是咁的，我嘅職業係動物傳心師: 29.發叔

通常我見客嘅日子，都會一日內連續見兩至三個客人，至少兩個，最多三個。

今日我就只係見兩個，同阿麗、大B分手之後，我就返屋企附近。

今日第二個客人係一個阿伯，時間係下午四點半，地點係荷李活道公園。

阿伯睇落仲好健康，雖然滿頭白髮，但精神爽利。

「發叔下話？」





發叔本身用鐵盤敲緊地，敲到鐺鐺聲，公園內嘅貓聽到都走埋嚟，大約有六七隻。

「你就係金仔？」佢起身，同我握手。

貓貓聚集喺發叔腳邊，有啲食緊嘢，有啲抬頭對佢喵喵叫。

一面對貓，就更容易勾起我同餐肉嘅回憶，所以次次接貓嘅委託，我都有少少唔情願。

發叔比手勢示意我跟住佢行，然後就帶路，後面仲有兩三隻貓好似鴨仔咁跟住發叔。





「你都幾受流浪貓歡迎㗎喎。」

「哈哈，阿叔後生嗰陣已經成日喺度餵貓。都見咗幾代㗎喇。」

我同發叔繼續行，離遠見到目標。