偷戀: 第三十四章
又過咗一個星期，去到星期六，KATHY又無啦啦WHATSAPP我。
「我嗰次睇到你幅畫。」
嗰次？
我諗應該就係講我同阿欣去食大排檔嗰次，因為我帶埋幅畫返屋企。
佢咁講一講，我先有少少估到佢嗰句「你想成為咁多個嘅其中一個？」嘅意思係咩。
「你唔應該放棄畫畫。」佢繼續輸入。
果然，如我所料。
「你都唔應該放棄拉小提琴。」
「我無辦法唔放棄。」佢講。
「我都無辦法唔放棄。」我答。
「你唔好俾藉口自己啦！」佢講。
「你都唔好俾藉口自己啦！」我又答。
「我講緊你呀！你做咩拉埋我嚟講？」KATHY講。
「因為都係性質一樣嘅事。」我講。
「點同！」
「有咩唔同？」
「算啦，無嘢……」
「有嘢。」我講。
「有咩嘢？」
「有啲嘢。」
「有啲咩嘢？」
「有啲你知我知但大家都唔講嘅嘢。」
「之係咩嘢？」
「你對我嘅態度唔同咗。」
「嗯……」KATHY出乎我意料地坦率承認。
「你做咩依家又講？」佢追問。
「因為我唔想繼續係咁。」我答。
「咁你想點？」
「我想聽你拉小提琴。」
「（笑喊EMOJI）你九唔搭八喎！」
「有啲嘢你唔想講，就算我想知都唔會問。」
「嗯……」
「不如？」我問。
「不如啲咩？」
「無嘢了。」
「喂！」
「我學你之嘛。」
「（嬲嬲EMOJI）好學唔學！」
「你想知？」
「唔想！」
「但我想話你知，我係想問：不如今晚一齊食飯？」
等咗五分鐘。
「嗯。」
我收到呢個答覆。
我唔知道我同佢係唔係通過呢次對話返去以前嘅關係，不過，我唔想再同佢距離十萬九次里遠。
既然唔可以跨越心靈上嘅距離，咁至少，唔好連物理上嘅距離都唔去跨越。
雖然我始終唔知道KATHY當初180度轉變嘅原因，但從佢鼓勵我畫畫呢點，我自大地認為我喺佢心目中係佔有少少位置。
呢次係自從彈結他俾佢聽以嚟，第一次再同佢單獨食飯。
我去咗佢屋企樓下等佢，然後一齊去屬於我地嘅老地方。
「去食咩？」KATHY問我呢個問題，令我有少少驚訝。
「吓？你想食其他？」我反問。
「唔……都唔係嘅……」
「咁點解你咁問嘅？」我指嘅當然係問佢點解問去食咩。
因為我一直以為，嗰檔大排檔，對於我地嚟講，已經唔係嘢食好食咁簡單，而係一個屬於我地嘅老地方。
「我地」嘅關係係咩都好，係同事，係朋友，係好朋友，係乜都好，我真心將大排檔呢個地方昇華咗做一個專屬於我倆相處嘅地方。
喺嗰度，我第一次同KATHY單獨食飯；
喺嗰度，我第一次見到另一面嘅KATHY；
喺嗰度，我第一次聽KATHY對於夢想嘅抱怨；
喺嗰度，我第一次產生想擁有佢嘅想法……
「無呀，我諗住你有其他好介紹之嘛…」KATHY講。
「無啦，對於我嚟講，去嗰度已經唔只係食好嘢咁簡單。」我隱晦咁講。
「咁玄？咁仲食啲咩呀大師？」
「感覺。」
同埋回憶，仲有幻想。
「哦……所以你就帶嗰個阿欣嚟？俾啲感覺佢？」
「痴線！佢結咗婚架喇！」
「喔！之係如果佢未結婚你就會？」
「你想知？」
「……」KATHY突然沉默不語。
「唔會。」我都廢事賣關子。
「咁你又帶……」KATHY喃喃自語，我唔係好聽得清楚。
我早已經放棄猜測佢個心諗咩，雖然我好想知，不過，我唔想僭越。
享受呢一刻我同佢嘅關係，先至係最重要。
呢餐飯入面，KATHY時而沉默，時而滔滔不絕……
間中嘅欲言又止，令我更加難捉摸。
喺一段關係入面，我最憎就係摸唔透對方諗啲咩嘢，所以盡可能，當我察覺到KATHY有咩想知但又唔好意思問，我都會主動講出嚟，務求佢開心。
儘管我地嘅呢段「關係」，模糊不清。
我唔知道佢眼中嘅我喺佢心裡面轉變過幾多次，而佢最後得出而家嘅結論係咩我都唔知，我都唔會去問，因為無論點都好，我都要一直喺佢身邊。
當然，我係有猜測過。
猜測一：喺我彈結他俾佢聽之後，佢察覺到我對佢嘅心意，所以想避開我，但避避下又覺得可能係自己諗多咗，所以又同返我講嘢，變到依家咁。
猜測二：彈完結他俾佢聽之後，佢發覺我地之間嘅關係喺旁人眼中非常曖昧，而佢又覺得瓜田李下，應該避一避，所以就同我拉開距離，事後又唔想無咗咁朋友，所以就同我保持適當距離地交流。
猜測三：佢聽完我彈結他之後，終於都當我係一個雄性咁看待，覺得繼續咁樣同我相處落去，可能會產生火花，所以避開我，事後佢搞清楚自己無可能同我有火花，所以又變返好似依家咁。
猜測四：佢喺聽我彈結他嘅過程，唔小心過咗半吓電，所以開始迴避繼續同我接觸，但過咗一段時間之後，佢搞清楚自己個心依然向住佢男朋友，所以同我回復關係。
猜測五：佢鍾意咗我，雖然想避開我，但又做唔到100%避開……
以上五個猜測，可能五個都唔中，不過中唔中都唔緊要了，最緊要係佢呢一刻，喺我面前咬住條椒鹽鮮魷──佢仲喺我觸手可及嘅地方，咁樣我就心滿意足。
喺末日嚟之前，俾我停留多一陣。
唔該。