綠燈反駁:「點同呢?佢返工見嘅都係傷咗或者攻擊性好高嘅動物嚟㗎嘛。仲有佢係幫手做執屎執尿餵嘢食同沖涼依啲厭惡性工作,同依家輕輕鬆鬆陪動物玩係兩回事。」

我話:「你講嗰啲厭惡性工作,其實養過寵物就知只不過係日常生活嘅一部分嚟。養一隻生物就要接受佢哋核突嘅一面,bb仔都要屙屎啦,我唔覺得係厭惡性工作。」

我當日辭職,都只係因為睇唔過眼肥榮叔佢哋做嘢嘅宗旨,道不同不相為謀,而唔係因為我唔想再幫動物執屎執尿。

「咁你當放低工作性質、無任何壓力咁同佢哋互動下咯,無壞啫。」綠燈唔服輸,佢一直都係幾個入面最錫我嗰個,所以佢先會想我可以放低以前嘅事,放過自己。佢亦係唯一一個,會同我講好心痛我一直自虐嘅人。

「佢唔想你就咪逼佢啦。」但就算無將同一句說話講出口,我都知巴膠嘅心情同綠燈係一樣。





「你覺得佢咁樣……真係好咩?」

巴膠諗住同隻波斯貓自拍,點知隻貓行埋一邊,佢再跟過去,隻貓就再走遠啲。

「重點唔係你畀咩佢,係佢自己覺得需要乜嘢。」

巴膠指一指隻波斯貓︰「就好似同動物玩咁,你覺得同佢玩佢會開心,但其實佢嫌你煩,想你咪搞住佢。」
已有 0 人追稿