是咁的，我嘅職業係動物傳心師: 102.整理

我嘅意識返到現實，淚水沾濕晒成塊面，拳頭仲緊握住。

「發叔，你放心。」我停一停，感受到大腦開始降溫。

「我一定會搵落毒嗰條仆街出嚟！」

發叔多謝我肯咁做，佢話有咩幫手即管出聲，之後想留喺度切啲生果我食，但我拒絕咗，事關我想喺一個安靜嘅環境下探索自己嘅能力可以做到咩程度。

「記得有咩我幫到手就話我知，阿叔一定幫你㗎。」





「放心啦發叔，實搵你幫拖。」

發叔走咗之後，我喺病床上正坐，深呼吸，冷靜同整理自己目前有嘅資訊。

三年前餐肉死嗰日開始我擁有同動物傳心嘅超能力，可以理解到動物講乜，亦可以雙向溝通；經過三年時間，傳心能力慢慢進化，同時對我嘅大腦產生負面影響，由於我可以使用嘅大腦區域比一般人多，所以就能夠使用超能力⋯⋯咪住，我嘅大腦結構同一般人係一樣，咁即係每個人嘅腦入面其實都一樣有傳心嘅能力？

傳心能力一直存在，只係普通人嘅大腦未發展到嗰個領域，情況就好似唔夠手長去撳掣一樣。若然真係咁，發叔所講嘅心靈相通或者真係有都唔出奇，如果個掣就喺指尖前少少，咁不停用力伸出手總有機會觸碰到。
至於我嘅情況，就係對手愈生愈長，可以撳到嘅按鈕就比一般手短嘅人多，但係經過陳生件事，睇嚟我仲可以影響另一個個體，增長佢隻手令佢都掂到平時接觸唔到嘅掣。依家嘅問題係，到底我令其他人嘅腦區擴展係短期嘅影響，定不可逆嘅長期影響？

為咗知道答案，我打咗個電話畀陳生。