是咁的，我嘅職業係動物傳心師: 100.過去

發叔一邊忍住大喊嘅衝動一邊講咗好多好深刻嘅經歷：由第一次餵貓被佢哋抓傷，到慢慢得到一隻貓嘅信任，佢哋食自己帶嚟嘅嘢；而最開心嗰一刻，莫過於流浪貓認得你。

過咗大半年，連最頑固嘅貓都終於卸下心房，埋去發叔腳邊嗲佢嘅嗰一個瞬間，唔知點解，發叔望住佢，微笑住咁流下罕見嘅男兒淚。

我諗起大佬灰，諗起細貓。
 
咁你可唔可以話我聽我喵咪去咗邊？我好耐無見過佢喇。
 
我仲未嚟得切話佢知我查清楚嘅真相。





細貓臨終前嘅痛苦、仲未知媽媽去咗邊嘅不安、對死亡嘅恐懼，令我忍唔住合埋眼，耷低頭。腦入面嘅中心點升溫，變得灼熱，好似運轉得太快嘅電腦核心咁。
我嘅視界好似返咗幾日前，細貓死前嘅一刻。

佢伏喺地上奄奄一息，個肚一起一伏，但幅度愈來愈微弱。

「喵咪⋯⋯你喺邊呀？⋯⋯你唔見咗好耐喇⋯⋯我好掛住你⋯⋯我好唔舒服⋯⋯你喺邊呀？」

我揸實拳頭，淚珠沿住鼻樑滑落，喺鼻尖聚集。

我知自己嘅大腦已經進化到可以將我嘅意識重返過去，但已經發生嘅事無從改變，一切已成定局。





我踎低，嘗試撫摸細貓，但我掂佢唔到。我嘅手掌喺接觸細貓身體嘅剎那化成一團白煙滑過，然後再重組為一隻手。我咬住下唇，用兩隻手喺細貓身上掃咗幾下，白煙、重組、白煙、重組。

「哥哥呢⋯⋯你唔係應承我⋯⋯幫我搵喵咪㗎咩？」

我終於都忍唔住，喊咗出嚟：「對唔住⋯⋯對唔住呀⋯⋯」每講一句，就一拳打落地面，拳頭化成白煙。