殘酷無情,但係必須接受嘅現實;就算有超能力,都無辦法拯救所有人,而現實嘅無奈同冷酷,進一步強逼我認清佢嘅本質。

咯咯咯。敲門聲響起,我話「入嚟」,沉重木門應聲而開,拎住生果籃嘅發叔神情黯然,慢慢走入嚟。

巴膠將報告同腦掃描片一一收入公文袋。

「你記住我同你講咩。」

我向佢點頭,巴膠就放低咗個公文袋喺我枱頭再行出去,同發叔擦身而過嘅時候對發叔微微一笑表示告辭。





發叔放低果籃,「唉」咗一聲,坐喺床邊。佢眉頭深鎖,好似全身散發灰黑色嘅薄霧咁。

隔咗一陣,發叔先開聲:「你⋯⋯見好啲無?」

我諗都無諗就答:「我無事,睇個樣似係你有事喎。」

發叔咬住下唇,佢身上嘅黑霧蔓延到我嘅身邊,令人反胃嘅不安感將我籠罩。

「唔係我有事⋯⋯係公園啲流浪貓⋯⋯」瞳孔收縮,寒氣好似冰釘咁打入皮膚上每一個毛孔。





「全部死晒。」
已有 0 人追稿