是咁的，我嘅職業係動物傳心師: 18.失落之夢

「大B唔好呀！」阿麗喺我旁邊大叫，我未嚟得切反應，只見眼前有一個血盆大口──大B凶猛咁撲上嚟，被警犬咬過嘅賊應該可以理解到我呢一刻咩心情。

我下意識伸出右手擋喺身前，大B嘅牙陷入我嘅前臂。我成個人向後跌，大B就撲喺我身上，咬住我隻手唔放。

阿麗想過嚟拉開大B，但我大聲喝住阿麗：「唔好！」

被咬嘅右手完全唔痛，亦無流血。大B放口，我手臂上只有淺淺嘅齒痕，真係無力得咁交關。

大B失望咁趴喺地上，無助咁望向我。





腦入面將線索連接，雖然未確定，但如果係咁的話，難怪大B會咁痛苦。

我伸出手，摸摸佢嘅頭；今次，佢無再避開。

「我係咪⋯⋯已經唔可以擁有夢想？」大B由下而上望住我。

「本來所謂生命，就係有各種各樣嘅無奈。」

被迫放棄嘅夢想，令人痛不欲生。





做人如果無夢想，同咸魚有乜分別？其實狗都係一樣。

好少人察覺到依句對白嘅雙關語，只有講廣東話嘅人先明，咸魚，係屍體嘅別稱。

無夢想嘅人，雖生猶死，只係行屍走肉，但如果係被迫放棄嘅夢想呢？

牠說，我想活，但現實殺死我。