是咁的，我嘅職業係動物傳心師: 79.花時間

我哋時間多咗，但人同人嘅關係變得更加淡薄；我哋時間多咗，但人對動物嘅理解不進反退。

陳生聽到貓叫春，但有無諗過點解？有無嘗試過去了解發生咩事？一隻狗每次見到人都即刻逃走，有無人明白佢點解見到人會咁驚？一隻貓攻擊接近佢嘅人，邊個理解佢無端端端攻擊人嘅原因？現代人，真係無時間可以花喺動物身上？

可能有人會覺得，理解太麻煩，有唔少養寵物嘅主人，面對自己寵物嘅厭惡性行為，會覺得與其叫我去了解點解隻畜牲會做啲乞人憎嘅行為，不如棄養更加直接。另外有一啲人，一開始會嘗試去了解同處理，但因爲睇唔到即時成效，最後選擇放棄。

「吓？佢日日喺屋企亂屙喎，我跟足啲訓練員講咁訓練㗎喇，半年啦都，我都對佢好足半年啦，都係唔得，我都無辦法。」

因為太多事，幾分鐘之內就有結果，令人覺得訓練半年就可以令寵物聽聽話話；講真，養寵物嘅人，大部分都係覺得動物可愛，覺得一齊會開心先開始去養，但又有幾多會一併接受佢哋嘅缺點？





領養嘅寵物，有好多都有自己嘅過去，而佢哋連講出口都做唔到；到新主人領養之後，返到屋企發現佢哋做出又奇怪又煩又乞人憎嘅行為，就極速選擇放棄，但其實只要肯花時間、方法得宜的話，人同動物就算無辦法傾偈，都仍然可以互相了解。