是咁的，我嘅職業係動物傳心師: 138.放手

「但係⋯⋯你唔會因為以前太開心同幸福，令失去嘅時候更加痛苦咩？」

可能係諗到我唔喺度會變成點，阿媽個鼻更加紅，眼淚缺堤，但過咗兩秒，佢展露微笑。

「會，但起碼諗起你嘅時候，我會笑。」

「無咗我之後⋯⋯你唔會諗⋯⋯如果我仲喺度⋯⋯可以點點點，可以做乜乜乜咩？」

煎午餐肉嗰陣，阿仔喺度就好；去旅行嗰陣，阿仔喺度就好；生日嗰陣，阿仔喺度就好；病嗰陣，阿仔喺度就好；死嗰陣，阿仔喺度就好⋯⋯





「會，但你已經喺度。」阿媽將手掌輕輕放喺左胸上：「仲好啦，唔使驚你唔得閒陪我，只要我一諗起你，你就喺我身邊。」

我一直都幻想前度同餐肉仲喺我身邊的話會係點，已經太耐，耐到我忘記咗分離之前嘅快樂。

既然所有人嘅結局都係分離，咁未分離之前嘅自己可以咁開心咁幸福，已經好足夠⋯⋯我感覺到嗰一刻，真正嘅，靈魂上嘅釋懷。

五年嚟一直握住嗰隻無形嘅手，猶如活現喺眼前。
 
同你一齊，真係好幸福
 




放手。