偷戀: 第十四章

講起阿欣，我記得我係由中四開始鍾意佢，直到大學畢業。
 
我無同佢表過白，甚至稱唔上係一個同佢相熟嘅朋友。
 
我一直同佢保持適當嘅距離。
 
愛一個人，唔一定要擁有。
 
BULLSHIT！
 


其實我好撚想擁有佢，不過，我淆底。
 
畢竟嗰陣日日都要返學，表白一衰咗，就會好尷尬。
 
因為我知道衰硬，所以無表白。
 
無自信可以話係我最大嘅缺點，同時亦係我最大嘅優點。
 
因為無自信，而有自知自明。
 


我情願坐係班房嘅角落，偷望阿欣嘅一舉一動，幻想吓同佢一齊，一齊坐，一齊溫書，一齊恰眼訓，都好過一嚟就將所有幻想空間抹殺。
 
我諗，正因為我同佢唔熟，先可以鍾意佢咁耐。
 
雖然阿欣無KATHY咁完美，但正如唔知邊個所講，鍾意一個人，唔需要理由，可能係一個笑容，一個舉動。撥一撥頭髮，托一托眼鏡，就令你有種觸電嘅感覺。
 
我鍾意阿欣嗰一刻，應該係見到佢紮頭髮。
 
佢皮膚好白，嗰一次，佢咬住條橡筋，露出條又白又滑嘅頸，我就唔小心鍾意咗佢。
 


之後，就刻意同佢保持距離。
 
幻想佢係一個溫柔小女友，幻想佢係一個佔有慾強，妒忌心重嘅小野貓，幻想佢係一個會甜言蜜語哄我嘅體貼女孩……
 
如此等等，我唔知道自己係幻想世界入面度過咗幾多年月。
 
但我享受。
 
享受幻想嘅感覺，享受鍾意佢嘅自己。
 
如果KATHY話，有夢想嘅人好耀眼，咁我會覺得，全心鍾意一個人嘅自己，係最耀眼。
 
或者換個講法，我嘅夢想，就係佢。
 
「喂，呢個鐘數，去打波？一定無人。」阿樂提議。


 
我地都鐘意係個場無人嘅時候打籃球，唔係話唔鍾意同人鬥波，只係更加享受1ON1嗰種感覺。
 
有年班際，我地仲熱血到返學之前去練波，放學又練。
 
雖然最後輸咗，但真係好難忘。
 
「我好耐無打喇喎！一陣又俾你屠殺屈我請食飯就唔好啦。」
 
「淆呀？」
 
「淆你老母！」
 
以前約6個人打波，易過借火。
 


依家想齊人？難過戒煙。
 
大個咗之後，真係少咗好多呢啲時間，佢地有佢地嘅忙碌，我有我廢青嘅生活。
 
雖然有時都會落下街場射下波，享受穿針一刻嘅高潮。
 
不過，已經無咗以前嘅拚勁。
 
或者係喺我遇到樽頸之後，就失去咗拚勁。
 
亞洲人有亞洲人嘅限制，首先係我嘅身高，然後係肌肉彈性，骨架等等各方面都不如黑人。
 
我曾經好渴望入樽，不過最高峰嘅時後都係掂到框。
 
係才能同基因嘅高牆前面，我選擇咗逃避。


 
或者，我係當失敗者嘅好材料。