是咁的，我嘅職業係動物傳心師: 21.唔明白

阿麗從來無諗過帶大B接受警犬訓練，亦從來無諗過要大B做警犬；對阿麗嚟講，大B從來都只係寵物。

並唔係任何人嘅錯，只不過係一直無辦法互相理解。

「我一直諗，到底要點做先可以令主人知道我其實好想追壞人、好想捉賊，等佢會帶我去訓練，等我可以有機會做警犬。」

終於，有一次機會。

大B見到一個男人抱住手袋穿過馬路，後面有個索晒氣嘅阿太想追出去。





係壞人。

只要、只要我可以追到佢，主人一定會覺得我適合做警犬。

終於搵到，令主人可以理解自己夢想嘅方法。

四肢肌肉爆發出前所未見嘅力量，掙脫主人嘅束縛。

眼前，就係夢想。煞車嘅聲音，血花四濺，將夢想染成腥紅。





「但係直到我做完手術，主人都唔明白我嘅夢想。」