是咁的，我嘅職業係動物傳心師: 13.大B

「你好，你就係阿金？」叫阿麗嘅女仔戴住眼鏡、拖住一隻戴咗口罩嘅狼狗。

「係呀，唔講廢話，即刻開始啦。」

「吓？你咩資料都唔知，咁就開始得？」

我指住狼狗：「問佢咪知。」

我踎低問佢：「喂，你好嗎？叫咩名咁呀？」





狼狗偏頭：「死開啲啦你。」

阿麗以期待嘅眼神望住我。

「你咁唔合作我好難幫你㗎喎。」

「使鬼你幫。」佢應得又串又冷漠。

我企返起身，向阿麗搖搖頭。「佢好燥底喎，叫我死開啲唔使我幫喎。」





阿麗竟然無失望，反而眼神流露些少曙光。

「你⋯⋯真係同到大B講嘢⋯⋯」

奇怪，通常咩都問唔到，客人實係懷疑我，難得今次係隻狗唔睬我，主人反而覺得我可以同隻狗溝通。

「其實大B向來都唔多友善，以前我都搵過動物傳心師，但係佢哋覆述大B講乜嗰陣，硬係覺得啲語氣同態度唔多對路咁。」
 
佢都幾熱情吖。
傾咗一陣啦，咁佢係友善嘅。




你隻狗狗都幾多嘢講。
 
以上係幾位神棍嘅語錄。

「你隻狗咁都叫友善？基本禮貌都無喎。」