是咁的，我嘅職業係動物傳心師: 50.幫我搵

「喂喂，點解你識講我哋啲話嘅？」突如其來嘅問題將思緒拉返嚟現實，原來係喺我腳邊嘅細貓，佢同我一齊望住發叔同三色妹離開公園。

「我都唔知點解，總之突然間有一日就識咗。」

「咁得意？係喇，咁你可唔可以話我聽我喵咪去咗邊？我好耐無見過佢喇。」

我踎喺細貓面前，問：「佢唔見咗好耐？」

「係呀，喵咪有一日被啲人類帶走咗，之後返咗嚟，但好快又唔見咗。」





我諗返發叔話依一帶嘅流浪貓已經紮晒，可能細貓媽咪被人帶咗去絕育，之後放返喺公園，但點會無端端又唔見咗？

「係咪唔見咗一段日子？」

「係呀。」

「咁未必搵得返，你最好有心理準備。」

細貓咬我隻腳，雖然唔係好大力，但都整痛我。





「痴線呀你？」

「幫我搵呀喵，得你識聽我哋講嘢㗎咋！」