗領域既EVE系統。」
無錯喇，如果唔可以連接EVE系統，我地就連思緒都連接唔到...
所以我地只可以靠Sacred-Armor既設備!
就好似話短距離通訊系統...
仲有…
『Sacred-Armor裏面有無儲存裝置?』我立即問起阿風。
「有!Sacred-Armor內藏...」我唔等阿風作詳盡解說。
『我已經畫出突入元朗領域既路線圖。而家就傳俾各位，你地都將路線圖儲存到Sacred-Armor內!』我一邊講，一邊將路線圖透過EVE系統傳到各人戶口入面。
「了解!」各人作出回應。
我都將路線圖儲存到Sacred-Armor內後:『準備好未?』
「準備好!」
『出發!』我地一行十二人以忍步跑出裝備庫。
我地要爭取時間，因為已經時間無多!